ସମ୍ବଲପୁର, ୨୭।୦୨: ବୃଦ୍ଧ ବାପାକୁ ହତ୍ୟା କଲା ସାନ ପୁଅ। ସମ୍ବଲପୁର ସଦର ଥାନା ଘେନୁପାଲି ଗାଁରେ ଏହି ଅଘଟଣ ଘଟିଛି। ହତ୍ୟା କରିବା ପରେ ଅଭିଯୁକ୍ତ ପୁଅ ଘଟଣାସ୍ଥଳରୁ ଫେରାର୍ ହୋଇଯାଇଛି। ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି।

ସୂଚନାନୁଯାୟୀ, ସୋମବାର ବିଳମ୍ବିତ ରାତିରେ ଘେନୁପାଲି ଗାଁରେ କୌଣସି କାରଣକୁ ନେଇ ବାପ-ପୁଅଙ୍କ ମଧ୍ୟରେ ଝଗଡ଼ା ହୋଇଥିଲା । ଏହି ଝଗଡ଼ାରେ ପୁଅ ରାଗି ଯାଇ ବାପାଙ୍କୁ ପ୍ରବଳ ମାଡ ମାରିଥିଲା । ଯେଉଁଥିରେ ବାପା ଲିଙ୍ଗରାଜ କୁମୁରା ଅଚେତ ଅବସ୍ଥାରେ ପଡି ରହିଥିଲେ । ଏହାପରେ ତାଙ୍କୁ ଘଟଣାସ୍ଥଳରୁ ଉଦ୍ଧାର କରି ନିକଟସ୍ଥ ମେଡିକାଲରେ ଭର୍ତ୍ତି କରାଯାଇଥିଲା । ହେଲେ ସେଠାରେ ଡାକ୍ତର ତାଙ୍କୁ ମୃତ୍ୟୁ ଘୋଷଣା କରିଛନ୍ତି । ସେପଟେ ହତ୍ୟାକାଣ୍ଡ ପରେ ପୁଅ ଅମୁଲ୍ୟ କୁମୁରା ଘଟଣାସ୍ଥଳରୁ ଫେରାର ମାରିଛି ।  ଏବେ ଯାଏଁ ହତ୍ୟାକାଣ୍ଡର କାରଣ ଅସ୍ପଷ୍ଟ ରହିଛି । ପୋଲିସ ଘଟଣାର ଛାନଭିନ୍ ଜାରି ରଖିଛି ।