ରାଞ୍ଚି: ବିଦ୍ୟୁତ ତାର ଛିଣ୍ଡିପଡ଼ିବାରୁ ହଠାତ ଟ୍ରେନ୍ ଅଟକିଯାଇଥିଲା । ଫଳରେ ଟ୍ରେନ ଭିତରେ ଦୁଇ ଜଣ ଯାତ୍ରୀଙ୍କ ମୃତ୍ୟୁ ହୋଇଥିବା ଜଣାପଡ଼ିଛି । ଝାଡ଼ଖଣ୍ଡର କୋଡର୍ମା ଜିଲ୍ଲାରେ ଏହି ଅଘଟଣ ଶନିବାର ଘଟିଥିବା ନେଇ ପୂର୍ବ-ମଧ୍ୟ ରେଳବାଇ ପକ୍ଷରୁ ସୂଚନା ଦିଆଯାଇଛି । ପୁରୀ-ଦିଲ୍ଲୀ ପୁରୁଷୋତ୍ତମ ଏକ୍ସପ୍ରେସରେ ଗୋମୋହ ଏବଂ କୋଡର୍ମା ଷ୍ଟେସନ୍ ମଧ୍ୟରେ ଜରୁରୀ ବ୍ରେକ୍ ଲାଗିଥିଲା ।
ଏହି ସମୟରେ ଟ୍ରେନର ବେଗ ୧୩୦ କିମି ପ୍ରତି ଘଣ୍ଟା ଥିଲା । ହଠାତ ଟ୍ରେନ୍ ଅଟକିଯିବାରୁ ଜୋରଦାର ଝଟକା ଅନୁଭୂତ ହୋଇଥିଲା । ଏଥତରେ ଦୁଇ ଯାତ୍ରୀଙ୍କ ମୃତ୍ୟୁ ହୋଇଛି ।
ବିଦ୍ୟୁତ ତାର ଛିଣ୍ଡିପଡ଼ିବାରୁ ଟ୍ରେନ୍ ଭିତରେ ବିଜୁଳି ସଂଯୋଗ ବିଚ୍ଛିନ୍ନ ହେବା ସହ ଏଥିରେ ଜରୁରୀ ବ୍ରେକ୍ ଲାଗିଥିଲା । ଜୋରଦାର ଧକ୍କା ହେବା ଫଳରେ ଟ୍ରେନ୍ରେ ପିଟି ହୋଇ ଦୁଇ ଯାତ୍ରୀଙ୍କ ମୃତ୍ୟୁ ହୋଇଥିବା ନେଇ ଧନବାଦ ରେଳବାଇ ଡିଭିଜନର ଜଣେ ବରିଷ୍ଠ ଅଧିକାରୀ ଅମେରେଶ କୁମାର ସୂଚନା ଦେଇଛନ୍ତି । ତେବେ ଏହି ଦୁର୍ଘଟଣାର ପ୍ରାୟ ୪ ଘଣ୍ଟା ପରେ ଏହି ଟ୍ରାକ୍ରେ ଟ୍ରେନ୍ ଚଳାଚଳ ସ୍ବଭାବିକ ହୋଇଥିଲା ।
ଦୁର୍ଘଟଣାସ୍ଥଳରୁ ଏକ୍ସପ୍ରେସ ଟ୍ରେନ୍କୁ ଏକ ଡିଜେଲ୍ ଇଞ୍ଜିନ୍ ସାହାଯ୍ୟରେ ଗୋମୋହ ଅଣାଯାଇଥିଲା ପରେ ସେଠାରୁ ବିଦ୍ୟୁତ ଇଞ୍ଜିନ୍ ସାହାଯ୍ୟରେ ପୁରୀ ପଠାଯାଇଛି । ଏନେଇ ସୂଚନା ପାଇବା ପରେ ଧନବାଦ ରେଲଓ୍ବେ ଡିଭିଜନ୍ ମ୍ୟାନେଜର କେକେ ସିହ୍ନା ଏବଂ ଅନ୍ୟ ଅଧିକାରୀ ଘଟଣାସ୍ଥଳରେ ପହଞ୍ଚିଥିଲେ ।
