ନୂଆଦିଲ୍ଲୀ ୨୧/୧୧: ଏକ ବିରଳ ସ୍କଚ୍‌ ହ୍ୱିସ୍କି ବୋତଲ ଲଣ୍ଡନର ସୋଥ୍‌ବାଏଜ୍‌ ନିଲାମଗୃହରେ ୨୩ କୋଟି ଟଙ୍କାରେ ବିକ୍ରି ହୋଇଛି । ଗୋଟିଏ ବୋତଲ ସୁରା ଭାବେ ସର୍ବାଧିକ ମୂଲ୍ୟରେ ନିଲାମ ହୋଇ ଏହା ନୂଆ ରେକର୍ଡ କରିଛି । ‘ମାକାଲାନ୍‌ ଆଡାମି ୧୯୨୬’ ବିଶ୍ୱର ସବୁଠୁ ମୂଲ୍ୟବାନ ହ୍ୱିସ୍କି ଭାବେ ପରିଚିତ, ଯାହା ନିଲାମରେ ବିଡର୍‌ମାନଙ୍କୁ ଖୁବ୍‌ ଆକର୍ଷିତ କରିଥିଲା । ଶେରି କାସ୍କରେ ଦୀର୍ଘ ୬୦ ବର୍ଷ ଧରି ରହିବା ପରେ ୧୯୮୬ ମସିହାରେ ଏହି ହ୍ୱିସ୍କିର ମାତ୍ର ୪୦ଟି ବୋତଲ ପ୍ରସ୍ତୁତ ହୋଇଥିଲା । ଏହି ବିଶେଷତ୍ୱ ଯୋଗୁ ମାକାଲାନ ହ୍ୱିସ୍କିର ଚାହିଦା ବହୁତ ଅଧିକ । 

ନିଲାମ ହୋଇଥିବା ଏହି ବୋତଲର ଡିଜାଇନ୍‌କୁ ପ୍ରସ୍ତୁତ କରିଥିଲେ ଇଟାଲିର କଳାକାର ଭାଲେରିଓ ଆଡାମି । କେବଳ ୧୨ଟି ହ୍ୱିସ୍କି ବୋତଲରେ ଏହି ନିଆରା ଡିଜାଇନ୍‌ ହୋଇଥିଲା । ୨୦୧୯ ମସିହାରେ ସମାନ କାସ୍କର ଆଉ ଏକ ବୋତଲ ସୋଥ୍‌ବାଏଜ୍‌ ନିଲାମଘରେ ପ୍ରାୟ ୧୫ ଲକ୍ଷ ପାଉଣ୍ଡରେ ବିକ୍ରି ହୋଇଥିଲା, ଯାହା ସେ ସମୟର ରେକର୍ଡ ଥିଲା । ସୋଥ୍‌ବାଏଜ୍‌ ଗ୍ଲୋବାଲ୍‌ର ମୁଖ୍ୟ ଜନତ ଫାଉଲ କହିଛନ୍ତି, ମାକାଲାନ ୧୯୨୬ ସେହି ହ୍ୱିସ୍କି, ଯାହାକୁ ପ୍ରତ୍ୟେକ ନିଲାମକର୍ତ୍ତା ବିକିବାକୁ ଚାହାନ୍ତି ଏବଂ ପ୍ରତ୍ୟେକ ଗ୍ରାହକ କିଣିବାକୁ ଚାହାନ୍ତି ।