ନୂଆଦିଲ୍ଲୀ ୦୮/୦୨ : ଗତ ମାସ ମିସ୍ ଜାପାନ ଟାଇଟଲ୍ ପାଇଥିବା କାରୋଲିନା ଶିନୋ ନିଜ ମୁକୁଟ ଫେରାଇଛନ୍ତି । ଜଣେ ବିବାହିତ ବ୍ୟକ୍ତିଙ୍କ ସହ ତାଙ୍କ ସମ୍ପର୍କ ବିଷୟରେ ଏକ ସାପ୍ତାହିକ ପତ୍ରିକାରେ ଖୁଲାସା ହେବା ପରେ ସେ ଏପରି କରିଛନ୍ତି । ସୁନ୍ଦରୀ ପ୍ରତିଯୋଗିତା ଇତିହାସରେ ଏହା ଏକ ବିରଳ ଘଟଣା । ବର୍ଷ ତମାମ ମିସ୍ ଜାପାନ ଟାଇଟଲ୍ ଖାଲି ରହିବ । ୟୁକ୍ରେନ୍ରେ ଜନ୍ମିତ ୨୬ ବର୍ଷୀୟା ଶିନୋ ଜାପାନରେ ବଢ଼ିଛନ୍ତି । ଗତ ମାସ ମିସ୍ ଜାପାନ-୨୦୨୪ ଟାଇଟଲ୍ ଜିତିବା ପରେ ସେ ବିବାଦ ଘେରକୁ ଆସିଥିଲେ । ଜାପାନର ମୂଳ ବାସିନ୍ଦା ନ ହୋଇ ମଧ୍ୟ ତାଙ୍କୁ ମିସ୍ ଜାପାନ ସମ୍ମାନ କେମିତି ମିଳିଲା, ତାକୁ ନେଇ ଅନେକ ପ୍ରଶ୍ନ ଉଠାଇଲେ ।
ଏହି ବିବାଦ ମଧ୍ୟରେ ଶୁକାନ ବୁନଶୁନ୍ ନାମକ ସାପ୍ତାହିକ ପତ୍ରିକାରେ ଏକ ଖବର ପ୍ରକାଶ ପାଇଲା, ଯେଉଁଥିରେ ତାକୁମା ମେଡା ନାମକ ଜଣେ ବିବାହିତ ଡାକ୍ତରଙ୍କ ସହ ଶିନୋଙ୍କ ପ୍ରେମ ସମ୍ପର୍କ ବିଷୟରେ ଉଲ୍ଲେଖ ହୋଇଥିଲା । ସୁନ୍ଦରୀ ପ୍ରତିଯୋଗିତାର ଆୟୋଜକମାନେ ପ୍ରଥମେ ଶିନୋଙ୍କୁ ସମର୍ଥନ କଲେ । ତାକୁମା ଜଣେ ବିବାହିତ ବ୍ୟକ୍ତି ବୋଲି ଶିନୋ ଜାଣିନଥିବା କଥା ସେମାନେ କହିଲେ । କିନ୍ତୁ ପରେ ଜଣାପଡ଼ିଲା ଯେ ତାକୁମା ବିବାହିତ ଜାଣି ସୁଦ୍ଧା ଶିନୋ ତାଙ୍କୁ ଡେଟ୍ କରିଥିଲେ ।
ଶିନୋଙ୍କ ମଡେଲ ଏଜେନ୍ସି ଫ୍ରି ୱେଭ୍ କହିଛି, ଡାକ୍ତର ପ୍ରଥମେ ଶିନୋଙ୍କୁ ଅବିବାହିତ ବୋଲି କହିଥିଲେ । କିନ୍ତୁ ବିବାହିତ ବୋଲି ଜାଣିବା ପରେ ବି ଶିନୋ ତାଙ୍କ ସହ ସମ୍ପର୍କ ରଖିଲେ । ପତ୍ରିକାରେ ଖବର ପ୍ରକାଶ ପାଇବା ପରେ ଶିନୋ ଇନ୍ଷ୍ଟାଗ୍ରାମ୍ରେ କ୍ଷମା ମାଗିଛନ୍ତି । ସେ ଲେଖିଛନ୍ତି ‘ଯେଉଁ ବଡ଼ ଧରଣର ତ୍ରୁଟି ମୋ ଯୋଗୁ ହୋଇଛି ଏବଂ ଯେଉଁମାନେ ମୋତେ ସମର୍ଥନ କଲେ ସେମାନଙ୍କ ସହ ପ୍ରତାରଣା କରିଥିବାରୁ ମୁଁ ବାସ୍ତବରେ ଅତ୍ୟନ୍ତ ଦୁଃଖିତ ।’ ଦ୍ୱନ୍ଦ୍ୱ ଓ ଭୟ ଯୋଗୁ ସତ କହିପାରୁନଥିଲେ ବୋଲି ଶିନୋ ଉଲ୍ଲେଖ କହିଛନ୍ତି ।
