କଟକ,୦୯/୦୨: ଏସ୍ସିବି ମେଡିକାଲ୍ କଲେଜ ଓ ହସ୍ପିଟାଲ୍ ଇତିହାସରେ ଆଉ ଏକ ନୂଆ ସଫଳତା ଯୋଡ଼ି ହୋଇଛି । କିଡ୍ନୀ ପ୍ରତିରୋପିତ ଜଣେ ମହିଳା ଗୁରୁବାର ଏକ ଶିଶୁ କନ୍ୟାକୁ ଜନ୍ମ ଦେଇଛନ୍ତି । ଏଭଳି ଘଟଣା ଏସ୍ସିବି ମେଡିକାଲ୍ ଇତିହାସରେ ପ୍ରଥମ ଥର ଘଟିଛି । ମହିଳା କିଡ୍ନୀ ରୋଗୀଙ୍କ କ୍ଷେତ୍ରରେ ଗର୍ଭଧାରଣର କ୍ଷମତା ପ୍ରାୟତଃ ନଥାଏ । ମାତ୍ର ଏହି ମହିଳାଙ୍କର କିଡ୍ନୀ ପ୍ରତିରୋପଣ କରାଯିବା ସହିତ ତାଙ୍କ ସ୍ୱାସ୍ଥ୍ୟାବସ୍ଥାକୁ ସ୍ୱାଭାବିକ କରିବା ପାଇଁ ଡାକ୍ତର ଉଦ୍ୟମ କରିଥିଲେ । ଡାକ୍ତରମାନଙ୍କ ଏହି ଉଦ୍ୟମ ସଫଳ ହେବାରୁ ସମ୍ପୃକ୍ତ ମହିଳା ମାତୃତ୍ୱ ଲାଭ କରିଛନ୍ତି । ଏବେ ଉଭୟ ମା' ଓ ଶିଶୁକନ୍ୟା ସୁସ୍ଥ ଅଛନ୍ତି ।
ମିଳିଥିବା ସୂଚନା ଅନୁସାରେ, ବାଲେଶ୍ୱର ଖଇରା ଅଞ୍ଚଳର ୨୯ ବର୍ଷୀୟ ଯାଜ୍ଞସିନୀ ଜେନା କିଛି ବର୍ଷ ପୂର୍ବେ କିଡ୍ନୀ ରୋଗରେ ଆକ୍ରାନ୍ତ ହୋଇଥିଲେ । ୨୦୧୯ରେ ଏସ୍ସିବି ମେଡିକାଲ୍ରେ ତାଙ୍କର କିଡ୍ନୀ ପ୍ରତିରୋପଣ କରାଯାଇଥିଲା । ନେଫ୍ରୋଲୋଜି ବିଭାଗୀୟ ମୁଖ୍ୟ ଡାକ୍ତର ଅରୁଣା ଆଚାର୍ଯ୍ୟଙ୍କ କହିବା ମୁତାବକ, ମହିଳାମାନଙ୍କର କିଡ୍ନୀ ଖରାପ ହେଲେ ଋତୁସ୍ରାବ ଚକ୍ରରେ ଅନିୟମିତତା ଦେଖା ଦେଇଥାଏ । କିନ୍ତୁ ପ୍ରତିରୋପଣ ହେବା ପରେ ଏହା ଧିରେଧିରେ ସ୍ୱାଭାବିକ ହୋଇଥାଏ । ୨୦୨୦ ମସିହା ଶେଷ ଆଡ଼କୁ ତାଙ୍କ ଋତୁସ୍ରାବ ଚକ୍ର କ୍ରମଶଃ ସ୍ୱାଭାବିକ ହୋଇଥିଲା ।
୨୦୨୧ରେ ଯାଜ୍ଞସିନୀ ବିବାହ କରିଥିଲେ । ପରେ ଯାଜ୍ଞସିନୀ ନିୟମିତ ଡାକ୍ତରଙ୍କ ପରାମର୍ଶ ନେଉଥିଲେ । ଗର୍ଭଧାରଣ କ୍ଷମତାପ୍ରାପ୍ତ ନିମନ୍ତେ ଯାଜ୍ଞସିନୀଙ୍କ ଚିକିତ୍ସା କରାଯାଉଥିଲା । ପରେ ସେ ଗର୍ଭଧାରଣ କରିଥିଲେ । ଗୁରୁବାର ଯାଜ୍ଞସିନୀଙ୍କ ଅସ୍ତ୍ରୋପଚାର ନିମନ୍ତେ ସ୍ୱତନ୍ତ୍ର ଡାକ୍ତରୀ ଦଳ ଗଠନ ହୋଇଥିଲା । ସ୍ତ୍ରୀ ରୋଗ ଓ ପ୍ରସୂତି ବିଭାଗ, ଏଣ୍ଡୋକ୍ରାଇନୋଲାଜି, ନେଫ୍ରୋଲାଜି, ୟୁରୋଲୋଜି, କାର୍ଡିଓଲୋଜି ବିଭାଗର ଡାକ୍ତର ରହିଥିଲେ । ସ୍ତ୍ରୀ ରୋଗ ଓ ପ୍ରସୂତି ବିଭାଗର ବରିଷ୍ଠ ପ୍ରଫେସର ତଥା ପୂର୍ବତନ ଅଧୀକ୍ଷକ ଡାକ୍ତର ଲୁସି ଦାସ ଅସ୍ତ୍ରୋପଚାର କରିଥିଲେ । ଯାଜ୍ଞସିନୀ ଏବେ ସ୍ତ୍ରୀ ରୋଗ ଓ ପ୍ରସୂତି ବିଭାଗର କ୍ୟାବିନ୍ରେ ରହିଛନ୍ତି । ଶିଶୁ କନ୍ୟାକୁ ଏସ୍ଏନସିୟୁରେ ରଖାଯାଇଛି । ଉଭୟ ସୁସ୍ଥ ଅଛନ୍ତି ।
