ନୂଆଦିଲ୍ଲୀ: ନିକଟରେ ଅଷ୍ଟ୍ରେଲିଆ ବପକ୍ଷରେ ଖେଳାଯାଇଥିବା ଟି-୨୦ ସିରିଜ୍ରେ ଭାରତୀୟ ଟିମ୍ ବିଜୟ ହାସଲ କରିଥିଲା । ୫ ମ୍ୟାଚ୍ ବିଶିଷ୍ଟ ଏହି ସିରିଜ୍କୁ ଭାରତ ୪-୧ରେ କବଜା କରିଥିଲା । ସୂର୍ଯ୍ୟକୁମାର ଯାଦବଙ୍କ ନେତୃତ୍ବରେ ଭାରତୀୟ ଟିମ୍ ଅଷ୍ଟ୍ରେଲିଆ ଟିମ୍କୁ ପରାସ୍ତ କରିଥିଲା । ଭାରତ-ଅଷ୍ଟ୍ରେଲିଆ ଟି-୨୦ ସିରିଜ୍ ପରେ ଆଇସିସି ଟି-୨୦ ରାଙ୍କିଙ୍ଗ ଜାରି କରିଛି । ଆଉ ଏହି ତାଲିକାରେ ଭାରତୀୟ ଖେଳାଳି ବାଜିମାତ କରିଛନ୍ତି ।
ଲେଗ ସ୍ପିନର ରବି ବିଷ୍ଣୋଇ ଏବେ ବିଶ୍ବର ଏକ ନମ୍ବର ବୋଲରର ମାନ୍ୟତା ପାଇଛନ୍ତି । ଆଫିଗାନିସ୍ତାନର ରାଶିଦ ଖାନଙ୍କୁ ପଛରେ ପକାଇ ବିଷ୍ଣୋଇ ଶୀର୍ଷରେ ପହଞ୍ଚିଛନ୍ତି । ରାଶିଦ ଖାନ (ଦ୍ବିତୀୟ), ଆଦିଲ ରଶିଦ ଏବଂ ବାନିନ୍ଦୁ ହସରଙ୍ଗା (ମିଳିତ ଭାବେ ତୃତୀୟ) ଏବଂ ମହେଶ ତୀକ୍ଷଣା (ପଞ୍ଚମ)ଙ୍କ ରାଙ୍କ ଖସିଆସିବା ପରେ ରବି ବିଷ୍ଣୋଇଙ୍କୁ ଫାଇଦା ମିଳିଛି ।
ସେହିଭଳି ଭାରତୀୟ ସ୍ପିନର ଅକ୍ଷର ପଟେଲ ୧୧ଟି ସ୍ଥାନ ଉପରକୁ ଉଠି ୧୬ ତମ ସ୍ଥାନରେ ପହଞ୍ଚିଯାଇଛନ୍ତି । ଅନ୍ୟପଟେ ଟି-୨୦ ବ୍ୟାଟିଂ କଥା କହିଲେ ସୂର୍ଯ୍ୟକୁମାର ଯାଦବ ଏବେ ବି ଏକ ନମ୍ବର ସ୍ଥାନରେ ଅପରିବର୍ତ୍ତିତ ଅଛନ୍ତି । ଏହା ବ୍ୟତୀତ ଋତୁରାଜ ଗାଏକ୍ବାଡ ଶୀର୍ଷ ୧୦ ତାଲିକାରେ ଅଛନ୍ତି । ହେଲେ ସେ ଗୋଟିଏ ରାଙ୍କ ତଳକୁ ଖସି ସପ୍ତମ ସ୍ଥାନରେ ରହିଛନ୍ତି । ଯୁବ ବ୍ୟାଟର ଯଶସ୍ବୀ ଜୟସ୍ବାଲ ୧୬ଟି ପାହାଚ ଚଢ଼ି ୧୯ ତମ ସ୍ଥାନକୁ ଆସିଛନ୍ତି ।
ସେପଟେ ଅଲରାଉଣ୍ଡର ଭାବେ ହାର୍ଦ୍ଦିକ ପାଣ୍ଡ୍ୟା ତୃତୀୟ ସ୍ଥାନରେ ଅପରିବର୍ତ୍ତିତ ରହିଛନ୍ତି । ୨୦୨୩ ବିଶ୍ବକପରେ ବାଂଲାଦେଶ ବିପକ୍ଷ ମ୍ୟାଚ୍ରେ ସେ ଆହତ ହେବା ପରେ ଆଉ କ୍ରିକେଟ ଖେଳିନାହାନ୍ତି । ତେବେ ରବି ବିଷ୍ଣୋଇ ଏବେ ସୁଦ୍ଧା ଭାରତ ପାଇଁ ଗୋଟିଏ ଦିନିକିଆ ଏବଂ ୨୧ଟି ଟି-୨୦ ମ୍ୟାଚ୍ ଖେଳିସାରିଛନ୍ତି । ଦିନିକିଆରେ ରବି ଗୋଟିଏ ଏବଂ ଟି-୨୦ରେ ୩୪ଟି ଓ୍ବିକେଟ ନେଇଛନ୍ତି । ଆଗାମୀ ଟି-୨୦ ବିଶ୍ବକପ୍ ଓ୍ବେଷ୍ଟ ଇଣ୍ଡିଜ୍ ଏବଂ ଆମେରିକାରେ ହେବାକୁ ଯାଉଛି । ସେଠାରେ ଭାରତୀୟ ସ୍ପିନର୍ସଙ୍କ ଆବଶ୍ୟକତା ରହିଥିବା ବେଳେ ଭଲ ପ୍ରଦର୍ଶନ ଜାରି ରଖିଲେ ରବି ବିଷ୍ଣୋଇଙ୍କୁ ଟିମ୍ରେ ସ୍ଥାନ ମିଳିପାରେ ।
