ଭୁବନେଶ୍ୱର,୨୯/୦୨: ରାଜ୍ୟ ସରକାର ଦୁର୍ନୀତିରେ ବୁଡ଼ି ରହିଛନ୍ତି । ସରକାରୀ ଯୋଜନାରେ ୪୦ ପ୍ରତିଶତ ପିସି ନିଆଯାଉଛି । ଖଣି ଦୁର୍ନତି, ପାଣି ଦୁର୍ନୀତିଠୁ ଆରମ୍ଭ କରି ଚିଟଫଣ୍ଡ, ଜମି, ଡାଲି, ବିଜୁଳି, ଛାତ୍ରବୃତ୍ତି ପ୍ରମୁଖ ସମସ୍ତ କ୍ଷେତ୍ରରେ ବ୍ୟାପକ ଦୁର୍ନୀତି ହୋଇଛି । ଏସବୁ ଦୁର୍ନୀତି ପାଇଁ ରାଜ୍ୟ ସରକାର ଏକ ଦୁର୍ନୀତିଖୋର ସରକାର ବୋଲି ସ୍ପଷ୍ଟ ହୋଇଛି । ଓଡ଼ିଶାର ସାଧାରଣ ଜନତାଙ୍କ ସ୍ୱାର୍ଥ ବିରୋଧୀ ରାଜ୍ୟ ସରକାରକୁ ହଟାଇବା ପାଇଁ ଆସନ୍ତା ୧ ତାରିଖରେ ନବୀନ ନିବାସ ଘେରାଉ କରିବ ଯୁବକଂଗ୍ରେସ ।
ଏହି ଘେରାଉ କାର୍ଯ୍ୟକ୍ରମ ପାଇଁ "ନବୀନ ହଟାଅ, ଓଡ଼ିଶା ବଞ୍ଚାଅ’ ଆହ୍ୱାନ ଦେଇଛି ଯୁବକଂଗ୍ରେସ । ବୁଧବାର ଏହାର ଲୋଗୋ ଉନ୍ମୋଚନ କରିଛି । ଏହି ଘେରାଉ କାର୍ଯ୍ୟକ୍ରମରେ ଯୁବ କଂଗ୍ରେସ ରାଷ୍ଟ୍ରୀୟ ସଭାପତି ବି. ଭି. ଶ୍ରୀନିବାସ ଏବଂ ପିସିସି ସଭାପତି ଶରତ ପଟ୍ଟନାୟକ ଯୋଗଦେବାର କାର୍ଯ୍ୟକ୍ରମ ରହିଛି ବୋଲି ରାଜ୍ୟ ଯୁବ କଂଗ୍ରେସ ସଭାପତି ରଣଜିତ୍ ପାତ୍ର ସୂଚନା ଦେଇଛନ୍ତି । ଏହାକୁ ସଫଳ କରିବାକୁ ଶ୍ରୀ ପାତ୍ର ଅନୁରୋଧ କରିଛନ୍ତି । ସମ୍ମିଳନୀରେ ଯୁବ କଂଗ୍ରେସ ରାଷ୍ଟ୍ରୀୟ ସାଧାରଣ ସମ୍ପାଦକ ତଥା ଓଡ଼ିଶା ପ୍ରଭାରୀ ମିଲିନ୍ଦ ଗୌତମ, ଯୁବ କଂଗ୍ରେସ ମିଡିଆ ସେଲ୍ ଅଧ୍ୟକ୍ଷ ସୁଦୀପ ସାମଲ, ରାଜ୍ୟ ସାଧାରଣ ସମ୍ପାଦକ ନିହାର ରଞ୍ଜନ ବେହେରା, ଗୋପନ ମାର୍ଥା, ପିସିସି ସାଧାରଣ ସମ୍ପାଦକ ମନୋଜ ବିଶ୍ୱାଳ, ଭୁବନେଶ୍ୱର ଜିଲ୍ଲା ଯୁବ କଂଗ୍ରେସ ସଭାପତି ମହମ୍ମଦ ଗୁଲଫାମ, ସ୍ୱାଗତ କର ପ୍ରମୁଖ ଉପସ୍ଥିତ ଥିଲେ