କଟକ,୦୯/୧୨: କ୍ରମାନ୍ୱୟରେ ଦ୍ୱିତୀୟ ବର୍ଷ ପାଇଁ କଟକରେ ଆୟୋଜିତ ହେବାକୁ ଯାଉଛି ସମ୍ମାନଜନକ ବିଡବ୍ଲ୍ୟୁଏଫ୍ ଟୁର ସୁପର-୧୦୦ ଓଡ଼ିଶା ମାଷ୍ଟର୍ସ-୨୦୨୩ । ଆସନ୍ତା ୧୨ରୁ ୧୭ ତାରିଖ ପର୍ଯ୍ୟନ୍ତ ଜବାହରଲାଲ୍ ନେହେରୁ ଇନ୍ଡୋର ଷ୍ଟାଡିୟମ୍ରେ ଏହି ଟୁର୍ଣ୍ଣାମେଣ୍ଟ ଆୟୋଜିତ ହେବ । ଭାରତର ନାମିଦାମୀ ବ୍ୟାଡମିଣ୍ଟନ ତାରକାଙ୍କ ସମେତ ବିଦେଶୀ ଖେଳାଳି ଅଂଶଗ୍ରହଣ କରିବେ । ଟୁର୍ଣ୍ଣାମେଣ୍ଟର ପୁରସ୍କାର ରାଶି ରହିଛି ୧ ଲକ୍ଷ ଡଲାର, ଯାହା ଭାରତୀୟ ମୁଦ୍ରାରେ ପ୍ରାୟ ୮୪ ଲକ୍ଷ ଟଙ୍କା ହେବ । ଓଡ଼ିଶା ମାଷ୍ଟର୍ସ ଏସିଆର ପ୍ରମୁଖ ଟୁର୍ଣ୍ଣାମେଣ୍ଟ ମଧ୍ୟରୁ ଅନ୍ୟତମ ।
ରାଜ୍ୟ କ୍ରୀଡ଼ା ଓ ଯୁବସେବା ବିଭାଗ ପକ୍ଷରୁ ଟୁର୍ଣ୍ଣାମେଣ୍ଟ ଆୟୋଜନ ନେଇ ପ୍ରସ୍ତୁତି ଜୋରଦାର ଚାଲିଛି । ୨୦୨୨ରେ ହୋଇଥିବା ପ୍ରଥମ ସଂସ୍କରଣ ସଫଳ ହେବା ପରେ ପୁର୍ନବାର କଟକରେ ଆୟୋଜନ କରିବାକୁ ସ୍ଥିର କରାଯାଇଥିଲା । ଗତ ସଂସ୍କରଣରେ ପୁରୁଷ ବର୍ଗରେ ଚାମ୍ପିଅନ କିରନ ଜର୍ଜ ଏବଂ ମହିଳା ବର୍ଗରେ ଚାମ୍ପିଅନ ଉନ୍ନତି ହୁଡା ଟ୍ରଫି ବଜାୟ ରଖିବା ଲକ୍ଷ୍ୟରେ ପୁଣି ଥରେ ପ୍ରତିଯୋଗିତାକୁ ଓହ୍ଲାଇବେ । ସେହିପରି ମହିଳା ଡବଲ୍ସରେ ଚାମ୍ପିଅନ ଗାୟତ୍ରୀ ଗୋପୀଚାନ୍ଦ ଏବଂ ତ୍ରିଶା ଜୋଲି ମଧ୍ୟ ଏଥର ଟାଇଟଲ୍ ଲାଗି ଟକ୍କର ଦେବେ।
ରାଜ୍ୟ କ୍ରୀଡ଼ା ସଚିବ ଆର.ଭିନିଲ କ୍ରିଷ୍ଣା କହିଛନ୍ତି, ‘କଟକରେ ପୁଣି ଥରେ ଓଡି଼ଶା ମାଷ୍ଟର୍ସ ଆୟୋଜିତ ହେବାକୁ ଯାଉଛି । ବ୍ୟାଡମିଣ୍ଟନ ଉପରେ ଅଧିକ ଗୁରୁତ୍ୱ ଦିଆଯାଉଛି । ଏହି ଖେଳର ପ୍ରଚାର, ପ୍ରସାର ପ୍ରତି ଦିଗରେ ବିଶେଷ ଧ୍ୟାନ ରଖାଯାଇଛି । କ୍ରୀଡ଼ା ଭିତ୍ତିଭୂମିର ବିକାଶ ଯେତିକି ଜରୁରୀ, ଏଭଳି ଅନ୍ତର୍ଜାତୀୟ ସ୍ତରର ଟୁର୍ଣ୍ଣାମେଣ୍ଟ ଆୟୋଜନ ମଧ୍ୟ ସେତିକି ଜରୁରୀ ରହିଛି ।’ ଜାତୀୟ ଓ ଅନ୍ତର୍ଜାତୀୟ ସ୍ତରର ଖେଳାଳିଙ୍କ ସହ ଘରୋଇ ଖେଳାଳିଙ୍କୁ ମଧ୍ୟ ଏହି ଟୁର୍ଣ୍ଣାମେଣ୍ଟରେ ଖେଳିବାର ସୁଯୋଗ ରହିଛି ।
