ଗୋଚ୍ଛାପଡ଼ା, ୧୦/୧୨: କନ୍ଧମାଳ ଜିଲ୍ଲା ଉର୍ମାଗଡ଼ ଜଳପ୍ରପାତରେ ଖସି ପଡ଼ିଥିବା ଛାତ୍ରଙ୍କ କଙ୍କାଳ ମିଳିଛି । ନିଖୋଜର ପ୍ରାୟ ୨ ମାସ ପରେ ଉଦ୍ଧାର ହୋଇଛି ନରକଙ୍କାଳ । କଟ୍ରିଙ୍ଗିଆ ପଞ୍ଚାୟତ ନାକଡିସ ଗାଁର ଲିଙ୍ଗରାଜ ବେହେରାଙ୍କ ପୁଅ ରାଖଲ (୧୫) ଗତ ଅକ୍ଟୋବର ୮ରେ ସାଙ୍ଗମାନଙ୍କ ସହ ଉର୍ମାଗଡ଼ ଯାଇଥିଲେ । ଅସାବଧନତା ବଶତଃ ଗୋଡ଼ ଖସିଯିବାରୁ ପାଣିରେ ପଡ଼ି ଯାଇଥିଲେ ।
ବହୁ ଖୋଜାଖୋଜି ପରେ ବି ରାଖଲଙ୍କୁ ପାଇନଥିଲେ ସାଙ୍ଗମାନେ । ଖବର ପାଇ ସ୍ଥାନୀୟ ଗ୍ରାମବାସୀ, ଅଗ୍ନିଶମ ବାହିନୀ, ପୋଲିସ ଓ ଓଡ୍ରାଫ୍ ଟିମ୍ ବି ସର୍ଚ୍ଚ ଅପରେସନ୍ କରିଥିଲେ ବି ସନ୍ଧାନ ମିଳି ନଥିଲା । ରବିବାର ସକାଳେ ଗାଁର କିଛି ଲୋକ ମାଛ ଧରିବା ପାଇଁ ନଦୀକୁ ଯାଇଥିବା ବେଳେ ପଥର ସନ୍ଧିରେ କଙ୍କାଳ ଲାଗିଥିବା ଦେଖିଥିଲେ ।
କଙ୍କାଳରେ ଲାଗି ରହିଥିବା ପୋଷାକରୁ ତାହା ରାଖଲଙ୍କର ବୋଲି ପରିବାର ଲୋକ ଚିହ୍ନଟ କରିଛନ୍ତି । ଗୋଚ୍ଛାପଡ଼ା ଥାନା ପୋଲିସ କଙ୍କାଳ ଜବତ କରି ତଦନ୍ତ କରୁଛି । ମୃତ ରାଖଲ ବେହେରା ଓଡ଼ିଶା ଆଦର୍ଶ ବିଦ୍ୟାଳୟରେ ଦଶମ ଶ୍ରେଣୀରେ ପାଠ ପଢ଼ୁଥିଲେ ।