କାଶୀପୁର ୨୦/୦୯: କାଶୀପୁର ତହସିଲ କାର୍ଯ୍ୟାଳୟରେଆଜକୁ ପ୍ରାୟ ୬ ମାସରୁ ଅଧିକ ଦିନ ହେଲା ଅତିରିକ୍ତ ତହସିଲଦାର ଆସନ ଖାଲି ପଡ଼ିଛି । ଅତିରିକ୍ତ ତହସିଲଦାର ଆସନ ଖାଲି ପଡ଼ିଥିବାରୁ ଛାତ୍ରଛାତ୍ରୀ ମାନେ ଜାତିଗତ ସହିତ ଅନ୍ୟ ପ୍ରମାଣପତ୍ର ପାଇବାରେ ଅସୁବିଧାର ସମ୍ମୁଖୀନ ହେଉଛନ୍ତି । ସେହିପରି ଖଣି ଖାଦନରେ ପରିପୂର୍ଣ୍ଣ ଥିବା ଏହି ଅଞ୍ଚଳରେ ବିଭିନ୍ନ ସମୟରେ ଆଇନ ଶୃଙ୍ଖଳା ପରିସ୍ଥିତି ସୃଷ୍ଟି ହେଉଥିବାରୁ ଶାନ୍ତି ରକ୍ଷାରେ ତହସିଲଦାରଙ୍କୁ ମାଜିଷ୍ଟ୍ରେଟ ଦାୟିତ୍ୱ ସହ ଜମିବାଡ଼ିର କିଣାବିକାରେ ଜମି ରେଜିଷ୍ଟ୍ରେସନ କାର୍ଯ୍ୟ ତୁଲାଇବାକୁ ପଡୁଛି । ଜଣେ ମାତ୍ର ତହସିଲଦାରଙ୍କୁ ଏସବୁ ଦାୟିତ୍ୱ ସମ୍ଭାଳିବାରେ ଅସୁବିଧା ହେଉଛି । ତହସିଲଦାରଙ୍କ କାର୍ଯ୍ୟବହୁଳରୁ ନିୟମିତ ଭାବେ କାର୍ଯ୍ୟାଳୟରେ ଉପସ୍ଥିତ ରହି ପାରୁନଥିବାର ଜଣା ଯାଇଛି । ଯାହା ଫଳରେ ସରକାରୀ କାର୍ଯ୍ୟରେ ବାଧା ପ୍ରାପ୍ତ ହେଉଥିବାର ଅଭିଯୋଗ ହେଉଛି। ପୂର୍ବରୁ ଏଠାରେ ଥିବା ଅତିରିକ୍ତ ତହସିଲଦାର ବରିଆଲ ମୁର୍ମୁ ଗତ ଅକ୍ଟୋବର ମାସରେ କାର୍ଯ୍ୟରେ ଯୋଗ ଦେଇଥିଲେ । କିନ୍ତୁ ଶ୍ରୀ ମୁର୍ମୁ ଏଠାରେ କିଛି ମାସ ରହିବା ପରେ ପଦୋନ୍ନତି ହେବାରୁ  ଏହି ପଦବିଟି ଖାଲି ପଡ଼ିଛି । ଅତିରିକ୍ତ ତହସିଲଦାର ପଦବି ସହ ଖାଲି ପଡ଼ିଥିବା ଅନ୍ୟ ପଦବି ପୂରଣ ପାଇଁ ଅଞ୍ଚଳବାସୀଙ୍କ ପକ୍ଷରୁ ବାରମ୍ବାର ଦାବି ହେଉଥିଲେ ସୁଦ୍ଧା କାର୍ଯ୍ୟକାରୀ ହେଉ ନଥିବାର ଅଭିଯୋଗ ହୋଇଚି । ଜିଲ୍ଲା ପ୍ରଶାସନ ଏଥିପ୍ରତି ଦୃଷ୍ଟି ଦେବାକୁ ଦାବି ହେଉଛି।