ମସ୍କୋ,୦୨/୧୨: ଅତିକମ୍ରେ ୮ କିମ୍ବା ତା’ଠାରୁ ଅଧିକ ସନ୍ତାନ ଜନ୍ମ କରିବା ସହ ବଡ ପରିବାର ଗଢ଼ିବାକୁ ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ ଦେଶର ମହିଳାମାନଙ୍କୁ ପରାମର୍ଶ ଦେଇଛନ୍ତି । ଗତ ମଙ୍ଗଳବାର ମସ୍କୋରେ ଅନୁଷ୍ଠିତ ୱାର୍ଲ୍ଡ ରୁଷିଆନ ପିପୁଲ୍ସ କାଉନସିଲ ବୈଠକକୁ ଭିଡିଓ କନଫରେନ୍ସିଂ ଯୋଗେ ସମ୍ବୋଧନ କରି ପୁଟିନ କହିଛନ୍ତି ମହିଳାମାନେ ବଡ ପରିବାରକୁ ନିଜର ଆଦର୍ଶ ଭାବେ ଗ୍ରହଣ କରିବା ଆବଶ୍ୟକ । ଦେଶରେ ଏଭଳି କିଛି ସମ୍ପ୍ରଦାୟ ଅଛନ୍ତି ଯେଉଁମାନେ ୪,୫ କିମ୍ବା ତା’ଠାରୁ ଅଧିକ ପିଲା ଜନ୍ମ କରିବାର ପରମ୍ପରାକୁ ବଜାୟ ରଖି ଆସିଛନ୍ତି । ପୂର୍ବରୁ ଆମର ଦାଦି, ପରଦାଦିଙ୍କର ୭, ୮ କିମ୍ବା ତା’ଠାରୁ ଅଧିକ ପିଲା ଥିଲେ । ତେଣୁ ଆମକୁ ସେହି ଉତ୍କୃଷ୍ଠ ପରମ୍ପରାକୁ ସଂରକ୍ଷିତ ତଥା ପୁନର୍ଜିବୀତ କରିବାକୁ ପଡିବ । ତେଣୁ ଆଗାମୀ ଦଶନ୍ଧୀରେ ଜନସଂଖ୍ୟା ବୃଦ୍ଧି ଆମର ମୁଖ୍ୟ ଲକ୍ଷ୍ୟ ହେବା ଉଚିତ । ପରିବାର କେବଳ ସମାଜ କିମ୍ବା ଦେଶର ମୂଳଦୁଆ ନୁହେଁ, ଏହା ଏକ ଆଧ୍ୟାତ୍ମିକ ଘଟଣା ଓ ନୈତିକତାର ସ୍ରୋତ ବୋଲି ପୁଟିନ କହିଛନ୍ତି ।
ସୂଚନାଯୋଗ୍ୟ ଯେ ନବେ ଦଶକ ପରଠାରୁ ରୁଷରେ ଜନସଂଖ୍ୟା ଦ୍ରୁତଗତିରେ ହ୍ରାସ ପାଇବାରେ ଲାଗିଛି । ଗତବର୍ଷ ଫେବ୍ରୁଆରୀରେ ଆରମ୍ଭ ହୋଇଥିବା ରୁଷ-ୟୁକ୍ରେନ ଯୁଦ୍ଧରେ ଏପର୍ଯ୍ୟନ୍ତ ୩ ଲକ୍ଷରୁ ଅଧିକ ରୁଷୀ ନାଗରିକଙ୍କ ମୃତ୍ୟୁ ଘଟିସାରିଲାଣି । ଆହୁରି ୯ ଲକ୍ଷରୁ ଅଧିକ ଲୋକ ଦେଶଛାଡି ପଳାଇଯାଇଛନ୍ତି ।