ନୂଆଦିଲ୍ଲୀ, ୧୦/୧୧ : ସ୍ପେନ୍ର ମହାନ ଚିତ୍ରକାର ପାବ୍ଲୋ ପିକାସୋଙ୍କର ପ୍ରସିଦ୍ଧ ପେଣ୍ଟିଂ ‘ଓମ୍ୟାନ୍ ୱିଥ୍ ଏ ୱାଚ୍’ ନ୍ୟୁୟର୍କର ସୋଥ୍ବାଏଜ୍ ନିଲାମଗୃହରେ ୧୩.୯ କୋଟି ଡଲାରରେ ବିକ୍ରି ହୋଇଛି। ଭାରତୀୟ ମୁଦ୍ରାରେ ଏହାର ମୂଲ୍ୟ ୧୧.୫୭ ଅରବରୁ ଅଧିକ । ସାରା ବିଶ୍ୱରେ ଚଳିତ ବର୍ଷ ନିଲାମ ହୋଇଥିବା ପେଣ୍ଟିଂ ମଧ୍ୟରେ ଏହା ସବୁଠୁ ମହଙ୍ଗା ଚିତ୍ରକଳାର ଟାଇଟଲ୍ ପାଇଛି । ଏହା ପିକାସୋଙ୍କର ୨ୟ ସବୁଠୁ ମହଙ୍ଗା ଚିତ୍ରକଳା ।
୨୦୧୫ ମସିହାରେ ତାଙ୍କର ଏକ ଚିତ୍ରକଳା ୧୭.୩ କୋଟି ଡଲାରରେ ନିଲାମ ହୋଇଥିଲା । ‘ଓମ୍ୟାନ୍ ୱିଥ୍ ଦ ୱାଚ୍’ ଚିତ୍ରକଳାକୁ ପିକାସୋ ୧୯୩୨ ମସିହାରେ ପ୍ରସ୍ତୁତ କରିଥିଲେ। ଏଥିରେ ସେ ଫ୍ରାନ୍ସର ମଡେଲ ମ୍ୟାରି-ଥେରେସୀ ୱାଲ୍ଟରଙ୍କ ଚିତ୍ର ଆଙ୍କିଥିଲେ। ମ୍ୟାରି ପିକାସୋଙ୍କର ପ୍ରେମିକା ଥିଲେ। ପିକାସୋ ନିଜର ଅନେକ କଳାକୃତିରେ ତାଙ୍କୁ ସ୍ଥାନ ଦେଇଛନ୍ତି । ଏହି ପେଣ୍ଟିଂରେ ସେ ମ୍ୟାରିଙ୍କୁ ସିଂହାସନ ଭଳି ଚେୟାରରେ ବସାଇଛନ୍ତି । ନିଲାମ ପୂର୍ବରୁ ପେଣ୍ଟିଂର ମୂଲ୍ୟ ୧୨ କୋଟି ଡଲାର ହେବ ବୋଲି ଅନୁମାନ କରାଯାଇଥିଲା । ପ୍ରଥମେ ପେଣ୍ଟିଂଟି ଏମିଲି ଫିଶର ଲ୍ୟାଣ୍ଡୋଙ୍କ ପାଖରେ ଥିଲା । ୧୯୬୮ ମସିହାରେ ସେ ଏହାକୁ କିଣିଥିଲେ ।
ପିକାସୋଙ୍କ ‘ଗୋଲ୍ଡେନ୍ ମ୍ୟୁଜ୍’ ରୂପେ ପରିଚିତ ମ୍ୟାରି ଥେରେସୀ ୱାଲ୍ଟର ୧୭ ବର୍ଷ ବୟସରେ ୪୫ ବର୍ଷୀୟ ପିକାସୋଙ୍କୁ ଭେଟିଥିଲେ । ଏହା ପରେ ତାଙ୍କୁ ପ୍ରେମ କରିବସିଲେ । କିନ୍ତୁ ତାଙ୍କ ବିବାହ ୟୁକ୍ରେନର ବ୍ୟାଲେରିନା ଓଲ୍ଗା ଖୋଖଲୋୱାଙ୍କ ସହ ହୋଇସାରିଥିଲା । ଏହା ପରେ ମ୍ୟାରି ପିକାସୋଙ୍କର ଅନେକ ପେଣ୍ଟିଂର ବିଷୟ ହେଲେ । ୧୯୩୨ ମସିହାର ତାଙ୍କ କୃତି ‘ଫେମ୍ ନ୍ୟୁ କାଉଚି’ ମଧ୍ୟ ତନ୍ମଧ୍ୟରେ ଅନ୍ୟତମ, ଯାହା ୨୦୨୨ ମସିହାରେ ୬.୭୫ ଲକ୍ଷ ଡଲାରରେ ନିଲାମ ହୋଇଥିଲା । ୧୮୮୧ ମସିହା, ସ୍ପେନ୍ର ମଲାଗାରେ ଜନ୍ମିତ ପିକାସୋ ବାର୍ସିଲୋନାରେ ବଢ଼ିଥିଲେ । ୧୯୦୪ରେ ସେ ପ୍ୟାରିସ୍ ଚାଲିଗଲେ । ଧୀରେ ଧୀରେ ସେ ବିଂଶ ଶତାବ୍ଦୀର ସବୁଠୁ ପ୍ରସିଦ୍ଧ କଳାକାର ଭାବେ ଖ୍ୟାତି ଅର୍ଜନ କଲେ ।
