କୋରାପୁଟ,୧୦/୧୨: ପ୍ରତିବର୍ଷ ଡିସେମ୍ବର ୧୦ ତାରିଖକୁ ବିଶ୍ୱ ମାନବାଧିକାର ଦିବସ ଭାବେ ପାଳନ କରାଯାଉଛି । ମାନବାଧିକାରକୁ ସୁଦୃଢ଼ କରିବା ଉଦ୍ଦେଶ୍ୟରେ ଏହା ପାଳନ ହେଉଛି । ହେଲେ କୋରାପୁଟ ଜିଲ୍ଲାରେ ୫ଶହରୁ ଅଧିକ ମାନସିକ ବିକାରଗ୍ରସ୍ତଙ୍କ କଥା ବୁଝିବାକୁ ସରକାରୀ ସ୍ତରରେ କୌଣସି ବ୍ୟବସ୍ଥା ନାହିଁ ।
ଜିଲ୍ଲାରେ ବିଭିନ୍ନ ସମୟରେ ଶିଶୁ ନିର୍ଯାତନା, ସ୍ୱାସ୍ଥ୍ୟସେବାରେ ଶୋଷଣ, ଅନାହାରଜନିତ ମୃତ୍ୟୁ, ମାନସିକ ବିକାରଗ୍ରସ୍ତ ଓ ମହିଳାଙ୍କୁ ନିର୍ଯାତନା ଘଟଣା ପଦାକୁ ଆସୁଛି । ଜେଲ୍ ଓ ଥାନା ହାଜତରେ ମଧ୍ୟ ଗିରଫ ଏବଂ ଅଟକ ବ୍ୟକ୍ତିଙ୍କୁ ନିର୍ଯାତନା ଦିଆଯିବା ଉଦ୍ବେଗର କାରଣ ହୋଇଛି । ରାସ୍ତାରେ ଏଣେତେଣେ ଘୁରି ବୁଲୁଥିବା ମାନସିକ ବିକରଗ୍ରସ୍ତଙ୍କ କାହାଣୀ ଅବର୍ଣ୍ଣନୀୟ । କେନ୍ଦ୍ର ଓ ରାଜ୍ୟ ସରକାର ଏଥିପାଇଁ ନିର୍ଦ୍ଦିଷ୍ଟ ଯୋଜନା କରି ନଥିବାରୁ ସେମାନେ ଅଭିଶପ୍ତ ଜୀବନ ବିତାଉଛନ୍ତି । ଏକ ଘରୋଇ ସଂସ୍ଥାର ସର୍ଭେ ଅନୁଯାୟୀ, ଜିଲ୍ଲାରେ ମାନସିକ ବିକାରଗ୍ରସ୍ତଙ୍କ ସଂଖ୍ୟା ପ୍ରାୟ ୫୫୮ । କୋରାପୁଟ ଓ ଜୟପୁର ସହର ସମେତ ଅନ୍ୟ ସହରାଞ୍ଚଳରେ ୫୦ ପ୍ରତିଶତ ମାନସିକ ବିକାରଗ୍ରସ୍ତ ଘୁରି ବୁଲୁଛନ୍ତି ।
ଏମାନଙ୍କ ମଧ୍ୟରେ ମହିଳାଙ୍କ ସଂଖ୍ୟା ଅଧିକ । ୩୦ ପ୍ରତିଶତ ମାନସିକ ବିକାରଗ୍ରସ୍ତଙ୍କ ବୟସ ୪୦ ବର୍ଷ ମଧ୍ୟରେ ବୋଲି ସର୍ଭେ ରିପୋର୍ଟରେ ଦର୍ଶାଯାଇଛି । ତଥାପି ସ୍ଥାନୀୟ ପ୍ରଶାସନ ଏମାନଙ୍କୁ ଉଦ୍ଧାର ଓ ଥଇଥାନ ପାଇଁ କୌଣସି ପଦକ୍ଷେପ ଗ୍ରହଣ କରୁନାହିଁ । ପ୍ରଶାସନିକ ଉଦାସୀନତା ଯୋଗୁ ଏହି ମାନସିକ ରୋଗୀମାନେ ମାନବାଧିକାରରୁ ବଞ୍ଚିତ ହେଉଛନ୍ତି । କେବଳ ମାନସିକ ରୋଗୀ ନୁହନ୍ତି, ଜିଲ୍ଲାରେ ଶିଶୁ ଶ୍ରମିକ ସମସ୍ୟା ମଧ୍ୟ ଜଟିଳ ପରିସ୍ଥିତି ସୃଷ୍ଟି କରିଛି । ଜିଲ୍ଲାରେ ୨ହଜାରରୁ ଅଧିକ ଶିଶୁ ଶ୍ରମିକ ରହିଛନ୍ତି । ଏମାନେ ବିଭିନ୍ନ ଢାବା, ହୋଟେଲ, ଦୋକାନ ତଥା ଅନେକ ବିପଦପୂର୍ଣ୍ଣ ସ୍ଥାନରେ କାମ କରୁଛନ୍ତି । ଏପରିକି ଦିନ ମଜୁରିଆ ଭାବେ ମଧ୍ୟ କାମ କରୁଛନ୍ତି । ଏହାକୁ ବନ୍ଦ କରିବା ଦିଗରେ କୌଣସି ପ୍ରଶାସନିକ ତତ୍ପରତା ଦେଖାଯାଉନାହିଁ । ମହିଳା ନିର୍ଯାତନା କ୍ଷେତ୍ରରେ ମଧ୍ୟ ଜିଲ୍ଲା ସବୁବେଳେ ଚର୍ଚ୍ଚାରେ ରହିଆସିଛି ।
ମାନବାଧିକାର କର୍ମୀ ମଳୟ ମହାପାତ୍ରଙ୍କ କହିବା ଅନୁଯାୟୀ, କେତେକ ସ୍ୱେଚ୍ଛାସେବୀ ମାନସିକ ବିକାରଗ୍ରସ୍ତଙ୍କ ସେବା କରୁଛନ୍ତି । ସରକାରୀସ୍ତରରେ ଥଇଥାନ ବ୍ୟବସ୍ଥା ନଥିବାରୁ ଅନେକ ସ୍ୱେଚ୍ଛାସେବୀ ଆଗକୁ ଆସିବାକୁ ଆଗଭର ହେଉନାହାଁନ୍ତି । ମହିଳା ଓ ଶିଶୁ ନିର୍ଯାତନା ରୋକିବା ପାଇଁ ବହୁ ନିୟମ ରହିଛି । ତାକୁ କାର୍ଯ୍ୟକାରୀ କରୁଥିବା ଅଧିକାରୀମାନେ କୌଣସି ପଦକ୍ଷେପ ନେଉନାହାନ୍ତି । ଫଳରେ ସେମାନଙ୍କ ମାନାବାଧିକାର କ୍ଷୁଣ୍ଣ ହେଉଛି । ଜିଲ୍ଲା ସାମାଜିକ ସୁରକ୍ଷା ଅଧିକାରୀ ତରୁଣ ତପନ ପ୍ରହରାଜଙ୍କୁ ପଚାରିବାରୁ କହିଛନ୍ତି, ଏହି ଦିବସ ପାଳନ ଲାଗି କୌଣସି ସରକାରୀ ନିର୍ଦ୍ଦେଶ ନାହିଁ ।
