ଜୟପୁର/କୋରାପୁଟ ୦୪/୧୧: ଦୀର୍ଘଦିନ ପରେ ଏକାଠି ହୋଇଛନ୍ତି ଗୋଟିଏ ମଞ୍ଚରେ । ଭଣଜା ମୁଣ୍ଡିଆ ମାରି ମାମୁଙ୍କଠାରୁ ନେଇଛନ୍ତି ଆଶୀର୍ବାଦ । ମଞ୍ଚରେ କୋଳାକୋଳି ହୋଇଛନ୍ତି । ଆମେ କହୁଛୁ, ମାମୁ ତଥା ବିଧାୟକ ତାରାପ୍ରସାଦ ବାହିନୀପତି ଏବଂ ଭଣଜା ତଥା କୋରାପୁଟ ସାଂସଦ ସପ୍ତଗିରି ଶଙ୍କର ଉଲ୍ଲକାଙ୍କ କଥା । ଶୁକ୍ରାବର ରାଜ୍ୟସ୍ତରୀୟ ‘ପରବ’ ଉଦ୍ଘାଟନୀ କାର୍ଯ୍ୟକ୍ରମରେ ବୋରିଗୁମ୍ମାରେ ଦେଖିବାକୁ ମିଳିଛି ଏଭଳି ଦୃଶ୍ୟ । ଉଭୟ ମଶାଲ ଧରିଛନ୍ତି । ଫୁଲମାଳ ପିନ୍ଧି ପାଖାପାଖି ହୋଇ ଶୋଭାଯାତ୍ରାରେ ସାମିଲ ହୋଇ ଲୋକଙ୍କୁ ଅଭିନନ୍ଦନ ଜଣାଇଛନ୍ତି । ଛାତ୍ରୀଙ୍କ ସହ ମିଶି ଦୁହେଁ ମନଭରି ନାଚିଛନ୍ତି । ମାମୁ-ଭଣଜାଙ୍କ ଏହି ମହାମିଳନ ଦୃଶ୍ୟ ଉଦ୍ଘାଟନୀ କାର୍ଯ୍ୟକ୍ରମର ମୁଖ୍ୟ ଆକର୍ଷଣ ଓ ଚର୍ଚ୍ଚାର ବିଷୟ ପାଳଟିଛି । ତାରା ଓ ସପ୍ତଗିରିଙ୍କ ମଧ୍ୟରେ ଫାଟ ନେଇ ଯେଉଁ ଚର୍ଚ୍ଚା ଚାଲିଥିଲା, ସେଥିରେ ଯବନିକା ପଡ଼ିଥିବା କୁହାଯାଉଛି ।
ଶୁକ୍ରବାର ବୋରିଗୁମ୍ମା ବ୍ଲକରେ ଥିଲା ପରବ ଉତ୍ସବର ଉଦ୍ଘାଟନୀ କାର୍ଯ୍ୟକ୍ରମ । ଜୟପୁର ନିର୍ବାଚନମଣ୍ଡଳୀରେ ଏହି କାର୍ଯ୍ୟକ୍ରମ ଥିବାରୁ ବିଧାୟକ ତାରାପ୍ରସାଦ ବାହିନୀପତି ଅଧିକ ଉତ୍ସାହିତ ଥିଲେ । ପୂଜାର୍ଚ୍ଚନା ପରେ ନିମନ୍ତ୍ରିତ ଅତିଥିମାନେ ମଶାଲ ଧରିଥିଲେ । ଏହି ସମୟରେ ତାରାଙ୍କ ନିକଟରେ ଥିଲେ ସପ୍ତଗିରି । ଶୋଭାଯାତ୍ରା ସମୟରେ ବି ଉଭୟ ପାଖାପାଖି ରହିଥିଲେ । ଉଭୟଙ୍କ ଗଳାରେ ଥିଲା ଫୁଲମାଳ । ସ୍କୁଲ ଓ କେଲଜ ଛାତ୍ରଛାତ୍ରୀଙ୍କ ଉତ୍ସାହ ଦେଖି ରାସ୍ତାରେ ସେମାନଙ୍କ ସହ ଧୁମ୍ ନାଚିଥିଲେ ତାରା । ସପ୍ତଗିରି ମଧ୍ୟ ଏଥିଲେ ସାମିଲ ହୋଇଥିଲେ । ଦୀର୍ଘବର୍ଷ ପରେ ଦୁହେଁଙ୍କୁ ଏକାଠି ଦେଖି ଆରମ୍ଭ ହୋଇଯାଇଥିଲା ରାଜନୈତିକ ଚର୍ଚ୍ଚା । କାରଣ କେହିବି ଏଭଳି ଦୃଶ୍ୟକୁ ବିଶ୍ୱାସ କରିପାରୁନଥିଲେ । ଏହାପରେ ମଞ୍ଚରେ ଉଦ୍ଘାଟନୀ ସଭା ଆରମ୍ଭ ହୋଇଥିଲା । ଏହାକୁ ପରିଚାଳନା କରିଥିଲେ ତାରା । ନିମନ୍ତ୍ରିତ ରାଜନୈତିକ ନେତା ଓ ପ୍ରଶାସନିକ ଅଧିକାରୀଙ୍କୁ ସମ୍ବର୍ଦ୍ଧିତ କରିଥିଲେ । ସପ୍ତଗିରିଙ୍କୁ ମଧ୍ୟ ପ୍ରଭୁ ଜଗନ୍ନାଥ, ବଳଭଦ୍ର ଓ ସୁଭଦ୍ରାଙ୍କ ଫଳକ ପ୍ରଦାନ କରି ଅନୁରୂପ ଭାବେ ସମ୍ବର୍ଦ୍ଧନା ଜଣାଇଥିଲେ । ଏହି ସମୟରେ ତାରାଙ୍କ ଗୋଡ ଛୁଇଁ ଆଶୀର୍ବାଦ ନେଇଥିଲେ ସପ୍ତଗିରି । ମଞ୍ଚ ଉପରେ କୋଳାକୋଳି ହୋଇଥିଲେ ।
ସପ୍ତଗିରି କହିଛନ୍ତି ‘ଆମ ଭିତରେ କୌଣସି ମନମାଳିନ୍ୟ ନାହିଁ । ଆମେ ମାମୁ-ଭଣଜା ଏକ୍ । ଆଜି ତାଙ୍କ ସହ ମନଭରି ନାଚିଛି । ପରବ ଶୁଭାରମ୍ଭ କାର୍ଯ୍ୟକ୍ରମକୁ ଖୁବ ଉପଭୋଗ କରିଛି । ଏହା ନିଶ୍ଚିତ ଭାବେ ବିଜେଡିକୁ ଝଟକା ଦେବ ।’ ତାରାଙ୍କୁ ପଚାରିବାରୁ କହିଛନ୍ତି, ବିରୋଧୀମାନେ ଅନେକ କଥା କୁହନ୍ତି । ଦଳ ପାଇଁ ଉଭୟ ମିଶି କାମ କରୁଛନ୍ତି । ସପ୍ତଗିରି ତାଙ୍କୁ ସମ୍ମାନ ଦେଇଛନ୍ତି, ସେ ତାଙ୍କୁ ଶ୍ରଦ୍ଧା ଜଣାଇଛନ୍ତି ।
