ଜୋହାନ୍ସବର୍ଗ: ଗାଜାରେ ଇସ୍ରାଏଲ ସେନା ଲଗାତର ଆକ୍ରମଣ ଜାରି ରଖିଥିବା ବେଳେ ଏହାକୁ ଅନେକ ଦେଶ ବିରୋଧ କରୁଛନ୍ତି । ଏହି ତାଲିକାରେ ଦକ୍ଷିଣ ଆଫ୍ରିକା ମଧ୍ୟ ଯୋଡି ହୋଇଯାଇଛି । ଇସ୍ରାଏଲ ପଟୁ ଆକ୍ରମଣ ଲାଗି ଗାଜାରେ ଅନେକ ନୀରିହ ଲୋକ ଏବଂ ଛୋଟ ପିଲାଙ୍କ ମୃତ୍ୟୁ ହେଉଛି ବୋଲି ଅଭିଯୋଗ କରିବା ସହ ଇସ୍ରାଏଲ ବିରୋଧରେ କାର୍ଯ୍ୟାନୁଷ୍ଠାନ ସୂରୁପ ତେଲଅବିବରେ ଥିବା ନିଜର ସମସ୍ତ କୂଟନୀତିଜ୍ଞଙ୍କୁ ଫେରାଇ ନେବ ଦକ୍ଷିଣ ଆଫ୍ରିକା ।
ତେଲଅବିବରୁ ପ୍ରିଟୋରିଆ ଫେରିଯିବାକୁ ସମସ୍ତ ଦୂତାବାସ ଅଧିକାରୀଙ୍କ କୁହାଯାଇଥିବା ନେଇ ସାମ୍ବାଦିକ ସମ୍ମିଳନୀରେ କହିଛନ୍ତି ମନ୍ତ୍ରୀ ଖୁମ୍ବୁଜୁ ଶାଭେନି । ପାଲେଷ୍ଟାଇନ୍ ମାଟିରେ ନାଗରିକ ଏବଂ ଛୋଟପିଲାଙ୍କୁ ଅତି ନିର୍ମମ ଭାବେ ଇସ୍ରାଏଲ ହତ୍ୟା କରୁଛି । କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଯାଇ ଇସ୍ରାଏଲ ପାଲେଷ୍ଟାଇନ୍କୁ ଦଣ୍ଡ ଦେଉଛି ବୋଲି ଦକ୍ଷିଣ ଆଫ୍ରିକାର ବୈଦେଶିକ ମନ୍ତ୍ରୀ ନାଲେଡି ପାଣ୍ଡୋର ଅଭିଯୋଗ କରିଛନ୍ତି ।
ବନ୍ଧକ ମାନଙ୍କୁ ମୁକ୍ତ କରିବା ସପକ୍ଷରେ ରହିଛି ଦକ୍ଷିଣ ଆଫ୍ରିକା । ହେଲେ ଗାଜାରେ ଆକ୍ରମଣ ନେଇ ଦକ୍ଷିଣ ଆଫ୍ରିକା ଚିନ୍ତା ପ୍ରକଟ କରୁଥିବାରୁ ଏକ ସିଗନାଲ୍ ଦେବାକୁ ଉଚିତ ମଣିଲା ବୋଲି ମଧ୍ୟ ସେ କହିଛନ୍ତି । ତେବେ ଅକ୍ଟୋବର ୭ରେ ଗାଜାରୁ ହମାସ ଆତଙ୍କବାଦୀ ଇସ୍ରାଏଲରେ ଆକ୍ରମଣ କରିବା ପରଠାରୁ ଯୁଦ୍ଧ ଜାରି ରହିଛି । ଯୁଦ୍ଧକୁ ମାସେ ବିତିବାକୁ ଯାଉଥିବା ବେଳେ ଅନେକ ଲୋକ ପ୍ରାଣ ହରାଇଲେଣି ।
ଗାଜାରେ ଇସ୍ରାଏଲ ସେନା ପକ୍ଷରୁ ଆକ୍ରମଣ ତୀବ୍ର କରାଯାଇଥିବା ବେଳେ ସେଠାରେ ସ୍ଥିତି ଅଣାୟତ୍ତ ହୋଇପଡ଼ିଥିବା ନେଇ ଅଭିଯୋଗ ହୋଇଆସିଛି । ଏଭଳି ସ୍ଥିତିକୁ ନେଇ ଦକ୍ଷିଣ ଆଫ୍ରିକା ମଧ୍ୟ ଚିନ୍ତା ପ୍ରକାଶ କରିବା ସହ ଇସ୍ରାଏଲ ବିପକ୍ଷରେ ପଦକ୍ଷେପ ଗ୍ରହଣ କରିବାକୁ ଯାଇ ତେଲଅବିବରୁ ନିଜର କୂଟନୀତିଜ୍ଞଙ୍କୁ ଫେରାଇ ନେବ ବୋଲି ଘୋଷଣା କରିଛି । ତେବେ ଦକ୍ଷିଣ ଆଫ୍ରକିା ଦୀର୍ଘ ବର୍ଷ ହେଲା ପାଲେଷ୍ଟାନକୁ ଦୃଢ଼ ସମର୍ଥନ ଦେଇଆସିଛି ।
