କୋଣାର୍କ, ୨୫/୦୨: ରବିବାର କୋଣାର୍କ ସୂର୍ଯ୍ୟ ମନ୍ଦିରରେ ପର୍ଯ୍ୟଟକଙ୍କୁ ହଟହଟା ହେବାକୁ ପଡ଼ିଛି । ଅଧିକାଂଶ ପର୍ଯ୍ୟଟକ ମନ୍ଦିର ବୁଲି ନ ପାରି ନିରାଶ ହୋଇ ଫେରି ଯାଇଛନ୍ତି । ଏଏସ୍ଆଇର ଅବହେଳା ଯୋଗୁଁ ଏଭଳି ସ୍ଥିତି ଉପୁଜିଥିବା ଅଭିଯୋଗ କରିଛନ୍ତି ଦୂରଦୂରାନ୍ତରୁ ଆସିଥିବା ପର୍ଯ୍ୟଟକ ।

ସୂର୍ଯ୍ୟ ମନ୍ଦିରରେ ପର୍ଯ୍ୟାପ୍ତ ପରିମାଣରେ ଟିକେଟ ନମିଳିବାରୁ ଘଣ୍ଟା ଘଣ୍ଟା ଧରି ଟିକେଟ୍ କାଉଣ୍ଟର ବନ୍ଦ ହୋଇ ରହିଥିଲା । ଛୁଟି ଦିନ ଥିବାରୁ ଲମ୍ବିଥିଲା ପର୍ଯ୍ୟଟକଙ୍କ ଲମ୍ବା ଧାଡ଼ି । ମୁଖ୍ୟ ଦ୍ୱାର ବନ୍ଦ ରହିଥିବାରୁ ଅନଲାଇନ୍ ଟିକେଟ୍ କରିଥିଲେ ବି ପର୍ଯ୍ୟଟକ ଭିତରକୁ ଯାଇ ପାରି ନଥିଲେ । ଅସନ୍ତୋଷ ପ୍ରକାଶ କପି କେତେକ ପର୍ଯ୍ୟଟକ ନିରାଶ  ହୋଇ ଫେରି ଯାଇଥିବା ବେଳେ ଦେଖା ଦେଇ ନଥିଲେ ଅଧିକାରୀ ।

ପର୍ଯ୍ୟଟକଙ୍କ ମଧ୍ୟରେ ଆକ୍ରୋଶ ପ୍ରକାଶ ପାଇଥିଲା । ସୂର୍ଯ୍ୟମନ୍ଦିର ମୁଖ୍ୟଦ୍ୱାର ଓ ପ୍ରବେଶ ପଥକୁ ସୁରକ୍ଷାକର୍ମୀ ବନ୍ଦ କରିଥିବାରୁ ପର୍ଯ୍ୟଟକ ଠେଲା ପେଲା କରିଥିଲେ । କୋଣାର୍କ ପୁଲିସ ପହଞ୍ଚି ବୁଝାସୁଝା କରିଥିଲା । ପର୍ଯ୍ୟଟକଙ୍କ ସଂଖ୍ୟା ବଢ଼ିଥିବା ବେଳେ ଏଏସ୍ଆଇ ପାଖରେ ପର୍ଯ୍ୟାପ୍ତ ପରିମାଣରେ ଟୋକନ ନଥିବା ଜଣାପଡ଼ିଛି ।

ଏସଏ୍ଆଇର ଅପାରଗତା ଓ ତ୍ରୁଟିପୂର୍ଣ୍ଣ ପରିଚାଳନ ଯୋଗୁଁ ପ୍ରତିବର୍ଷ ପର୍ଯ୍ୟଟନ ଋତୁରେ ଏଭଳି ପରିସ୍ଥିତି ସୃଷ୍ଟି ହେଉଥିବା ଅଭିଯୋଗ ଆଣିଛନ୍ତି ଅଞ୍ଚଳବାସୀ ଓ ପର୍ଯ୍ୟଟକ । ଏଥିପ୍ରତି ବିଭାଗ ଦୃଷ୍ଟି ଦେବାକୁ ସାଧାରଣରେ ଦାବି ହେଉଛି ।