ନୂଆଦିଲ୍ଲୀ ୨୮/୦୮: ବାଡ଼ମେରରେ ସୀମା ଅତିକ୍ରମ କରି ଜଣେ ପାକିସ୍ତାନୀ ନାଗରିକ ଭାରତରେ ପ୍ରବେଶ କରିଛନ୍ତି । ତେବେ ଏହାର କାରଣ ସେ ଯାହା କହିଛନ୍ତି, ଶୁଣିଲେ ଆପଣ ବି ଚକିତ ହେବେ । ରାତିରେ ଦୌଡ଼ିବା ସମୟରେ ସେ ରାସ୍ତା ଭୁଲି ଭାରତୀୟ ସୀମାର ୧୫ କିମି ଭିତରକୁ ଝଡ଼ପା ଗାଁରେ ପହଞ୍ଚିଗଲେ । ସକାଳେ ଗାଁ ଲୋକ ତାଙ୍କୁ ଦେଖି ପଚରାଉଚରା କରିବାରୁ ସେ ପାକିସ୍ତାନର ଥାରପାରକର ଯିବାକୁ ବସ୍ ଠିକଣା ପଚାରିଲେ । ଏହା ପରେ ଗାଁ ଲୋକେ ତାଙ୍କୁ ବିଏସ୍ଏଫ୍କୁ ଧରାଇଦେଲେ ।
ବାଡ଼ମେର ଏସ୍ପି ନରେନ୍ଦ୍ର ସିଂହ ମୀଣା କହିଛନ୍ତି, ଭାରତୀୟ କ୍ଷେତ୍ରକୁ ପଶି ଆସିଥିବା ପାକ୍ ନାଗରିକଙ୍କ ନାଁ ଜଗସୀ ପୁତ୍ର ପରଶୁରାମ । ଗତ ୨୪ ତାରିଖ ରାତିରେ ପାକ୍ ସୀମାରେ ସ୍ଥିତ ଏକ ଗାଁକୁ ନିଜ ପ୍ରେମିକାଙ୍କୁ ସେ ଦେଖା କରିବାକୁ ଯାଇଥିଲେ । ପ୍ରେମିକାଙ୍କ ଘର ଲୋକ ଏ ବିଷୟରେ ଜାଣିବା ପରେ ସେ ସେଠାରୁ ଲୁଚି ପଳାଇଲେ । ବୋଧହୁଏ ଭୟରେ ତାରବାଡ଼ ପାର କରି ସେ ଭାରତୀୟ ସୀମାକୁ ପଶି ଆସିଥିଲେ । ରାତି ପ୍ରାୟ ୨.୪୮ରେ ସେ ବିଏସ୍ଏଫ୍ କ୍ୟାମେରାରେ ନଜର ଆସିଥିଲେ । ତାଙ୍କ ପାଖରୁ ୨ ସିମ୍ ଥିବା ଏକ ମୋବାଇଲ ଫୋନ୍ ଓ ଏକ ଡାଏରୀ ମିଳିଛି । ଗତ ୩ ଦିନରୁ ଆଇବି, ସିଆଇଡିସିବି, ବିଏସ୍ଏଫ୍ ସମେତ ଅନେକ ସୁରକ୍ଷା ଏଜେନ୍ସି ପାକ୍ ନାଗରିକଙ୍କୁ ପଚରାଉଚରା କରୁଛି ।
୨୧ ବର୍ଷୀୟ ପାକ୍ ନାଗରିକ ଜଗସୀ ଥାରପାରକର ଜିଲ୍ଲାର ଖାରୋଡା ଗାଁର ବାସିନ୍ଦା । ଏହି ଗାଁ ଭାରତ ସୀମାଠୁ ୩୫ କିମି ଦୂର ପାକିସ୍ତାନରେ ଅବସ୍ଥିତ । ଭାରତର ନବାତଲା ସୀମାରୁ ମାତ୍ର ୭ କିମି ଦୂର ଘୋରାମାରୀ ଗାଁରେ ତାଙ୍କ ପ୍ରେମିକା ରହୁଛନ୍ତି । ଉଭୟଙ୍କ ମଧ୍ୟରେ ୨୦୨୦ ମସିହାରୁ ପ୍ରେମ ବ୍ୟାପାର ଚାଲିଥିଲା । ସେଦିନ ରାତିରେ ସେ ପ୍ରେମିକାକୁ ଦେଖା କରିବାକୁ ଯାଇ ତାଙ୍କ ସହ ପଳାୟନ କରିବାକୁ ଜିଦ୍ କଲେ । କିନ୍ତୁ ପ୍ରେମିକା ସିଧା ମନା କରିଦେଲେ । ଇତିମଧ୍ୟରେ ପ୍ରେମିକାଙ୍କ ପରିଜନ ଏ ବିଷୟରେ ଖବର ପାଇଗଲେ । ଏହା ପରେ ଜଗସୀ ସେଠାରୁ ପଳାୟନ କଲେ । ପ୍ରେମିକା ସାଙ୍ଗରେ ନ ଯିବାରୁ ଜଗସୀଙ୍କ ହୃଦୟ ଭାଙ୍ଗିଗଲା । ସେ ଆତ୍ମହତ୍ୟା କରିବାକୁ ନିଷ୍ପତ୍ତି ନେଇଥିବା ପୁଲିସକୁ କହିଛନ୍ତି । ପ୍ରେମିକା ଘରୁ ଓଢ଼ଣି ନେଇ ସେ ସେଠାରୁ ଚାଲିଆସିଲେ । ଓଢ଼ଣିକୁ ଗଛରେ ବାନ୍ଧି ଆତ୍ମହତ୍ୟା କରିବାକୁ ମଧ୍ୟ ଚେଷ୍ଟା କଲେ । କିନ୍ତୁ ଗଛ ଡାଳ ଭାଙ୍ଗିଯିବାରୁ ସେ ବଞ୍ଚିଗଲେ । ପ୍ରେମିକାଙ୍କ ଘର ଲୋକ ପିଛା କରିବାରୁ ସେ ଭାରତର ସୀମା ଭିତରେ ପଶିଗଲେ ।
