ନୂଆଦିଲ୍ଲୀ: କଂଗ୍ରେସକୁ କୌଣସି ଆସନ ଦେବାକୁ ଆମ୍ ଆଦମୀ ପାର୍ଟି (ଆପ୍) ରାଜି ନାହିଁ । ପଞ୍ଜାବରେ ଆପ୍ ଏକାକୀ ଲଢ଼ିବାକୁ ଥିବା ବେଳେ ଜାତୀୟ ରାଜଧାନୀ ଦିଲ୍ଲୀରେ କଂଗ୍ରେସକୁ କେବଳ ଗୋଟିଏ ସିଟ ଦେବ ବୋଲି ଆପ୍ କହିଛି । ମଙ୍ଗଳବାର ଏନେଇ ଆପ୍ ସାଂସଦ ସନ୍ଦୀପ ପାଠକ ସୂଚନା ଦେଇଛନ୍ତି । ସାମ୍ବାଦିକ ସମ୍ମିଳନୀରେ ସନ୍ଦୀପ ପାଠକ କହିଛନ୍ତି ଯେ, ଦିଲ୍ଲୀରେ ଆପ୍ ୭ଟି ଆସନରୁ ୬ଟିରେ ପ୍ରାର୍ଥୀ ଦେବ । ହେଲେ ଗୋଟିଏ ଆସନରେ କଂଗ୍ରେସକୁ ସମର୍ଥନ କରିବ ଆପ୍ । ଦଳ ମେଣ୍ଟ କରିବାକୁ ଚାହୁଁଛି ହେଲେ ଅହେତୁକ ବିଳମ୍ବ ଚିନ୍ତା ବଢ଼ାଇଛି ବୋଲି ସନ୍ଦୀପ ପାଠକ କହିଛନ୍ତି ।
ସେହିଭଳି ଗୋଆରେ ଦୁଇଟି ଆସନରୁ ଗୋଟିଏରେ ପ୍ରାର୍ଥୀ ଦେବାକୁ ଯାଉଛି ଆପ୍ । ସାଉଥ ଗୋଆରୁ ଆପ ବିଧାୟକଙ୍କୁ ଲୋକସଭା ନିର୍ବାଚନ ଲାଗି ପ୍ରାର୍ଥୀ କରିବ ଦଳ । ସେହିଭଳି ଆପ ଗୁଜୁରାଟରେ ୮ଟି ଆସନରେ ପ୍ରାର୍ଥୀ ଘୋଷଣା କରିବ ବୋଲି ସନ୍ଦୀପ ପାଠକ କହିଛନ୍ତି । ତେବେ ଏନେଇ କଂଗ୍ରେସର କିଛି ଆପତ୍ତି ହେବ ନାହିଁ ବୋଲି ସେ ଆଶା କରିଛନ୍ତି । ସେ ଆହୁରି କହିଛନ୍ତି ଯେ, ଦିଲ୍ଲୀରେ ଆମ ସରକାର ରହିଛି । ନଗର ନିଗମରେ ବି ଆମ ସରକାର ରହିଛି । ଏହି ହିସାବକୁ ଦେଖିଲେ ଦିଲ୍ଲୀରେ ଆପ୍ର ୬ ସିଟ୍ ହେଉଛି । ତେଣୁ ଆମେ ୬ ଆସନରେ ନିର୍ବାଚନ ଲଢ଼ିବାକୁ ଚାହୁଁଛୁ ଏବଂ ଗୋଟିଏ ସିଟ୍ କଂଗ୍ରେସକୁ ଦେବାକୁ ପ୍ରସ୍ତୁତ ଅଛୁ ବୋଲି ସନ୍ଦୀପ ପାଠକ କହିଛନ୍ତି ।
ସେପଟେ ଇଣ୍ଡିଆ ମେଣ୍ଟ ଯେବେ ଘୋଷଣା ହୋଇଥିଲା ସେବେ ଦେଶରେ ଉତ୍ସାହ ଥିଲା । ବିରୋଧୀ ମହାମେଣ୍ଟର ଉଦ୍ଦେଶ୍ୟ ଥିଲା ଦଳଗତ ନିର୍ବିଶେଷରେ ଦେଶର ହିତ ଲାଗି କାର୍ଯ୍ୟ କରାଯିବ । ଆଉ ଏଥିପାଇଁ ମେଣ୍ଟରେ ଆପ୍ ମଧ୍ୟ ସାମିଲ ହୋଇଥିଲା ବୋଲି ସନ୍ଦୀପ ପାଠକ କହିଛନ୍ତି । ତେବେ ମେଣ୍ଟକୁ ଜିତିବାକୁ ହେଲେ ଠିକ୍ ସମୟରେ ପ୍ରାର୍ଥୀ ଦେବାକୁ ପଡ଼େ ।
ଆମେ କଂଗ୍ରେସ ସହ ଦୁଇ ଦୁଇ ଥର ଆଲୋଚନା କଲୁ କିନ୍ତୁ ଫଳ କିଛି ମିଳିଲାନି । ଏପରିକି ଗତ ଏକ ମାସ ମଧ୍ୟରେ ଗୋଟିଏ ମଧ୍ୟ ବୈଠକ ହୋଇପାରିଲା ନାହିଁ । ପ୍ରଥମେ ନ୍ୟାୟ ଯାତ୍ରାର କାରଣ ଦର୍ଶାଇଥିଲା କଂଗ୍ରେସ । ହେଲେ ପରବର୍ତ୍ତୀ ସମୟରେ ନିରବ ରହିଥିଲା ଦଳ । ଏପରିକି କଂଗ୍ରେସର କୌଣସି ନେତାଙ୍କୁ ବୈଠକ ସଂପର୍କରେ ଜଣାନାହିଁ ବୋଲି ଆପ ନେତା ଅଭିଯୋଗ କରିଛନ୍ତି ।
