ଇସ୍ଲାମାବାଦ: ଫେବୃଆରୀ ୮ରେ ପାକିସ୍ତାନର ସାଧାରଣ ନିର୍ବାଚନ ଅନୁଷ୍ଠିତ ହେବାକୁ ଯାଉଛି । ଏହାକୁ ନଜରରେ ରଖି ସମସ୍ତ ଦଳ ଜୋରସୋରରେ ପ୍ରସ୍ତୁତି ଚଳାଇଛନ୍ତି । ଏହି ନିର୍ବାଚନରେ ୧୭୫ ଦଳ ମୈଦାନକୁ ଓହ୍ଲାଇଛନ୍ତି । ବହୁ ସଂଖ୍ୟକ ନିର୍ଦ୍ଦଳୀୟ ପ୍ରାର୍ଥୀ ମଧ୍ୟ ନିଜର ଭାଗ୍ୟ ପରୀକ୍ଷା କରିବେ । କିଛି ଏମିତି ପ୍ରାର୍ଥୀ ଅଛନ୍ତି ଯେଉଁମାନେ ଜେଲରୁ ନିର୍ବାଚନ ଲଢ଼ିବେ । ଇମ୍ରାନ୍ ଖାନଙ୍କ ଦଳ ପାକିସ୍ତାନ ତେହରିକ ଏ ଇନସାଫ୍ (ପିଟିଆଇ)ର ତିନି ଜଣ ମହିଳା ପ୍ରାର୍ଥୀ ଜେଲରେ ରହି ନିର୍ବାଚନ ଲଢ଼ିବେ । ଏହି ୩ ଜଣ ପ୍ରାର୍ଥୀ ଶରିଫ ପରିବାର ବିରୋଧରେ ନିର୍ବାଚନ ଲଢ଼ିବାକୁ ଯାଉଛନ୍ତି ।
୧. ଜସ୍ମିନ ରଶିଦ
ଇମ୍ରାନ୍ ଖାନଙ୍କ ଦଳର ନେତ୍ରୀ ଜସ୍ମିନ୍ ରଶିଦ ଲାହୋର ନ୍ୟାସନାଲ ଆସେମ୍ବଲି-୧୩୦ ନିର୍ବାଚନ କ୍ଷେତ୍ରରୁ ନଓ୍ବାଜ ଶରିଫଙ୍କ ବିପକ୍ଷରେ ନିର୍ବାଚନ ଲଢ଼ିବେ । ଦୁଇ ଜଣଙ୍କ ମଧ୍ୟରେ କଡ଼ା ଟକ୍କର ହେବ ବୋଲି କୁହାଯାଉଛି । ହେଲେ ଏହି ନିର୍ବାଚନ ମଣ୍ଡଳୀ ୧୯୯୦ରୁ ପିଏମଏଲ-ଏନର ଗଡ଼ ରହିଆସିଛି । ସେପଟେ ଜସ୍ମିନ୍ ରଶିଦ ୨୦୧୩-୨୦୨୩ ପର୍ଯ୍ୟନ୍ତ ଏହି ସିଟ୍ରେ ୩ ଥର ବିଜୟୀ ହୋଇଛନ୍ତି ।
୨. ଆଲିଆ ହମଜା ମଲିକ
ପିଏମଏଲ-ଏନ ନେତା ହମଜା ଶେହବାଜଙ୍କୁ ନ୍ୟାସନାଲ ଆସେମ୍ବଲି-୧୧୮ର ସବୁଠୁ ଶକ୍ତିଶାଳୀ ପ୍ରାର୍ଥୀ ବୋଲି କୁହାଯା । ହେଲେ ଏଥର ପିଟିଆଇ ନେତ୍ରୀ ହମଜା ମଲିକ ତାଙ୍କୁ ଟକ୍କର ଦେବେ ବୋଲି କୁହାଯାଉଛି । ୨୦୧୮ରେ ଏହି ସିଟ୍ ପିଏମଏଲ-ଏନ ଖାତାକୁ ଯାଇଥିଲା । ହମଜା ଶେହବାଜ ବିଜୟ ହାସଲ କରିଥିଲେ । ସେପଟେ ୨୦୧୮ରେ ପଞ୍ଜାବରୁ ନିର୍ବାଚନ ଲଢ଼ି ନ୍ୟାସନାଲ ଆସେମ୍ବଲିକୁ ନିର୍ବାଚିତ ହୋଇଥିଲେ ।
୩. ସନମ ଜାଭେଦ
ଜେଲରେ ବନ୍ଦୀ ଥିବା ପିଟିଆଇର ମହିଳା ନେତ୍ରୀ ସନମ ଜାଭେଦ ନ୍ୟାସନାଲ ଆସେମ୍ବଲି-୧୧୯ରୁ ନିର୍ବାଚନ ଲଢ଼ିବେ । ସେ ମୁସଲିମ୍ ଲିଗ-ନଓ୍ବାଜର ମୁଖ୍ୟ ମରିୟମ ନଓ୍ବାଜଙ୍କ ବିପକ୍ଷରେ ମୈଦାନକୁ ଓହ୍ଲାଇବେ । ଦୁଇ ଜଣଙ୍କ ମଧ୍ୟରେ କଡ଼ା ମୁକାବିଲା ହେବ ବୋଲି କୁହାଯାଉଛି । ମେ’ ୯ ତାରିଖ ମାମଲାରେ ସନମ ଜାଭେଦଙ୍କ ସମେତ ପିଟିଆଇର ୧୨ ଜଣରୁ ଅଧିକ ମହିଳା ନେତ୍ରୀ ଦେଶର ବିଭିନ୍ନ ଜେଲରେ ବନ୍ଦୀ ଅଛନ୍ତି ।