କେବେ ଦୌଡ଼ିବ ବୁଲେଟ୍ ଟ୍ରେନ୍ ? ବଡ଼ ସୂଚନା ଦେଲେ ରେଳ ମନ୍ତ୍ରୀ ଅଶ୍ବିନୀ ବୈଷ୍ଣବ
![](https://odia.prameya.com/prameya/document/post/2/2_153_1701266292040.webp)
Image Courtesy: indianexpress
ନୂଆଦିଲ୍ଲୀ: ଖୁବଶୀଘ୍ର ବୁଲେଟ ଟ୍ରେନ୍ ସ୍ବପ୍ନ ସତ ହେବାକୁ ଯାଉଛି । ବୁଧବାର ରେଳ ମନ୍ତ୍ରୀ ଅଶ୍ବିନୀ ବୈଷ୍ଣବ ବଡ଼ ସୂଚନା ଦେଇଛନ୍ତି । ୨୦୨୬ ଅଗଷ୍ଟରେ ଗୁଜରାଟରେ ନିର୍ମାଣ ହେଉଥିବା ବୁଲେଟ ଟ୍ରେନ ସେକ୍ସନର କାର୍ଯ୍ୟ ଶେଷ ହେବ । ବିଲିମୋରାରୁ ସୁରଟ ମଧ୍ୟରେ ୫୦ କିଲୋମିଟର ରୁଟ୍ ନିର୍ମାଣ କାର୍ଯ୍ୟ ସରିବ ବୋଲି ରେଳ ମନ୍ତ୍ରୀ କହିଛନ୍ତି । ଏହା ବ୍ୟତୀତ ଦେଶରେ ରେଳ ନେଟଓ୍ବର୍କକୁ ନେଇ ବହୁ ଯୋଜନା ରହିଛି ବୋଲି ମଧ୍ୟ ସେ କହିଛନ୍ତି ।
ଓଡ଼ିଶାର ବାଲେଶ୍ବରସ୍ଥିତ ବାହାନଗା ଟ୍ରେନ୍ ଟ୍ରାଜେଡି ପରେ ଭାରତୀୟ ରେଳ ପକ୍ଷରୁ କବଚ ସିଷ୍ଟମ କାର୍ଯ୍ୟକ୍ଷମ ହେବା ଉପରେ ମଧ୍ୟ ଅଶ୍ବିନୀ ବୈଷ୍ଣବ କହିଛନ୍ତି । ଟ୍ରେନ-ଟ୍ରେନ୍ ମଧ୍ୟରେ ଧକ୍କା ରୋକିବା ପାଇଁ ଏହି ସିଷ୍ଟମକୁ ବିକଶିତ କରାଯାଇଛି । ସେପଟେ ହାତୀ ମୃତ୍ୟୁ ରୋକିବା ଲାଗି ଆସିବାକୁ ଥିବା ଗଜରାଜ ସିଷ୍ଟମ ଉପରେ କାର୍ଯ୍ୟ କେତେ ଆଗେଇଛି ତା ଉପରେ ମଧ୍ୟ ସୂଚନା ଦେଇଛନ୍ତି କେନ୍ଦ୍ରମନ୍ତ୍ରୀ ।
ଅନ୍ୟପକ୍ଷରେ ଭାରତରେ ରେଳ ସଂଖ୍ୟା ବୃଦ୍ଧି ପାଇଛି ବୋଲି ସେ କହିଛନ୍ତି । ୧୭୬୮ ମେଲ୍/ଏକ୍ସପ୍ରେସ ଗଡ଼ୁଥିବା ବେଳେ ଏବେ ଏହାର ସଂଖ୍ୟା ୨,୧୨୪ରେ ପହଞ୍ଚିଛି । ସେହିଭଳି ପାସେଞ୍ଜର ଟ୍ରେନ ସଂଖ୍ୟା ୨୭୯୨ରୁ ୨୮୫୬କୁ ବୃଦ୍ଧି ପାଇଛି । ୨୦୨୨/୨୩ରେ ଭାରତୀୟ ରେଳଯାତ୍ରୀଙ୍କ ସଂଖ୍ୟା ୬୪୦ କୋଟି ଥିବା ବେଳେ ୨୦୨୩/୨୪ରେ ଏହି ସଂଖ୍ୟା ୭୫୦ କୋଟି ଟପିବ ବୋଲି ଆଶା କରାଯାଉଛି । ତେବେ ବିଲିମୋରା-ସୁରଟ ବୁଲେଟ ଟ୍ରେନ ସେକ୍ସନ ମୁମ୍ବାଇରୁ ଅହମ୍ମଦାବାଦ କରିଡରର ଏକ ଅଂଶ ବୋଲି କହିଥିଲେ ରେଳ ମନ୍ତ୍ରୀ ।
ଅନ୍ୟପଟେ ଗୁଜରାଟର ୫ଟି ଜିଲ୍ଲା ମଧ୍ୟରେ ଭାୟାଡକ୍ଟ (ବୁଲେଟ ଟ୍ରେନ୍ ପାଇଁ ରୁଟ) ନିର୍ମାଣ କାର୍ଯ୍ୟ ୨୦୨୬ରେ ଶେଷ ହେବ ବୋଲି ସୂଚନା ଦେଇଛନ୍ତି ଅଶ୍ବିନୀ ବୈଷ୍ଣବ । ଏହା ସହ ୬ଟି ନଦୀ ଉପରେ ପୋଲ ମଧ୍ୟ ନିର୍ମାଣ କାର୍ଯ୍ୟ ଜାରି ରହିଛି । ମୁମ୍ବାଇ-ଅହମ୍ମଦାବାଦ କରିଡର ଲାଗି ନଭେମ୍ବର ୨୦୨୧ରେ କାର୍ଯ୍ୟ ଆରମ୍ଭ ହୋଇଥିବା ବେଳେ ନିରନ୍ତର ଭାବେ ଆଗେଇ ଚାଲିଛି ବୋଲି ରେଳ ମନ୍ତ୍ରୀ ସୂଚନା ଦେଇଛନ୍ତି ।
ଏହି ପ୍ରୋଜେକ୍ଟ ପାଇଁ ପ୍ରାୟ ୧.୦୮ ଲକ୍ଷ କୋଟି ଖର୍ଚ୍ଚ ହେବ । ଏଥିମଧ୍ୟରୁ କେନ୍ଦ୍ର ସରକାର ୧୦ ହଜାର କୋଟ ଦେବାକୁ ଥିବା ବେଳେ ଗୁଜରାଟ ଏବଂ ମହାରାଷ୍ଟ୍ର ସରକାର ୫ ହଜାର କୋଟି ଲେଖାଏଁ ଦେବେ। ଆଉ ବାକି ଅର୍ଥ ୦.୧ ପ୍ରତିଶତ ସୁଧରେ ଜାପାନରୁ ଋଣ ଆଣିବେ ସରକାର ।