ରାଇରଙ୍ଗପୁର,୭।୯: ସୁଭଦ୍ରା ଯୋଜନା ଫର୍ମ ପୂରଣ ପାଇଁ ଲାଞ୍ଚ ନେଉଥିବା ଅଭିଯୋଗ । ରାଇରଙ୍ଗପୁର ସହର ସ୍ଥିତ ୱାର୍ଡ ନମ୍ୱର ୧୩ର ସିଗନାଲ ସାହିରେ ସୁଭଦ୍ରା ଯୋଜନା ଫର୍ମ ପୂରଣ ପାଇଁ ଅଙ୍ଗନବାଡ଼ି କର୍ମୀମାନେ ହିତାଧିକାରୀଙ୍କ ପାଖରୁ ୫୦ ଟଙ୍କା ଲେଖାଏଁ ଲାଞ୍ଚ ଆଦାୟ କରୁଥିବା ଶୁକ୍ରବାର ଅଭିଯୋଗ ହୋଇଥିଲା । ପରେ ଘଟଣାର ସତ୍ୟାସତ୍ୟ ଜାଣିବା ଲାଗି ରାଇରଙ୍ଗପୁର ସିଡିପିଓଙ୍କ ତତ୍ତ୍ୱlବଧାନରେ ସିଗନାଲ ସାହି ଓ ନୂଆ ଗାଁର ମହିଳା ପରିଦର୍ଶିକା ଉକ୍ତ ସ୍ଥାନରେ ପହଞ୍ଚିଥିଲେ । ହିତାଧିକାରୀ ଓ ଅଙ୍ଗନବାଡ଼ି କର୍ମୀଙ୍କ ଉପସ୍ଥିତିରେ ତଦନ୍ତ କରିବା ପରେ ଜଣାପଡ଼ିଥିଲା ଯେ, କୌଣସି ଅଙ୍ଗନବାଡ଼ି କର୍ମୀଙ୍କର ଏଥିରେ ସମ୍ପୃକ୍ତି ନାହିଁ । ମାତ୍ର ନିକଟସ୍ଥ ମୋ ସେବା କେନ୍ଦ୍ର/ଜନସେବା କେନ୍ଦ୍ରରେ କାର୍ଯ୍ୟରତ କମ୍ପ୍ୟଟର ଅପରେଟରମାନେ ସୁଭଦ୍ରା ଫର୍ମ ପୂରଣ ପାଇଁ ଅଳ୍ପ କିଛି ହିତାଧିକାରୀଙ୍କଠାରୁ ଅର୍ଥ ରାଶି ଆଦାୟ କରିଥିବା ଜଣାପଡ଼ିଛି । 

ଘଟଣା ଜଣାପଡ଼ିବା ପରେ ଆଦାୟ ହୋଇଥିବା ଅର୍ଥ ରାଶି ସୁଭଦ୍ରା ଯୋଜନାରେ ସମ୍ପୃକ୍ତ ହିତାଧିକାରୀମାନଙ୍କୁ ଫେରାଇ ଦେବାର ବ୍ୟବସ୍ଥା କରାଯାଇଥିଲା । ଏହି ଘଟଣା ଆଧାରରେ ରାଇରଙ୍ଗପୁର ଟାଉନ ଥାନାର ଆଇଆଇସି ଶ୍ରୀ ସୂଚନ୍ଦ୍ର ମହାଳିକଙ୍କ ତତ୍ତ୍ୱାବଧାନରେ ଟାଉନ ଥାନା ସବଇନ୍ସପେକ୍ଟର ଶ୍ରୀ ଆଲୋକ କୁମାର ସିଂ ଘଟଣାସ୍ଥଳରେ ପହଞ୍ଚି ମୋ ସେବା/ଜନସେବା କେନ୍ଦ୍ରରୁ ଗୋଟିଏ ଲ୍ୟାପଟପ୍ ସହ ଗୋଟିଏ ମନିଟର ଓ ସି.ପି.ୟୁ. ଜବତ କରିଥିଲେ ।