ତେଲକୋଇ,୧୬/୦୯: ଦୁଇଟି ଘର ଭାଙ୍ଗି ଧାନଚାଉଳ ଖାଇବା ସହ ଦଶ ହଜାର ଟଙ୍କା ଖାଇଗଲେ ୫ ଟିକିଆ ହାତୀପଲ । ଅଳ୍ପକେ ବର୍ତ୍ତିଲେ ଘର ଭିତରେ ଶୋଇଥିବା ପରିବାର ଲୋକେ । କେନ୍ଦୁଝର ଜିଲ୍ଲା ତେଲକୋଇ ରେଞ୍ଜ ଅଧୀନ ତେଲକୋଇ ଫରେଷ୍ଟ ବିଟ୍‌ର ବେଣା ଗାଁରେ ଏଭଳି ଘଟଣା ଘଟିଛି ।

ସୂଚନା ମୁତାବକ, ରବିବାର ବିଳମ୍ୱିତ ରାତି ପ୍ରାୟ ୧୧ ଟା ବେଳକୁ ପାଞ୍ଚ ଟିକିଆ ହାତୀପଲ ବେଣା ଗାଁ ମୁଣ୍ଡା ସାହିରେ ଧଶେଇ ପଶିଥିଲେ । ପ୍ରଥମେ ଉକ୍ତ ଗାଁର ରବିନ୍ଦ୍ର ପାତ୍ରଙ୍କ ବାଇଗଣ ବାଡିକୁ ଦଳି ମକଚି ନଷ୍ଟ କରିଥିଲେ । ଏହି ସମୟରେ ରବିନ୍ଦ୍ର ତାଙ୍କ ପରିବାର ସହ ଘରେ ଶୋଇଥିଲେ । ପରେ ତାଙ୍କ ଘର ଭାଙ୍ଗି ଧାନଚାଉଳ ଟେକି ନେଇଯାଇଥିଲେ ହାତୀପଲ । ଏହା ସହ ଧାନ ଡୋଲି ଭିତରେ ରବିନ୍ଦ୍ର ରଖିଥିବା ଦଶ ହଜାର ଟଙ୍କାକୁ ମଧ୍ୟ ଧାନ ସହ ଖାଇଯାଇଥିଲେ ହତୀପଲ । ହାତୀପଲ ଘର ଭାଙ୍ଗିବା ଦେଖି ପରିବାର ଲୋକେ ଘର ଛାଡ଼ି ପଳାଇଥିଲେ । 

ଅନ୍ୟପଟେ ଏହି ୫ଟିକିଆ ହାତୀପଲ ବାବୁରାମ ମୁଣ୍ଡାଙ୍କ ଘର ଭାଙ୍ଗି ଦେବା ସହ ହାଣ୍ଡି ଡେକଚିକୁ ମଧ୍ୟ ହାତୀ ପଲ ଭାଙ୍ଗି ଦେଇଥିଲେ । ତେବେ ଏହି ଦୁଇ ପୀଡ଼ିତ ପରିବାରକୁ ବନବିଭାଗ ସହାୟତା ଯୋଗାଇ ଦେବା ପାଇଁ ଗ୍ରାମବାସୀ ଦାବି କରିଛନ୍ତି ।