ଭୁବନେଶ୍ୱର,୦୬/୧୧: ରେଞ୍ଜ ରୋଭର ଧକ୍କାରେ ଲୋପାମୁଦ୍ରା ସାହୁଙ୍କ ମୃତ୍ୟୁ ପରେ ଘଟଣାକୁ ନେଇ ଚାରିଆଡୁ ପ୍ରତିବାଦ ସ୍ୱର ଉଠିବାରେ ଲାଗିଛି । ମୃତକଙ୍କ ପରିବାରକୁ ୫୦ ଲକ୍ଷ ଟଙ୍କା କ୍ଷତିପୂରଣ ହେବାକୁ ରାଜ୍ୟ ବିଜେପି ଦାବି କରିଛି । ସେହିପରି ଜାତୀୟ ମାନବ ଅଧିକାର ଆୟୋଗ(ଏନ୍ଏଚ୍ଆର୍ସି) ରେ ଏକ ମାମଲା ରୁଜୁ ହୋଇଛି ।
ବିଜେପି ମୁଖପାତ୍ର ମନୋଜ ମହାପାତ୍ର କହିଛନ୍ତି, ଦୁର୍ଘଟଣାଟି ଏକ ହିଟ୍ ଆଣ୍ଡ ରନ୍ ମାମଲା । କିନ୍ତୁ କ୍ୟାପିଟାଲ ଥାନା ପୁଲିସ ମାମଲାକୁ ଚାପିବାକୁ ଯଥାସମ୍ଭବ ଚେଷ୍ଟା କରିଥିଲା । ଏମିତିକି ଜଣେ ସ୍ୱର୍ଗତ ପୂର୍ବତନ ମନ୍ତ୍ରୀଙ୍କ ପୁଅକୁ ବଞ୍ଚାଇବାକୁ ଯାଇକି କାର ନମ୍ବର ବଦଳାଇବାକୁ ଚେଷ୍ଟା କରିଥିଲା । ପୁଲିସ ତୁରନ୍ତ ଏକ ଫୌଜଦାରୀ ମାମଲା ରୁଜୁ କରି ଦୋଷୀଙ୍କୁ ଗିରଫ କରୁ । ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠିରୁ ମୃତକଙ୍କ ପରିବାରବର୍ଗକୁ ତୁରନ୍ତ ୫୦ ଲକ୍ଷ ଟଙ୍କା ସହାୟତା ଦିଆଯାଉ । ‘ନ୍ୟାୟ ପାଇଁ ଲଢେଇ ପରିବାର’ ପକ୍ଷରୁ ରବିବାର ଏକ ପିଟିସନ ଦାଖଲ ହୋଇଛି । ଦୋଷୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନେବା ସହ ମୃତକଙ୍କ ପରିବାରକୁ ୫୦ ଲକ୍ଷ ଟଙ୍କା କ୍ଷତିପୂରଣ ଦେବାକୁ ପିଟିସନ ଯୋଗେ ଆୟୋଗଙ୍କୁ ନିବେଦନ କରାଯାଇଛି ।
ରାଜ୍ୟ ସଭାପତି ସୁବ୍ରତ କୁମାର ଦାଶ ପିଟିସନରେ ଉଲ୍ଲେଖ କରିଛନ୍ତି, ଗତ ୩୧ ତାରିଖରେ ଯାଜପୁର ଜିଲ୍ଲା ବରୀ ବ୍ଲକର ଲୋପାମୁଦ୍ରା ସାହୁ ଏବଂ ତାଙ୍କ ସମ୍ପର୍କୀୟ କାହ୍ନୁଚରଣ ନାୟକଙ୍କ ବାଇକ୍କୁ ଭୁବନେଶ୍ୱର ୟୁନିଟ ୮ ପାୱାର୍ ହାଉସ ଛକରେ ଦ୍ରୁତଗାମୀ ରେଞ୍ଜ ରୋଭର (ଓଡି୨୩କେ ୦୦୦୬) ଧକ୍କା ଦେଇଥିଲା । ୪ ଦିନ ମୃତ୍ୟୁ ସହିତ ସଂଗ୍ରାମ କରି ଲୋପାମୁଦ୍ରା ଜୀବନ ଯୁଦ୍ଧରେ ହାରିଗଲେ । କାହ୍ନୁଚରଣ ଏବେ ମୃତ୍ୟୁ ସହ ସଂଗ୍ରାମ କରୁଛନ୍ତି । ତାଙ୍କ ଚିକିତ୍ସା ବାବଦରେ ସମସ୍ତ ଅର୍ଥ ଯୋଗାଇବାକୁ ପିଟିସନରେ ଉଲ୍ଲେଖ କରାଯାଇଛି ।
