ପାଟନା: ବିହାର ମୁଖ୍ୟମନ୍ତ୍ରୀ ନୀତୀଶ କୁମାରଙ୍କ ବିରୋଧରେ ଅଶୋଭନୀୟ ଟିପ୍ପଣୀ କରିଥିବା ଅଭଯୋଗରେ ବିଧାନ ପରିଷଦରୁ ଏମଏଲସି ରାମବଲି ସିଂହ ଚନ୍ଦ୍ରବଂଶୀଙ୍କୁ ଅଯୋଗ୍ୟ ଘୋଷଣା କରାଯାଇଛି । ରାମବଲି ଆରଜେଡି ମୁଖ୍ୟ ଲାଲୁ ପ୍ରସାଦ ଯାଦବଙ୍କ ଉପରେ ମଧ୍ୟ ବିବାଦୀୟ ଟିପ୍ପଣୀ ଦେଇଥିଲେ । ଆରଜେଡିର ସଚେତକ ସୁନୀଲ କୁମାରଙ୍କ ଅଭିଯୋଗ କ୍ରମେ ବିଧାନ ପରିଷଦର ସଭାପତି ଦେବେଶ ଚନ୍ଦ୍ର ଠାକୁର ଏମଏଲସି ରାମବଲି ସିଂହଙ୍କୁ ଅଯୋଗ୍ୟ ଘୋଷଣା କରିଛନ୍ତି ।

ସୁନୀଲ କୁମାର ସିଂହ ଅଭିଯୋଗ ଆଣିଥିଲେ ଯେ, ରାମବଲି ସିଂହ ରାଷ୍ଟ୍ରୀୟ ଜନତା ଦଳ (ଆରଜେଡି)ର ସଦସ୍ୟ ହୋଇ ମଧ୍ୟ ତେଜସ୍ବୀ ଯାଦବଙ୍କ ଉପରେ ଅଭିଯୋଗ ଆଣିଥିଲେ । ତେଜସ୍ବୀ ଯାଦବ ମଦ ପିଅନ୍ତି ବୋଲି କହିଥିଲେ ରାମବଲି । ଏହା ସହ ପଛୁଆ ବର୍ଗଙ୍କୁ ଭାଗ କରିବାକୁ ଚେଷ୍ଟା କରାଯାଉଛି ବୋଲି ଅଭିଯୋଗ କରିବା ସହ ଏହା ବିରୋଧରେ ଦଳୀୟ ପତାକା ଲଗାଇ ରାଲି କରିଥିଲେ ରାମବଲି । ନୀତୀଶ କୁମାରଙ୍କ ସରକାର ଜାତିଗତ ଜନଗଣନାରେ ଗଡ଼ବଡ଼ କରିଥିବା ନେଇ ମଧ୍ୟ ରାମବଲି ଅଭିଯୋଗ କରିଥିଲେ । 

ସୂଚନାଯୋଗ୍ୟ, ୨ ନଭେମ୍ବର ୨୦୨୩ରେ ରାମବଲିଙ୍କ ସଦସ୍ୟତା ରଦ୍ଦ ଲାଗି ସୁନୀଲ ସିଂହ ବିଧାନ ପରିଷଦରେ ଆବେଦନ କରିଥିଲେ । ଏହା ପରେ ୧୫ ଡିସେମ୍ବରରେ ରାମବଲି ସିଂହ ଚନ୍ଦ୍ରବଂଶୀ ଏନେଇ ବିଧାନ ପରିଷଦ ଅଧ୍ୟକ୍ଷଙ୍କୁ ସ୍ପଷ୍ଟୀକରଣ ଦେଇଥିଲେ । ପରେ ଅଧ୍ୟକ୍ଷ ଦେବେଶ ଚନ୍ଦ୍ର ଠାକୁର ମାମଲାର ଶୁଣାଣି କରିଥିଲେ । ଆଉ ଏବେ ୬ ଫେବୃଆରୀରେ ନିଷ୍ପତ୍ତି ଶୁଣାଇବା ସହ ଏନେଇ ପତ୍ର ମଧ୍ୟ ଜାରି କରିଛନ୍ତି ବିଧାନ ପରିଷଦ ଅଧ୍ୟକ୍ଷ ।