ନୂଆଦିଲ୍ଲୀ ୩୦/୦୮: ଆଫଗାନିସ୍ତାନରେ ଏବେ ନୂଆ ଲଢ଼େଇ ଆରମ୍ଭ ହୋଇଛି । ତାଲିବାନ ସରକାର ମହିଳାଙ୍କର ସାର୍ବଜନୀନ ସ୍ଥାନରେ ଗୀତ ଗାଇବା କିମ୍ବା ଅଧ୍ୟୟନ ଉପରେ କଟକଣା ଲାଗୁ କରିଛନ୍ତି । ଏ ନେଇ ବିଧିବଦ୍ଧ ଆଇନ କରିଛନ୍ତି ଏବଂ ଏହାର ଉଲ୍ଲଂଘନରେ ଦଣ୍ଡ ମଧ୍ୟ ଘୋଷଣା କରିଛନ୍ତି । ଏବେ ଏହି ଆଇନକୁ ବିରୋଧ କରି ଦେଶର ମହିଳା ସୋସିଆଲ ମିଡିଆରେ ସେମାନଙ୍କ କ୍ରୋଧ ପ୍ରକାଶ କରୁଛନ୍ତି । ବୁର୍କା ପିନ୍ଧି ଭିଡିଓ ପ୍ରସ୍ତୁତ କରୁଛନ୍ତି । ମନ ଖୋଲି ଗୀତ ଗାଉଛନ୍ତି ଏବଂ ତାକୁ ସୋସିଆଲ ମିଡିଆରେ ଅପ୍ଲୋଡ କରୁଛନ୍ତି ।
ଇରାନରେ ପୂର୍ବରୁ ଏଭଳି ଦୃଶ୍ୟ ଦେଖିବାକୁ ମିଳିଥିଲା, ଯେତେବେଳେ ଇରାନ ସରକାର ଫ୍ୟାଶନେବଲ ପୋଷାକ ପିନ୍ଧିବା ନେଇ ମହିଳାଙ୍କ ଉପରେ କଟକଣା ଲାଗୁ କରିଥିଲେ । ଏହାର ପ୍ରତିକ୍ରିୟାରେ ତମାମ ମହିଳା ସର୍ବସାଧାରଣରେ ଫ୍ୟାଶନେବଲ ପୋଷାକ ପିନ୍ଧି ସୋସିଆଲ ମିଡିଆରେ ଭିଡିଓ ଶେୟାର କରିଥିଲେ । ରାସ୍ତାକୁ ଓହ୍ଲାଇ ଆନ୍ଦୋଳନ ମଧ୍ୟ କରିଥିଲେ । ଏବେ ଠିକ୍ ସେହିଭଳି ବିଦ୍ରୋହ ତାଲିବାନ ସରକାରଙ୍କ ବିରୋଧରେ ଆରମ୍ଭ ହୋଇଛି ।
Raise Your Voice for Freedom Of Women!
— Jahanzeb Wesa (@JahanzebWesa) August 27, 2024
—This is the answer of brave Afghan women’s on the Taliban's new laws.
