ବେଙ୍ଗାଲୁରୁ: ଗୁରୁବାର ଖେଳାଯାଇଥିବା ବିଶ୍ୱକପ ମୁକାବିଲାରେ ଶ୍ରୀଲଙ୍କାକୁ ୫ ଓ୍ବିକେଟରେ ହରାଇଛି ନ୍ୟୁଜିଲାଣ୍ଡ । ନ୍ୟୁଜିଲାଣ୍ଡ ୫ ୱିକେଟ ହରାଇ ମାତ୍ର ୨୩.୨ ଓଭରରେ ୧୭୨ ରନ୍ କରି ମ୍ୟାଚ୍ ଜିତିନେଇଛି । ଆଜିର ମ୍ୟାଚରେ ନ୍ୟୁଜିଲାଣ୍ଡ ବ୍ୟାଟର ରଚିନ ରବୀନ୍ଦ୍ର ଏକ ବଡ଼ ରେକର୍ଡ କରିଛନ୍ତି । ବିଶ୍ବକପର ଡେବ୍ୟୁ ସିଜନ୍ରେ ସବୁଠୁ ଅଧିକ ରନ୍ କରିଛନ୍ତି ରଚିନ ରବୀନ୍ଦ୍ର । ସେ ଇଂଲଣ୍ଡର ଜନି ବେୟରଷ୍ଟୋଙ୍କୁ ପଛରେ ପକାଇ ଦେଇଛନ୍ତି ।
୨୦୧୯ ଦିନିକିଆ ବିଶ୍ବକପରେ ଡେବ୍ୟୁ କରିଥିବା ବେଳେ ଜନି ବେୟରଷ୍ଟୋ ସର୍ବାଧିକ ରନ୍ ସ୍କୋର କରିଥିଲେ । କିନ୍ତୁ ଏବେ ରଚିନ ରବୀନ୍ଦ୍ର ଡେବ୍ୟୁ ସିଜନରେ ସର୍ବାଧିକ ରନ୍ କରିପାରିଛନ୍ତି । ରଚିନ ରବୀନ୍ଦ୍ର ପୂର୍ବତନ ଭାରତୀୟ ବ୍ୟାଟର ସଚିନ ତେନ୍ଦୁଲକରଙ୍କ ରେକର୍ଡ ମଧ୍ୟ ଭାଙ୍ଗି ଦେଇଛନ୍ତି । ଇଂଲଣ୍ଡ ବ୍ୟାଟର ଜନି ବେୟରଷ୍ଟୋ ୨୦୧୯ ବିଶ୍ବକପରେ ୫୩୨ ରନ୍ କରିଥିଲେ । ହେଲେ ୯ଟି ଲିଗ୍ ମ୍ୟାଚରେ ରଚିନ ରବୀନ୍ଦ୍ର ୭୦.୬୨ ଆଭେରେଜ୍ ସହ ୧୦୮.୪୫ ଷ୍ଟ୍ରାଇକ ରେଟ୍ରେ ୫୬୫ ରନ୍ କରିସାରିଛନ୍ତି ।
ସେପଟେ ଶ୍ରୀଲଙ୍କାକୁ ହରାଇ ନ୍ୟୁଜିଲାଣ୍ଡ ବିଶ୍ବକପ୍ ସେମିଫାଇନାଲରେ ଏକପ୍ରକାର ପ୍ରବେଶ କରିସାରିଛି । ଆଜିର ମ୍ୟାଚରେ ରବୀନ୍ଦ୍ର ଶ୍ରୀଲଙ୍କା ବିପକ୍ଷରେ ଏହି ରେକର୍ଡ ନିଜ ନାଁରେ କରିଛନ୍ତି । ୩୪ ବଲରେ ୩ ଚୌକା ଏବଂ ୩ ଛକା ସହ ୪୨ ରନ୍ କରିଥିଲେ ରଚିନ ରବୀନ୍ଦ୍ର । ୫୬୫ ରନ୍ ସହ ଚଳିତ ବିଶ୍ବକପରେ ସର୍ବାଧିକ ରନ କରିବାରେ ସଫଳ ହୋଇଛନ୍ତି ରଚିନ ରବୀନ୍ଦ୍ର । ଚଳିତ ଟୁର୍ଣ୍ଣାମେଣ୍ଟରେ ରବୀନ୍ଦ୍ର ୪ଟି ଶତକ ହାସଲ କରିସାରିଛନ୍ତି ।
ଅନ୍ୟପଟେ ୨୩ ବର୍ଷୀୟ ରଚିନ ପୂର୍ବତନ ଭାରତୀୟ ବ୍ୟାଟର ସଚିନଙ୍କୁ ପଛରେ ପକାଇ ଦେଇଛନ୍ତି । ସଚିନ ତେନ୍ଦୁଲକର ୧୯୯୬ ବିଶ୍ୱକପ୍ରେ ୨୫ ବର୍ଷ ହେବା ପୂର୍ବରୁ ସେ ୫୨୩ ରନ୍ ସ୍କୋର କରିଥିଲେ । ତେବେ ରଚିନ ରବୀନ୍ଦ୍ର ୨୫ ବର୍ଷ ପୂର୍ବରୁ ଗୋଟିଏ ଓ୍ବାର୍ଲଡ କପ୍ ସିଜନ୍ରେ ୫୬୫ ରନ୍ କରିଛନ୍ତି । ସେହିଭଳି ବିଶ୍ୱକପ୍ରେ ଡେବ୍ୟୁ ପ୍ଲେୟାର ଭାବେ ଗୋଟିଏ ସଂସ୍କରଣରେ ସର୍ବାଧିକ ୪୬୧ ରନ୍ କରିଥିଲେ ଭାରତର ରାହୁଲ ଦ୍ରାବିଡ଼ । ସେ ୧୯୯୯ ମସିହାରେ ଏହି ରେକର୍ଡ କରିଥିଲେ ।
