କଟକ,୧୬/୦୯: ପାର୍ବଣ ପୂର୍ବରୁ ପୁଲିସର ବନ୍ଧୁକ ଗର୍ଜିଛି । କଟକ ପୁଲିସର ଏନ୍କାଉଣ୍ଟରରେ ଶୁକ୍ରବାର ଭାଣପୁରର ଦୁର୍ଦ୍ଦାନ୍ତ ଅପରାଧୀ ମଙ୍ଗୁ ଓରଫ ମନୋଜ ମହାରଣା ଆହତ ହୋଇଛି । ତା’ ବାମ ଗୋଡ଼ ଜଙ୍ଘ ତଳେ ଗୁଳି ବାଜିଛି । ଆହତ ମଙ୍ଗୁକୁ ଚିକିତ୍ସା ପାଇଁ ଏସ୍ସିବି ମେଡ଼ିକାଲ୍ କାଜୁଆଲ୍ଟିରେ ଭର୍ତ୍ତି କରାଯାଇଛି । ଏନ୍କାଉଣ୍ଟର୍ ସ୍ଥଳରୁ ମଙ୍ଗୁର ବନ୍ଧୁକ ଓ ଗୋଟିଏ ରାଉଣ୍ଡ୍ ଗୁଳି ଜବତ ହୋଇଛି ।
ଗତ ୬ ତାରିଖ ଦିନ ଅଭିଯୁକ୍ତ ମଙ୍ଗୁ ନିଜର କେତେଜଣ ସହଯୋଗୀଙ୍କ ସହ ମିଶି କନ୍ଦରପୁର ଥାନା ଅନ୍ତର୍ଗତ ମତ୍ତଗଜପୁର ରେଳ ଫାଟକ ପାଖରେ ଗୁଳି ଫୁଟାଇ ବ୍ୟବସାୟୀଙ୍କଠାରୁ ଲୁଟ୍ପାଟ୍ କରିଥିଲା । ଘଟଣା ପରଠୁ ପୁଲିସ ମଙ୍ଗୁକୁ ଖୋଜୁଥିଲା । ଶୁକ୍ରବାର ତାକୁ ସଦର ଥାନା ଅଞ୍ଚଳରେ ଧରିବା ପାଇଁ ଉଦ୍ୟମ କଲା ବେଳେ ସେ ପୁଲିସ ଉପରକୁ ଗୁଳି ଚଳାଇଥିଲା । ସେହି ସମୟରେ ପୁଲିସର ପାଲଟା ଗୁଳିରେ ମଙ୍ଗୁ ଆହତ ହୋଇଥିବା ଏଡିସିପି ଅନୀଲ ମିଶ୍ର ସୂଚନା ଦେଇଛନ୍ତି । ତେବେ ମଙ୍ଗୁ ପୂର୍ବରୁ ମଧ୍ୟ ସଦର ଥାନା ପୁଲିସ ଦ୍ୱାରା ଥରେ ଏନ୍କାଉଣ୍ଟରର ଶିକାର ହୋଇଥିଲା । ଦ୍ୱିତୀୟ ଥର ପାଇଁ ସେ ପୁଲିସ ଗୁଳି ଖାଇଛି ।
ମଙ୍ଗୁ ଶୁକ୍ରବାର ସଦର ଥାନା ଅନ୍ତର୍ଗତ ଉତ୍ତମାପୁର ଅଞ୍ଚଳରେ ଏକ ବାଇକ୍ ନେଇ ଯାଉଥିବା ସଂପର୍କରେ କଟକ ପୁଲିସକୁ ସୂଚନା ମିଳିଥିଲା । ଏହା ପରେ କନ୍ଦରପୁର ଥାନା ଓ ସ୍ପେସାଲ୍ ସ୍କ୍ୱାଡ୍ ପୁଲିସର ଏକ ମିଳିତ ଟିମ୍ ତାକୁ ପିଛା କରିଥିଲା । ଉତ୍ତମାପୁର ତୋଟା ପାଖରେ ପୁଲିସ ଟିମ୍ ତାକୁ ଅଟକାଇବା ପାଇଁ ଉଦ୍ୟମ କରିଥିଲା । ମାତ୍ର ସେ ଖସିଯିବା ପାଇଁ ଗୋଟିଏ ରାଉଣ୍ଡ୍ ଗୁଳି ପୁଲିସ ଟିମ୍ ଉପରକୁ ଚଳାଇଥିଲା । ଜୀବନ ବଞ୍ଚାଇବା ପାଇଁ କନ୍ଦରପୁର ଥାନା ଅଧିକାରୀ ବିପିନ ହୋତା ଏକ ରାଉଣ୍ଡ୍ ଗୁଳି ଚଳାଇଥିଲେ ଯାହାକି ମଙ୍ଗୁର ଗୋଡ଼ରେ ବାଜିଥିଲା । ଏହାପରେ ସେ ତଳେ ପଡ଼ିଯାଇଥିଲା । ପୁଲିସ ଟିମ୍ ତୁରନ୍ତ ମଙ୍ଗୁକୁ କାବୁ କରିନେଇଥିଲା । ଗୋଡ଼ରେ ଗୁଳି ମାଡ଼ ହୋଇଥିବାରୁ ତାକୁ ଏସ୍ସିବି ମେଡ଼ିକାଲ୍ କାଜୁଆଲ୍ଟି ଅଣାଯାଇ ସେଠାରେ ତାର ଚିକିତ୍ସା ଜାରି ରହିଛି । ମଙ୍ଗୁ ହେଉଛି ଦୁର୍ଦ୍ଦାନ୍ତ ଅପରାଧୀ ଗ୍ୟାଙ୍ଗ୍ଷ୍ଟର କନ୍ଦରପୁର ନିକଟ ନିମେଇସାପୁରର ପ୍ରଶାନ୍ତ ଦାସ ଓରଫ ତପୁର ସହଯୋଗୀ । ତା’ ନାଁରେ ପୂର୍ବରୁ ୧୦ରୁ ଅଧିକ ସଙ୍ଗିନ ମାମଲା ରହିଛି । ଗତ ୬ ତାରିଖ ଦିନ ସ୍ଥାନୀୟ ହାଟସାହିର ବ୍ୟବସାୟୀ ବିକାଶ ଚନ୍ଦ୍ର ପାତ୍ରଙ୍କଠାରୁ ୪ ଜଣ ଦୁର୍ବୃତ୍ତ ଲୁଟ୍ପାଟ୍ କରିଥିଲେ । ଏଥିରେ ମଙ୍ଗୁ ଓ ଅନ୍ୟ ତିନି ଜଣ ପେସାଦାର ଅପରାଧୀ ସାମିଲ ଥିଲେ ।
ଅଖିଳେଶ୍ୱର ସିଂହ କଟକ ଡିସିପି ଥିବା ବେଳେ ମଙ୍ଗୁକୁ ସଦର ଥାନା ପୁଲିସ ଏନ୍କାଉଣ୍ଟର କରିଥିଲା । ପ୍ରତାପନଗରୀ ଧାକୁଲେଇ ମନ୍ଦିର ପାଖରେ ହୋଲି ଖେଳ ସାରି କିଛି ସ୍ଥାନୀୟ ଲୋକ ଆସୁଥିବା ବେଳେ ସେଠାରେ ହଠାତ୍ ବଚସା ହେବାରୁ ମଙ୍ଗୁ ଓ ତପୁ ପ୍ରତାପନଗରୀର ଦୁଇ ଜଣଙ୍କ ଉପରକୁ ଗୁଳିମାଡ଼ କରିଥିଲେ । ଏହି ଘଟଣା ପରେ ପୁଲିସ ଟିମ୍ ମଙ୍ଗୁ ଓ ତପୁକୁ ଧରିବା ସମୟରେ ସେତେବେଳେ ଏନ୍କାଉଣ୍ଟର କରିଥିଲେ ।
