ସାଲେପୁର,୦୫/୦୮: ସାଲେପୁରରେ ପୁଣି ଲଜ୍ଜ୍ୟା । ନାବାଳିକାଙ୍କ ସହ ଅସଦାଚରଣ ଅଭିଯୋଗ । ଥାନାରେ ଅଭିଯୋଗ କଲେ ପରିବାର ଲୋକେ । ଏନେଇ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛି ସାଲେପୁର ପୋଲିସ ।

ସୂଚନା ଅନୁଯାୟୀ, ସାଲେପୁର ଥାନା ଅଞ୍ଚଳରେ ଜଣେ ପାଞ୍ଚ ବର୍ଷର ନାବାଳିକା ନିକଟ ସମ୍ପର୍କୀୟଙ୍କ ଘରକୁ କ୍ଷୀର ଦେବାକୁ ଯାଇଥିଲେ । ସେଠାରୁ ଫେରୁଥିବା ସମୟରେ ବାଟରେ ଜଣେ ଯୁବକ ଉକ୍ତ ନାବାଳିକାକୁ ଜୋରଜବରଦସ୍ତ କରିଥିଲା । ତାଙ୍କୁ ଟାଣି ନେଇ ଶାରୀରିକ ନିର୍ଯାତନା ଦେବା ସହ ଅସଦାଚରଣ କରିଥିଲା । ଏସଂପର୍କରେ ନାବାଳିକା ଜଣକ ନିଜ ଘରେ ସବୁ ଜଣାଇଥିଲେ । ଏସବୁ ଜାଣିବା ପରେ ପରିବାର ପକ୍ଷରୁ ସାଲେପୁର ଥାନାରେ ଲିଖିତ ଅଭିଯୋଗ ହୋଇଛି । ଘଟଣାଟିକୁ ଗୁରୁତର ନେଇ ସାଲେପୁର ପୋଲିସ କେଶ ନମ୍ବର ୩୩୦/୨୪ ମାମଲା ରୁଜୁ କରିବା ସହ ପୋକ୍ସୋ ୬,୬୫ ,୨ବିଏନଏସ ଦଫା ଲଗାଇଛି। ସଂପୃକ୍ତ ଯୁବକକୁ ଧରିବା ପାଇଁ ବିଭିନ୍ନ ସ୍ଥାନରେ ଚଢାଉ ଆରମ୍ଭ କରିଛି ପୋଲିସ । ପୂର୍ବରୁ କିଛି ବର୍ଷ ତଳେ ସାଲେପୁର ଥାନା ଅଧୀନ ଜଗନ୍ନାଥପୁର ଅଞ୍ଚଳରେ ଏହିଭଳି ଏକ ଘଟଣା ଘଟିଥିଲା । ଜଣେ ନାବାଳିକାକୁ ବିଭିନ୍ନ ପ୍ରଲୋଭନ ଦେଖାଇ ଅସଦାଚରଣ କରି ମାରିଦିଆ ଯାଇଥିଲା।