ଭୁବନେଶ୍ୱର,୦୩/୦୨: ଆଜି କଳିଙ୍ଗ ଷ୍ଟାଡିୟମରେ ଆରମ୍ଭ ହେବ ଏଫ୍ଆଇଏଚ୍ ମହିଳା ହକି ପ୍ରୋ ଲିଗ୍ । ଶୀତୁଆ ସନ୍ଧ୍ୟାରେ ହକିରେ ମସଗୁଲ ହେବେ ଦର୍ଶକ । କୋଳାହଳରେ ଫାଟି ପଡ଼ିବ ଷ୍ଟାଡିୟମର ଆକାଶ ।
ପ୍ରଥମ ଦିବସରେ ୨ଟି ମ୍ୟାଚ୍ ରହିଛି । ଆମେରିକା ଓ ନେଦରଲାଣ୍ଡସ ମଧ୍ୟରେ ପ୍ରଥମ ମ୍ୟାଚ୍ ଅପରାହ୍ଣରୁ ଆରମ୍ଭ ହେବ ଏବଂ ସନ୍ଧ୍ୟାରେ ଦ୍ୱିତୀୟ ମ୍ୟାଚ୍ରେ ଭାରତ-ଚୀନ ମୁହାଁମୁହିଁ ହେବେ । ରାଞ୍ଚିରେ ଆୟୋଜିତ ଅଲିମ୍ପିକ୍ସ ଯୋଗ୍ୟତା ପର୍ଯ୍ୟାୟରେ ଦୁର୍ବଳ ପ୍ରଦର୍ଶନ କରି ଭାରତୀୟ ଦଳ ପ୍ୟାରିସ ଟିକେଟ୍ ହାସଲରୁ ବଞ୍ଚିତ ହୋଇଥିଲା । କିନ୍ତୁ ପ୍ରୋ ଲିଗ୍ରେ ଦଳ ଭଲ ପ୍ରଦର୍ଶନ କରି ଅନ୍ତର୍ଜାତୀୟ ମାନ୍ୟତାରେ ଉନ୍ନତି ଆଣିବାକୁ ଲକ୍ଷ୍ୟ ରଖିଛି ।
ନେଦରଲାଣ୍ଡସ, ଚୀନ, ଅଷ୍ଟ୍ରେଲିଆ ଓ ଆମେରିକା ପାଇଁ ପ୍ରତିଟି ମ୍ୟାଚ୍ ବେଶ ଗୁରୁତ୍ୱପୂର୍ଣ୍ଣ ରହିଛି । ବର୍ଷ ଆରମ୍ଭରୁ ଏହି ସବୁ ଦଳ ପ୍ରୋ ଲିଗ୍ ମାଧ୍ୟମରେ ଅଲିମ୍ପିକ୍ସ ପ୍ରସ୍ତୁତି ଆରମ୍ଭ କରିବେ । ଅଲିମ୍ପିକ୍ସ ଯୋଗ୍ୟତା ପର୍ଯ୍ୟାୟରେ ଭୁଲ ତ୍ରୁଟିରେ ସୁଧାର ଆଣି ଭାରତ ଭ୍ରମଣକାରୀ ଚୀନକୁ କଡ଼ା ଟକ୍କର ଦେବାକୁ ଲକ୍ଷ୍ୟ ରଖିଛି ।
ଭାରତୀୟ ସ୍କିମର ବନ୍ଦନା କାଟାରିଆ କହିଛନ୍ତି, ‘ପ୍ରୋ ଲିଗ୍ ପାଇଁ କିଛି ଦିନ ହେଲା ଆମର ପ୍ରସ୍ତୁତି ଭଲ ରହିଛି । ଦଳ ତା’ର ଶ୍ରେଷ୍ଠ ପ୍ରଦର୍ଶନ ଦେବାକୁ ପ୍ରସ୍ତୁତ ରହିଛି ।’ ଅଲିମ୍ପିକ୍ସ ଯୋଗ୍ୟତା ପର୍ଯ୍ୟାୟରେ ବିଫଳ ହେବା ସଂପର୍କରେ ସେ କହିଥିଲେ, ‘ଜର୍ମାନୀ ବିପକ୍ଷରେ ଆମେ ଲଢ଼େଇ କରିଥିଲୁ । ସମସ୍ତେ ନିଜ ନିଜର ଶ୍ରେଷ୍ଠ ପ୍ରଦର୍ଶନ ଦେଇଥିଲୁ । କିନ୍ତୁ ଆମେ ଅଧିକ ଗୋଲ୍ ସ୍କୋର କରିପାରି ନଥିଲୁ । ଫଳରେ ଆମେ ମ୍ୟାଚ୍ ହାତଛଡ଼ା କରିଥିଲୁ । ସେମିତି ତୃତୀୟ ସ୍ଥାନ ମୁକାବିଲାରେ ବିଫଳ ହେଲୁ । ଏବେ ଆମର ଗୋଟିଏ ଲକ୍ଷ୍ୟ ହେଉଛି ପୂର୍ବ ତ୍ରୁଟିରେ ସୁଧାର ଆଣି ଶ୍ରେଷ୍ଠ ପ୍ରଦର୍ଶନ ଦେବା ।’
