ନୂଆଦିଲ୍ଲୀ: ଦକ୍ଷିଣ ଆମେରିକୀୟ ଦେଶ ଚିଲିରେ ଜଙ୍ଗରରେ ଭୟଙ୍କର ନିଆଁ ଲାଗିଛି । ଜଙ୍ଗଲ ନିଆଁ ୧୦ ଜଣଙ୍କ ଜୀବନ ନେଇଛି । ଦମକଳବାହିନୀ ନିଆଁ ଲିଭା କାର୍ଯ୍ୟରେ ନିୟୋଜିତ ହୋଇଥିଲେ ହେଁ ନିଆଁକୁ ଆୟତ୍ତ କରିବା କଷ୍ଟସାଧ୍ୟ ହେଉଛି । ଆଉ ଏହାକୁ ନଜରରେ ରଖି ରାଷ୍ଟ୍ରପତି ଗାବ୍ରିଏଲ ବୋରିକ ଦେଶରେ ଜରୁରୀ ପରିସ୍ଥିତି ଲାଗୁ କରିଛନ୍ତି । ଗତକାଲି (ଶୁକ୍ରବାର) ପାଖରୁ ଜଙ୍ଗଲର ବିଭିନ୍ନ ସ୍ଥାନରେ ଭୟଙ୍କର ଅଗ୍ନିକାଣ୍ଡ ଘଟିଥିବା ବେଳେ ନିଆଁ ଚାରିଆଡ଼କୁ ବ୍ୟାପିବାରେ ଲାଗିଛି । ବିଶେଷ କରି ‘ବିନା ଦେଲ ମାର’ ଏବଂ ବଲପରାଇସୋରେ ଭୀଷଣ ଅଗ୍ନିକାଣ୍ଡ ପର୍ଯ୍ୟଟକଙ୍କ ଲାଗି ଚ୍ୟାଲେଞ୍ଜ ସୃଷ୍ଟି କରିଛି ।
ଏକର ଏକର ଜଙ୍ଗଲ ଜଳିପୋଡ଼ି ପାଉଁଶ ହୋଇଥିବା ବେଳେ ଅନେକ ସହରର ଲୋକେ ଧୂଆଁ ପାଇଁ ଅଣନିଶ୍ବାସୀ ହୋଇପଡ଼ିଛନ୍ତି । ବିଭିନ୍ନ ସ୍ଥାନର ଲୋକେ ନିଜ ଘର ଛାଡ଼ି ଅନ୍ୟତ୍ର ଚାଲିଯିବାକୁ ବାଧ୍ୟ ହୋଇଛନ୍ତି । ବଲପରାଇସୋ କ୍ଷେତ୍ରର ପ୍ରତିନିଧି ସୋଫିଆ ଗୋଞ୍ଜାଲେ କୋର୍ଟସ କହିଛନ୍ତି ଯେ, ଜଙ୍ଗଲ ନିଆଁରେ ପ୍ରାୟ ୧୦ ଜଣଙ୍କ ଜୀବନ ଯାଇଛି । ସେହିଭଳି ଏଷ୍ଟ୍ରେଲ୍ଲା ଏବଂ ପାବିଡାଡା ସହରରେ ପ୍ରାୟ ୩୦ଟି ଘର ଜଳିପୋଡି ପାଉଁଶ ହୋଇଯାଇଛି । ଘର ଛାଡ଼ି ଚାଲଯିବାକୁ ଚେଷ୍ଟା କରୁଥିବା ଲୋକମାନଙ୍କ ପାଇଁ ଆଉ ଏକ ସମସ୍ୟ ପାଲଟିଛି ଭାରି ଟ୍ରାଫିକ୍ । କାରଣ ଜୀବନ ବିକଳରେ ବହୁସଂଖ୍ୟକ ଲୋକେ ଘର ଛାଡ଼ି ଚାଲିଯିବାକୁ ଚାହୁଁଥିବା ବେଳେ ରାସ୍ତାରେ ଅସମ୍ଭାଳ ଭିଡ଼ ଜମୁଥିବା ନେଇ ସ୍ଥାନୀୟ ଲୋକେ ଏଏଫପିକୁ ସୂଚନା ଦେଇଛନ୍ତି ।
ସେପଟେ ରାଷ୍ଟ୍ରପତି ଗାବ୍ରିଏଲ ବୋରିକ ଦେଶରେ ଏମର୍ଜେନ୍ସି ଜାରି କରିଥିବା ବେଳେ ନିଆଁକୁ ଆୟତ୍ତ କରିବା ଲାଗି ସମସ୍ତ ବ୍ୟବସ୍ଥା କରିବା ଲାଗି ନିର୍ଦ୍ଦେଶ ଦେଇଛନ୍ତି । ସେପଟେ ଗ୍ରୀଷ୍ମ ପ୍ରବାହ ଏବଂ ଦକ୍ଷିଣ ଆମେରିକାରେ ଦେଖାଦେଇଥିବା ମରୁଡ଼ି ପରିସ୍ଥିତି ଲାଗି ଜଙ୍ଗଲରେ ନିଆଁ ଲାଗିଛି ବୋଲି କୁହାଯାଉଛି । ଏଲ ନିନୋ ପ୍ରଭାବରେ ଉତ୍ତାପ ବୃଦ୍ଧି ପାଉଥିବାରୁ ପ୍ରାକୃତିକ ବିପର୍ଯ୍ୟୟ ଘଟୁଛି । ଚିଲି ଏବଂ କଲମ୍ବିଆ ଗ୍ରୀଷ୍ମ ପ୍ରବାହ ଦ୍ବାରା ପ୍ରଭାବିତ ହୋଇଥିବା ବେଳେ ଆଗକୁ ଆର୍ଜେଣ୍ଟିନା, ପାରାଗୁଏ ଏବଂ ବ୍ରାଜିଲରେ ବିଷମ ପରିସ୍ଥିତି ସୃଷ୍ଟି ହୋଇପାରେ ବୋଲି ଅନୁମାନ କରାଯାଉଛି ।
