ଜୁରିଖ୍‌,୦୧/୦୯: ବିଶ୍ୱ ଚାମ୍ପିଅନ୍‌ ତଥା  ଭାରତର ଜାଭେଲିନ୍‌ ତାରକା ନୀରଜ ଚୋପ୍ରା ଜୁରିଖ୍‌ ଡାଏମଣ୍ଡ୍‌ ଲିଗ୍‌ରେ ରୌପ୍ୟ ପଦକ ହାସଲ କରିଛନ୍ତି । ସେ ନିଜର ଚତୁର୍ଥ ପ୍ରୟାସରେ ୮୫.୭୧  ମିଟର ଦୂରକୁ ଜାଭେଲିନ ଫିଙ୍ଗି ଦ୍ୱିତୀୟ ସ୍ଥାନରେ ସନ୍ତୁଷ୍ଟ ହୋଇଥିଲେ। ଚେକ୍‌ ଗଣରାଜ୍ୟର ଜାକୁବ  ଭାଲ୍‌ଡେଚ୍‌ ୮୫.୮୬ମିଟର ସହ ସ୍ୱର୍ଣ୍ଣ ପଦକ ଜିତିଥିବାବେଳେ ଜର୍ମାନୀର ଜୁଲିଆନ୍‌ ୱେବର ୮୫.୦୪ମିଟର ସହ ବ୍ରୋଞ୍ଜ ପଦକ ହାସଲ କରିଛନ୍ତି । 

ଗୁରୁବାର ନୀରଜଙ୍କ ପ୍ରଥମ ଥ୍ରୋ ୮୦.୭୯ମିଟର  ରହିଥିଲା । ଏହାପରେ ତାଙ୍କର ପରବର୍ତ୍ତୀ ୨ଟି ଯାକ  ଥ୍ରୋ ଫାଉଲ୍‌ ହୋଇଥିଲା । ଫଳରେ ୩ ରାଉଣ୍ଡ ସୁଦ୍ଧା  ସେ ପଞ୍ଚମ ସ୍ଥାନରେ ରହିଥିଲେ । ଚତୁର୍ଥ ପ୍ରୟାସରେ  ନୀରଜ ୮୫.୨୨ମିଟର ଦୂର ଜାଭେଲିନ ଫିଙ୍ଗି ପଦକ ପକ୍କା କରି ଦେଇଥିଲେ । ତେବେ ତାଙ୍କର ଅନ୍ତିମ  ପ୍ରୟାସ ୮୫.୭୧ ମିଟର ରହିଥିଲା ।  ପୁରୁଷ ଲଙ୍ଗଜମ୍ପ ଇଭେଣ୍ଟରେ ଭାରତର ମୂରଲୀ ଶ୍ରୀଶଙ୍କର ୭.୯୯ମିଟର ଦୂର ଜମ୍ପ ସହ ପଞ୍ଚମ  ସ୍ଥାନରେ ସନ୍ତୁଷ୍ଟ ହୋଇଛନ୍ତି । ସେ ନିଜର ପ୍ରଥମ  ପ୍ରୟାସ ଏହି ଦୂରତା ଛୁଇଁଥିଲେ । ବିଶ୍ୱ ଚାମ୍ପିଅନ୍‌  ଗ୍ରୀସ୍‌ରେ ମିଲ୍‌ଟିଆଡିସ୍‌ ଟେଣ୍ଟୋଗ୍ଲୋ ୮.୨୦ମିଟର  ଦୂର ଜମ୍ପ କରି ସ୍ୱର୍ଣ୍ଣ ପଦକ ଜିତିଥିବାବେଳେ  ଜାମାଇକାର ତାଜୟ ଗେଲ ୮.୦୭ମିଟର ସହ  ରୌପ୍ୟ ଏବଂ ଆମେରିକାର ଜାରିୟନ ଲସନ୍‌  ୮.୦୫ମିଟର ସହ ବ୍ରୋଞ୍ଜ ପଦକ ଜିତିଛନ୍ତି ।