ପାଟକୁରା, ୧୩/୨ : ଗରଦପୁର ବ୍ଲକ ପାଖଡ଼ ପଞ୍ଚାୟତର ନୂଆପଡ଼ା ଗ୍ରାମବାସୀ ୭ଦଫା ଦାବିରେ ନୂଆପଡ଼ାଠାରେ ଶାନ୍ତିପୂର୍ଣ୍ଣ ଅନଶନ କରିଛନ୍ତି । ଏହି ଅନଶନ ସ୍ଥଳରେ ପାଟକୁରା ବିଧାୟିକାଙ୍କ ପ୍ରତିନିଧି ତଥା ବିଜେଡି ରାଜ୍ୟ କାର୍ଯ୍ୟକାରିଣୀ ସଦସ୍ୟ ସଞ୍ଜୟ ଅଗ୍ରୱାଲ ପହଞ୍ଚି ସମସ୍ତ ଦାବି ବିଚାର କରାଯିବ ସହ ଅନଶନ ପ୍ରତ୍ୟାହୃତ କରିବା ପାଇଁ ଅନୁରୋଧ କରିଥିଲେ ବି ଅନଶନକାରୀ ତାଙ୍କର ଅନୁରୋଧ ପ୍ରତ୍ୟାଖାନ କରିଦେଇଛନ୍ତି । 

ତେବେ ଉକ୍ତ ଦାବି ମଧ୍ୟରେ ନୂଆପଡ଼ାଠାରୁ ଶୀତଳପାଟଣା ପର୍ଯ୍ୟନ୍ତ ରାସ୍ତାକୁ ସଂପ୍ରସାରଣ, ନୂଆପଡ଼ା ଗ୍ରାମବାସୀଙ୍କୁ ପାନୀୟ ଜଳ ଯୋଗାଣ, ତାଳଦଣ୍ଡା ଜୋରକୁ ସଫେଇ ଓ ପୁନ‌ରୁଉଦ୍ଧାର, ମାଙ୍କଡମାନଙ୍କର ଉପଦ୍ରବରୁ ମୁକ୍ତି, ନୂଆପଡ଼ାଠାରେ ଯାତ୍ରୀ ବିଶ୍ରାମଗାର ପ୍ରତିଷ୍ଠା, ଖୋଲାଥିବା ବିଦ୍ୟୁତ ତାର ପରିବର୍ତ୍ତନ, ନୂଆପଡ଼ା ବ୍ରାହ୍ମଣ ଶାଶନ ପାଇଁ ଶଶ୍ନାନ ପ୍ରତିଷ୍ଠା ପାଇଁ ଉକ୍ତ ଗ୍ରାମର ସାମାଜିକ କର୍ମୀ ପ୍ରଫୁଲ୍ଲ ଆଚାର୍ଯ୍ୟଙ୍କ ନେତୃତ୍ବରେ ହେମନ୍ତ ପଣ୍ଡା, ଶରତ ଦାସ, ଦୁଷ୍ମନ୍ତ ନାୟକ, ଅଭିରାମ ସେଠୀ, କୁଳମଣି ରାଉତ, ରଞ୍ଜନ ସେନାପତି, ଧିରେନ ନାୟକ‌ଙ୍କ ସମେତ ଉକ୍ତ ଓ୍ବାର୍ଡ଼ ସଭ୍ୟ ରଞ୍ଜନ ଦାଶ ପ୍ରମୁଖ ଅନଶନରେ ବସିଛନ୍ତି । ହେଲେ କୌଣସି ସରକାରୀ ଅଧିକାରୀଙ୍କ ସନ୍ଧ୍ୟା ପର୍ଯ୍ୟନ୍ତ ଦେଖା ନ ମିଳିବାରୁ ଅସନ୍ତୋଷ ପ୍ରକାଶ ପାଇଛି ।