ବେଙ୍ଗାଲୁରୁ,୦୧/୦୩: ଚଳିତ ମହିଳା ପ୍ରିମିୟର ଲିଗ୍(ଡବ୍ଲ୍ୟୁପିଏଲ୍)ରେ ରୟାଲ୍ ଚ୍ୟାଲେଞ୍ଜର୍ସ ବାଙ୍ଗାଲୋରକୁ ୨୫ ରନ୍ରେ ହରାଇ ଦିଲ୍ଲୀ କ୍ୟାପିଟାଲ୍ସ ପଏଣ୍ଟ ତାଲିକାର ଶୀର୍ଷକୁ ଉନ୍ନୀତ ହୋଇଛି । ଏହି ମ୍ୟାଚ୍ରେ ପ୍ରଥମେ ବ୍ୟାଟିଂ କରି ଦିଲ୍ଲୀ କ୍ୟାପିଟାଲ୍ସ ୫ ୱିକେଟ୍ ବିନିମୟରେ ୧୯୪ ରନ୍ ସଂଗ୍ରହ କରିଥିଲା । ଜବାବରେ ରୟାଲ୍ ଚ୍ୟାଲେଞ୍ଜର୍ସ ୯ୱିକେଟ୍ ହରାଇ ୧୬୯ ରନ୍ କରିବାକୁ ସକ୍ଷମ ହୋଇଥିଲା ।
୧୯୫ ରନ୍ର ବିଜୟ ଲକ୍ଷ୍ୟର ପିଛା କରି ରୟାଲ୍ ଚ୍ୟାଲେଞ୍ଜର୍ସ ପ୍ରାରମ୍ଭରୁ ଆକର୍ଷଣୀୟ ବ୍ୟାଟିଂ କରିଥିଲା । ଅଧିନାୟିକା ସ୍ମୃତି ମନ୍ଧନା ଦର୍ଶନୀୟ ସଟ୍ମାନ ଖେଳି ଦ୍ରୁତ ବେଗରେ ଦଳୀୟ ସ୍କୋରକୁ ଆଗେଇ ନେଇଥିଲେ । ୭୭ରନ୍ର ଓପନିଂ ଭାଗିଦାରୀ ପରେ ସୋଫି ଡିଭାଇନ୍ ବ୍ୟକ୍ତିଗତ ୨୩(୧ଚୌକା, ୨ଛକା) ରନ୍ କରି ଆଉଟ୍ ହୋଇଥିଲେ । ମନ୍ଧନା ଆକ୍ରମଣ ଜାରି ରଖି ଦଳୀୟ ସ୍କୋରକୁ ୧୧୨ରେ ପହଞ୍ଚାଇଥିଲେ । ସେ ୪୩ଟି ବଲ୍ରୁ ୭୪(୧୦ଚୌକା, ୩ଛକା) ରନ୍ କରି ଆଉଟ୍ ହେବା ପରେ ଘରୋଇ ଦଳ ଲୟ ହରାଇଥିଲା । ପରବର୍ତ୍ତୀ ବ୍ୟାଟରମାନେ ନିରାଶ କରିଥିଲେ । ଶେଷରେ ଦଳୀୟ ସ୍କୋର ୯/୧୬୯ରେ ଅଟକି ଯାଇଥିଲା । ଅନ୍ୟମାନଙ୍କ ମଧ୍ୟରେ ଏସ ମେଘନା ୩୬ ରନ୍ କରିଥିଲେ । ଦିଲ୍ଲୀ କ୍ୟାପିଟାଲ୍ସ ପକ୍ଷରୁ ଜେସ ଜନାସେନ ୩ଟି ୱିକେଟ୍ ଅକ୍ତିଆର କରିଥିବାବେଳେ ମାରିଜେନ କାପ ଓ ଅରୁନ୍ଧତି ୨ଟି ଲେଖାଏଁ ୱିକେଟ୍ ନେଇଥିଲେ ।
ପୂର୍ବରୁ ବ୍ୟାଟିଂ ଆମନ୍ତ୍ରଣ ପାଇ ଦିଲ୍ଲୀ କ୍ୟାପିଟାଲ୍ସ ଦଳ ଧୂଆଁଧାର ବ୍ୟାଟିଂ କରିଥିଲା । ମେଗ ଲ୍ୟାନିଂ(୧୧) ସହଳ ଆଉଟ୍ ହୋଇଥିଲେହେଁ ଅନ୍ୟ ଓପନର ଶେଫାଳି ଚୌକା ଓ ଛକା ବର୍ଷା କରିଥିଲେ । ଆଲିସ କ୍ୟାପ୍ସି ତାଙ୍କୁ ସହାୟତା କରିଥିଲେ । ଉଭୟ ୪୩ଟି ବଲରେ ୮୨ ର୍ ସଂଗ୍ରହ କରିବା ଫଳରେ ଦଳୀୟ ସ୍କୋର ୧୧୦ରେ ପହଞ୍ଚିଥିଲା । ୩୧ଟି ବଲ୍ରୁ ୩ଚୌକା ଓ ୪ଛକା ବଳରେ ୫୦ ରନ କରି ସେଫାଳି ଆଉଟ୍ ହୋଇଥିଲେ । ମଧ୍ୟ କ୍ରମ ବ୍ୟାଟରମାନେ ଆକ୍ରମଣାତ୍ମକ ବ୍ୟାଟିଂ ଜାରି ରଖିବାରୁ ଦଳୀୟ ସ୍କୋର ୧୯୪ରେ ପହଞ୍ଚିଥିଲା । କ୍ୟାପ୍ସି ୩୩ଟି ବଲ୍ରୁ ୪୬(୪ଚୌକା, ୨ଛକା) ରନ୍ କରିଥିବାବେଳେ ମାରିଜାନ କାପ୍ ୧୬ଟି ବଲ୍ରୁ ୩୨(୨ଚୌକା ଓ ୩ଛକା) ରନ୍ର ପାଳି ଖେଳିଥିଲେ । ସେହିପରି ଜେସ ଜନାସେନ ୧୬ଟି ବଲ୍ରୁ ଅପରାଜିତ ୩୬(୪ଚୌକା, ୨ଛକା) ଓ ଅରୁନ୍ଧତୀ ରେଡ୍ଡୀ ୩ଟି ବଲ୍ରୁ ଅପରାଜିତ ୧୦ ରନ୍ କରିଥିଲେ । ରୟାଲ୍ ଚ୍ୟାଲେଞ୍ଜର୍ସ ପକ୍ଷରୁ ସୋଫି ଡିଭାଇନ ଓ ନାଦିନ ଡି କ୍ଲର୍କ ୨ଟି ଲେଖାଏଁ ୱିକେଟ୍ ନେଇଥିଲେ।