—Afghan women are boldly countering Taliban’s New Draconian law by singing out louder than ever.#MyVoiceIsNotForbiden #WomenRights #UN pic.twitter.com/xszvCV0Rvp
ସୋସିଆଲ ମିଡିଆରେ ଏ ପ୍ରକାର ବିରୋଧ କରୁଥିବା ମହିଳାଙ୍କର ଅସଂଖ୍ୟ ଭିଡିଓ ଦେଖିବାକୁ ମିଳୁଛି । ଏଥିରେ ସେମାନେ ବୁର୍କା ପିନ୍ଧି ମନ ଖୋଲି ଗୀତ ଗାଉଛନ୍ତି । ସରକାରଙ୍କୁ ଟାର୍ଗେଟ୍ କରୁଛନ୍ତି । ବୁଲେଟ୍ର ଜବାବ ଗୀତ ଜରିଆରେ ଦେବାକୁ ଚେଷ୍ଟା କରୁଛନ୍ତି । କିନ୍ତୁ ତାଲିବାନ ସରକାରଙ୍କୁ ଏତେ ଭୟ ଯେ ସେମାନେ ନିଜର ପରିଚୟ ଲୁଚାଉଛନ୍ତି । ଭିଡିଓରେ ମହିଳା ସେମାନଙ୍କ ଚେହେରା ଓ ଶରୀର ସମ୍ପୂର୍ଣ୍ଣ ରୂପେ ଢାଙ୍କିଥିବା ନଜର ଆସିଛନ୍ତି । ଭିଡିଓରେ ତାଲିବାନ ଶାସନରେ ମହିଳାଙ୍କ ଉପରେ ହେଉଥିବା ଅତ୍ୟାଚାର କଥା ରହିଛି । ୨୦୨୧ ମସିହାରେ ତାଲିବାନ ସରକାରକୁ ଆସିବା ପରେ ମହିଳାଙ୍କ ଜୀବନ ନର୍କ ହୋଇଥିବା ସେମାନେ ଗୀତ ଜରିଆରେ ବର୍ଣ୍ଣନା କରୁଛନ୍ତି । ତାଲିବାନ ସରକାରରେ ମହିଳାଙ୍କୁ ବାହାରକୁ ବାହାରିବା ମନା । ପଢ଼ିବାରେ କଟକଣା । ନିଜ ଇଚ୍ଛାରେ ପୋଷାକ ପିନ୍ଧିବା ମନା । ଆଗକୁ ସରକାର ସେମାନଙ୍କୁ ଖାଇବାକୁ ଦେବେ ନାହିଁ ବୋଲି ସେମାନେ କହୁଛନ୍ତି ।
Once again, Afghan women are raising their voices to oppose the ban. "You have silenced my voice until further notice, but my voice is not 'Awra,'" sings an Afghan woman. pic.twitter.com/cU7JhSpZ9D
— Zubaida Akbar (@ZubaidaAKBR) August 26, 2024
ସୂଚନାଯୋଗ୍ୟ, ଗତ ବୁଧବାର ତାଲିବାନ ସରକାର ନୂଆ ଆଇନ ଘୋଷଣା କରିଛନ୍ତି । ଏଥିରେ ସ୍ପଷ୍ଟ ହୋଇଛି, କୌଣସି ମହିଳା ଚେହେରା ନ ଢାଙ୍କି ଘରୁ ବାହାରି ପାରିବେ ନାହିଁ । ପୂରା ଶରୀରକୁ ଢାଙ୍କି ସେମାନଙ୍କୁ ବାହାରକୁ ଯିବାକୁ ପଡ଼ିବ । ସେମାନଙ୍କ ସ୍ୱର ଯେମିତି ବାହାରକୁ ନ ବାହାରେ, ତା’ଉପରେ ବି କଟକଣା ଲାଗୁ ହୋଇଛି । ନୂଆ ଆଇନ ଅନୁସାରେ ମହିଳା ସାର୍ବଜନୀନ ରୂପେ କୁରାନ ପଢ଼ିପାରିବେ ନାହିଁ । ସେମାନଙ୍କ ପୋଷାକ ପତଳା, ଡିଜାଇନର୍ କିମ୍ବା ଛୋଟ ହେବା ଉଚିତ୍ ନୁହେଁ । ଘର ଭିତରେ ମଧ୍ୟ ସେମାନେ ଉଚ୍ଚ ସ୍ୱରରେ କଥା ହୋଇପାରିବେ ନାହିଁ । କାରଣ ସେମାନଙ୍କ ସ୍ୱର ବାହାରକୁ ଯାଇପାରେ ବୋଲି ନିୟମରେ ଉଲ୍ଲେଖ ହୋଇଛି ।
