ନୂଆଦିଲ୍ଲୀ ୩୧/୦୧: ବଲିଉଡ୍ର ଚର୍ଚ୍ଚିତ ଯୋଡ଼ି ପୁଲକିତ ସମ୍ରାଟ ଓ କୃତି ଖରବନ୍ଦାଙ୍କର ନିର୍ବନ୍ଧ ସମ୍ପନ୍ନ ହୋଇଛି । ପୁଲକିତ ନିଜ ଇନ୍ଷ୍ଟାଗ୍ରାମ୍ରେ ଫଟୋ ଶେୟାର କରିବା ପରଠୁ ଏହି ଖବର ଭାଇରାଲ ହେଉଛି । ଦୀର୍ଘ ଦିନରୁ ଏହି କପଲ୍ ପରସ୍ପରକୁ ଡେଟିଂ କରୁଥିଲେ ହେଁ, ବିବାହ ବିଷୟରେ ଅଦ୍ୟାବଧି ମୁହଁ ଖୋଲିନାହାନ୍ତି । ଫଟୋରେ ପୁଲକିତ ଓ କୃତିଙ୍କୁ ପାରମ୍ପରିକ ପୋଷାକରେ ଦେଖିବାକୁ ମିଳିଛି । ପରିବାର ସଦସ୍ୟ ଓ ବନ୍ଧୁଙ୍କ ଗହଣରେ ପୁଲକିତ କୃତିଙ୍କୁ ଧରିଥିବା ଖୁସିର ମୁହୂର୍ତ୍ତ ଶେୟାର କରିଛନ୍ତି । ଉଭୟଙ୍କ ଆଙ୍ଗୁଳିରେ ନିର୍ବନ୍ଧ ମୁଦି ସ୍ପଷ୍ଟ ଦେଖାଯାଉଛି । ଏଥିରୁ ଫ୍ୟାନ୍ ଉଭୟଙ୍କ ନିର୍ବନ୍ଧ ବିଷୟରେ ଅନୁମାନ କରୁଛନ୍ତି ।
ଫିଲ୍ମ ‘ପାଗଲପନ୍ତି’ ସେଟ୍ରେ ପୁଲକିତ-କୃତିଙ୍କ ପ୍ରେମ କାହାଣୀ ଆରମ୍ଭ ହୋଇଥିଲା । ସେବେଠୁ ଉଭୟ ଏକାଠି ଅଛନ୍ତି । ଫିଲ୍ମ ‘ବୀରେ କି ୱେଡିଂ’ ଓ ‘ତାଇଶ’ରେ ଉଭୟ ସ୍କ୍ରିନ୍ ଶେୟାର କରିଥିଲେ । ଗତ ଡିସେମ୍ବରରେ ପୁଲକିତଙ୍କ ୪୦ତମ ଜନ୍ମଦିନ ଅବସରରେ କୃତି ସୋସିଆଲ ମିଡିଆରେ ଏକ ବାର୍ତ୍ତା ଜରିଆରେ ତାଙ୍କ ପ୍ରତି ସ୍ନେହ ଓ ଭଲପାଇବା ଶେୟାର କରିଥିଲେ । ନିକଟରେ ଫିଲ୍ମ ‘ଫୁକ୍ରେ୩’ରେ ପୁଲକିତ ବଡ଼ ପରଦାରେ ନଜର ଆସିଥିଲେ । ସେପଟେ କୃତି ନିଜର ଅପ୍କମିଙ୍ଗ ଫିଲ୍ମ ‘ରିସ୍କି ରୋମିଓ’ର ରିଲିଜ୍କୁ ଅପେକ୍ଷା କରିଛନ୍ତି । ଅବିର ସେନଗୁପ୍ତାଙ୍କ ନିର୍ଦ୍ଦେଶିତ ଏହି ଫିଲ୍ମ ଆସନ୍ତା ମେ’ ମାସରେ ମୁକ୍ତିଲାଭ କରିବ । ଏଥିରେ ତାଙ୍କ ସହ ସନ୍ନି ସିଂହ ମୁଖ୍ୟ ଭୂମିକାରେ ନଜର ଆସିବେ ।
