ଭୁବନେଶ୍ଵର, ୨୧/୦୨ : ଖୋର୍ଦ୍ଧା ଜିଲ୍ଲା ଅନ୍ତର୍ଗତ କିଟ୍ ବିଶ୍ୱବିଦ୍ୟାଳୟରେ ମୋ ଭାରତ ବିକଶିତ ଭାରତ @୨୦୪୭ ରାଜ୍ୟ ସ୍ତରୀୟ ବକୃତା ପ୍ରତିଯୋଗୀତା ଅନୁଷ୍ଠିତ ହୋଇଯାଇଛି। ଏହାକୁ ନେହେରୁ ଯୁବକେନ୍ଦ୍ର ସଙ୍ଗଠନ ଓଡ଼ିଶା ଯୁବ ଓ କ୍ରୀଡ଼ା ମନ୍ତ୍ରାଳୟ ଭାରତ ସରକାରଙ୍କ ଆନୁକୁଲ୍ୟରେ ଆୟୋଜନ କରାଯାଇଥିଲା। ପ୍ରତ୍ୟେକ ଜିଲ୍ଲାର ଯୁବକ ଯୁବତୀମାନେ ଏହି ପ୍ରତିଯୋଗୀତାରେ ଅଂଶ ଗ୍ରହଣ କରିଥିଲେ। ଏହି ପ୍ରତିଯୋଗୀତାରେ କଳାହାଣ୍ଡି ଜିଲ୍ଲାର କୁମକୁମ ପ୍ରିୟଦର୍ଶିନୀ ସାହୁ ପ୍ରଥମ, ବାଲେଶ୍ଵର ଜିଲ୍ଲାର ଇଶାବୈଶାଖି ଗିରି ଦ୍ଵିତୀୟ, ଖୋର୍ଦ୍ଧା ଜିଲ୍ଲାର ଦେବାଶିଷ ପଣ୍ଡା ତୃତୀୟ ଓ ଜଗତସିଂହପୁର ଜିଲ୍ଲାର ଏଲିଶା ପ୍ରିୟଦର୍ଶିନୀ ଖଣ୍ଡୁଆଳ ଚତୁର୍ଥ ସ୍ଥାନ ଅଧିକାର କରିଥିଲେ।

କିଟ୍ ବିଶ୍ୱବିଦ୍ୟାଳୟର ଜାତୀୟ ସେବା ଯୋଜନାର ପ୍ରମୁଖ ମଙ୍ଗଧାର  ଡ. ସ୍ମୃତି ରଞ୍ଜନ ଦାସ ଓ ମୁଖ୍ୟ ସମ୍ପାଦିକା ଡ. କାଜଲ ପରାଶର, ଉତ୍କଳ ବିଶ୍ୱବିଦ୍ୟାଳୟର ଅଧ୍ୟାପକ ଡ. ରମେଶ ଚନ୍ଦ୍ର ମଲ୍ଲିକ, ନେହେରୁ ଯୁବ କେନ୍ଦ୍ରର ସହ ନିର୍ଦ୍ଦେଶକ ଶକ୍ତି ସ୍ୱରୁପ ସିଂ, ସହକାରୀ ବିଭାଗ ଅଧିକାରୀ ରୋହିତ ନନ୍ଦେଶ୍ୱର ମୁଖ୍ୟ ପୁରୋଧା ଭାବରେ ଯୋଗ ଦେଇଥିଲେ। ରାଜ୍ୟ ସଭା ସାଂସଦ ଶ୍ରୀ ମୁଜିବୁଲ୍ଲା ଖାନ୍ ମୁଖ୍ୟ ଅତଥିଭାବେ ଯୋଗ ଦେଇ ପ୍ରତିଯୋଗୀମାନଙ୍କୁ ପୁରସ୍କୃତ କରିଥିଲେ। ଏକ ସ୍ୱପ୍ନର ଭାରତ ଗଠନରେ ଯୁବ ଶକ୍ତିର ଭୂମିକାକୁ ନେଇ ଏକ ଉତ୍କଣ୍ଠାମୟ ଭାବନାକୁ କିପରି ଜାଗ୍ରତ କରିପାରିବା, ତାହା ଉପରେ ଶ୍ରୀଯୁକ୍ତ ଖାନ୍ ସମସ୍ତ ପ୍ରତିଯୋଗୀ ମାନଙ୍କୁ ଦିଗ୍‌ଦର୍ଶନ ଦେଇଥିଲେ।