ନୂଆଦିଲ୍ଲୀ: ବିଭବ କୁମାରଙ୍କୁ ସୁପ୍ରିମକୋର୍ଟରୁ ଜାମିନ ମିଳିବା ପରେ ଆପ୍ ସାଂସଦ ସ୍ବାତୀ ମାଲିଓ୍ବାଲଙ୍କ ‘ବସ୍ତ୍ରହରଣ’ ଟ୍ବିଟ୍କୁ ନେଇ ଚର୍ଚ୍ଚା ଆରମ୍ଭ ହୋଇଯାଇଛି । ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲଙ୍କ ପୂର୍ବତନ ସହାୟକ ବିଭବ କୁମାର ତାଙ୍କୁ ମାଡ଼ ମାରିଥିଲେ ବୋଲି ସ୍ବାତୀ ମାଲିଓ୍ବାଲ ଅଭିଯୋଗ ଆଣିଥିଲେ । ତାଙ୍କର ଅଭିଯୋଗ କ୍ରମେ ପୋଲିସ ମାମଲା ରୁଜୁ କରିବା ସହ ବିଭବ କୁମାରଙ୍କୁ ଗିରଫ କରିଥିଲା । ଗତାକାଲି (ସୋମବାର) ସୁପ୍ରିମକୋର୍ଟ ତାଙ୍କୁ ଜାମିନ ଦେଇଛନ୍ତି ।
ଆଜି ସ୍ବାତୀ ମାଲିଓ୍ବାଲ ଟ୍ବିଟରରେ କେବଳ ଏକ ଫଟୋ ପୋଷ୍ଟ କରିଛନ୍ତି । ମହାଭାରତରେ ଦ୍ରୌପଦୀଙ୍କ ବସ୍ତ୍ରହରଣ ଫଟୋ ଶେୟାର କରିବା ସହ ଏଥିରେ କୌଣସି କ୍ୟାପ୍ସନ ଦେଇ ନାହାନ୍ତି ସ୍ବାତୀ । ହିନ୍ଦୁ ମହାକାବ୍ୟ ‘ମହାଭାରତ’ ଅନୁସାରେ, କୌରବ ସଭାରେ ଦୁଶାସନ ପାଞ୍ଚାଳୀଙ୍କ ବସ୍ତ୍ରହରଣ କରିଥିଲେ । ଶେଷରେ ଭଗବାନ ଶ୍ରୀକୃଷ୍ଣ ପାଞ୍ଚାଳୀଙ୍କ ସମ୍ମାନ ରକ୍ଷା କରିଥିଲେ । ପରେ କୌରବଙ୍କ ବିରୋଧରେ ଯୁଦ୍ଧ ସମୟରେ ପାଣ୍ଡବଙ୍କ ମାର୍ଗଦର୍ଶକ ସାଜିଥିଲେ କୃଷ୍ଣ । ତେବେ ସ୍ବାତୀ ମାଲିଓ୍ବାଲଙ୍କ ‘ବସ୍ତ୍ରହରଣ’ ପୋଷ୍ଟ ଏବେ ଚର୍ଚ୍ଚାର ପ୍ରସଙ୍ଗ ପାଲଟିଛି ।
— Swati Maliwal (@SwatiJaiHind) September 3, 2024
ସୂଚନାଯୋଗ୍ୟ, ୨୦୨୪ ମେ ୧୩ରେ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲଙ୍କ ପୂର୍ବତନ ବ୍ୟକ୍ତିଗତ ସହାୟକ ବିଭବ କୁମାର ଦୁର୍ବ୍ୟବହାର କରିଥିବା ନେଇ ଅଭିଯୋଗ କରିଥିଲେ ସ୍ବାତୀ ମାଲିଓ୍ବାଲ । ମୁଖ୍ୟମନ୍ତ୍ରୀଙ୍କ ବାସଭବରେ ତାଙ୍କ ସହ ଦୁର୍ବ୍ୟବହାର ଏବଂ ମାଡ଼ ମରାଯାଇଥିବା ନେଇ ଅଭିଯୋଗ ଆଣିଥିଲେ ଆପ୍ ସାଂସଦ । ଏହା ପରେ ମୁଖ୍ୟମନ୍ତ୍ରୀ କେଜ୍ରିଓ୍ବାଲଙ୍କ ବାସଭବନରୁ ବିଭବ କୁମାରଙ୍କୁ ଗିରଫ କରିଥିଲା ପୋଲିସ । ତେବେ ବିଭବ କୁମାରଙ୍କୁ ସୁପ୍ରିମକୋର୍ଟ ବେଲ୍ ଦେଇଥିବା ବେଳେ ମୁଖ୍ୟମନ୍ତ୍ରୀଙ୍କ ବାସଭବନ ନଯିବାକୁ କହିଛନ୍ତି । ସେପଟେ ମାମଲାରେ ତଦନ୍ତ ଜାରି ରହିଥିବା ବେଳେ ମାମଲାକୁ ନେଇ ପ୍ରତିକ୍ରିୟା ନଦେବାକୁ ବିଭବ କୁମାରଙ୍କୁ କୋର୍ଟ ନିର୍ଦ୍ଦେଶ ଦେଇଛନ୍ତି ।
