ଭୁବନେଶ୍ଵର, ୩୦/୦୮ : କର୍ମସ୍ଥଳୀରେ ମହିଳାଙ୍କ ସଂଖ୍ୟା ବୃଦ୍ଧି ପାଇବାରେ ଲାଗିଛି । ନୂଆ ନୂଆ ମାତୃତ୍ୱ ଲାଭ କରିଥିବା ମହିଳା ବି କର୍ମକ୍ଷେତ୍ରରେ ଅଛନ୍ତି । ସେହି ମା’ ଓ ଶିଶୁଙ୍କ ସୁବିଧା ପାଇଁ କର୍ମସ୍ଥଳୀରେ ସ୍ତନ୍ୟପାନ କକ୍ଷ କରାଯିବାର ଆବଶ୍ୟକତା ରହିଛି । ଶିଶୁଙ୍କ ସ୍ତନ୍ୟପାନର ଗୁରୁତ୍ୱକୁ ଦେଖି ଏଭଳି ନିର୍ଦ୍ଦେଶନାମା ଆଣିଛନ୍ତି ମହିଳା ଓ ଶିଶୁ ବିକାଶ ବିଭାଗ । ସରକାରୀ, ଘରୋଇ କାର୍ଯ୍ୟାଳୟ, ସର୍ବସାଧାରଣ ସ୍ଥାନରେ ସ୍ତନ୍ୟପାନ କକ୍ଷ ସ୍ଥାପନ ପାଇଁ ସମସ୍ତ ବିଭାଗର ପ୍ରମୁଖ ଶାସନ ସଚିବ, କମିଶନର ତଥା ଶାସନ ସଚିବ, ସମସ୍ତ ଜିଲ୍ଲାପାଳଙ୍କୁ ନିର୍ଦ୍ଦେଶ ଦିଆଯାଇଛି । ବିଭାଗୀୟ ମୁଖ୍ୟମାନେ ସେମାନଙ୍କ ପ୍ରାଶାସନିକ ନିୟନ୍ତ୍ରଣରେ ଥିବା କାର୍ଯ୍ୟାଳୟ ଏବଂ ସର୍ବସାଧାରଣ ସ୍ଥାନରେ ସ୍ତନ୍ୟପାନ କକ୍ଷ ପ୍ରତିଷ୍ଠା କରିବାକୁ ଚିଠିରେ କୁହାଯାଇଛି । 

ସର୍ବସାଧାରଣ ସ୍ଥାନରେ ମଧ୍ୟ ସ୍ତନ୍ୟପାନ ସୁବିଧା ପାଇଁ ଆରାମଦାୟକ, ଏକାନ୍ତ ଓ ପରିଷ୍କାର ପରିଚ୍ଛନ୍ନ ସ୍ଥାନ ପ୍ରତିଷ୍ଠା କରିବାକୁ କୁହାଯାଇଛି । ଚଳିତ ବର୍ଷ ମଧ୍ୟ ସ୍ତନ୍ୟପାନ ଦିବସର ଥିମ୍‌ ରହିଥିଲା ‘ପ୍ରତିବନ୍ଧକ ଦୂର କରିବା, ସ୍ତନ୍ୟପାନକୁ ପ୍ରୋତ୍ସାହିତ କରିବା’ । ତୃଣମୂଳ ସ୍ତରରେ ସ୍ତନ୍ୟପାନ ନେଇ ସଚେତନତା ସୃଷ୍ଟି ସହ ସ୍ତନ୍ୟପାନ ଗୃହର ଆବଶ୍ୟକତା ଉପରେ ଉପମୁଖ୍ୟମନ୍ତ୍ରୀ ତଥା ମହିଳା ଓ ଶିଶୁ ବିକାଶ ମନ୍ତ୍ରୀ ପ୍ରଭୀତ ପରିଡ଼ା ଗୁରୁତ୍ୱ ଦେଇଥିଲେ । ସେଥିପାଇଁ ସବୁ କାର୍ଯ୍ୟାଳୟରେ କର୍ମଜୀବୀ ମା’ମାନଙ୍କ ପାଇଁ କ୍ରେଚ ସହ ସ୍ତନ୍ୟପାନ ଗୃହର ସୁବିଧା ଯୋଗାଇବାର ବ୍ୟବସ୍ଥା କରିବାକୁ ବିଭାଗ ନିର୍ଦ୍ଦେଶ ଦେଇଛନ୍ତି ।