ଜଗତସିଂହପୁର,୦୪/୦୪: ଟିକେଟରୁ ବଞ୍ଚିତ ହେବା ପରେ ଦଳର ପ୍ରାଥମିକ ସଦସ୍ୟ ପଦରୁ ରାତିରେ ଇସ୍ତଫା ଦେଇଛନ୍ତି ପୂର୍ବତନ ଜିଲ୍ଲା ବିଜେଡି ସଭାପତି ଅମରେନ୍ଦ୍ର ଦାସ । ଏହି ମର୍ମରେ ସେ ଦଳ ସୁପ୍ରିମୋ ତଥା ବିଜେଡି ସଭାପତି ନବୀନ ପଟ୍ଟନାୟକଙ୍କ ନିକଟକୁ ତାଙ୍କ ଇସ୍ତଫାପତ୍ର ପଠାଇବା ସହିତ ଆଗାମୀ ସାଧାରଣ ନିର୍ବାଚନ ଲଢ଼ିବାକୁ ମଧ୍ୟ ନିଷ୍ପତ୍ତି ନେଇଛନ୍ତି ।
ପୂର୍ବତନ ବିଧାୟକ ବିଷ୍ଣୁ ଦାସଙ୍କୁ ଆଦର୍ଶ ଭାବେ ଗ୍ରହଣ କରି ଅଣକଂଗ୍ରେସ ରାଜୀନୀତିରେ ଛାତ୍ରାବସ୍ଥାରୁ ସେ ସକ୍ରିୟ ରହିଥିଲେ । ବହୁବାର ଏସ୍ଭିଏମ୍ କଲେଜ ଛାତ୍ର ସଂସଦ ନିର୍ବାଚନରେ ଦଳ ସମର୍ଥିତ ପ୍ରାର୍ଥୀ ମାନଙ୍କୁ ବିଜୟର ମୁକୁଟ ପିନ୍ଧାଇଥିଲେ । ବିଷ୍ଣୁଙ୍କ ଅମଳରେ ଅର୍ଥାତ ୨୦୧୯ରେ ସେ ନିଜେ ଜଗତସିଂହପୁରରୁ ଦଳ ଟିକଟରେ ବିଧାୟକ ନିର୍ବାଚନ ଲଢ଼ିବାକୁ ଅଣ୍ଟା ଭିଡ଼ିଥିଲେ । ତେବେ ଦଳ ବିଧାୟକ ପ୍ରଶାନ୍ତ କୁମାର ମୁଦୁଲିଙ୍କୁ ଟିକଟ ଦେବାରୁ ବିବାଦର ସୂତ୍ରପାତ ହୋଇଥିଲା । ପରବର୍ତ୍ତୀ ସମୟରେ ପ୍ରଶାନ୍ତ ତାଙ୍କ ଘରକୁ ଯାଇ ହାତ ମିଳାଇଥିଲେ ଏବଂ ନିର୍ବାଚନରେ ବିଜେତା ହୋଇଥିଲେ । ଜିତିବା ପରେ କିନ୍ତୁ ପ୍ରଶାନ୍ତ ରାଜନୀତିର ଗୋଟି ଚଳାଇ ଅମରେନ୍ଦ୍ରଙ୍କଠାରୁ ଦୂରତା ରକ୍ଷା କରିଥିଲେ ।
ଅବଶ୍ୟ ଦଳ ଅମରେନ୍ଦ୍ରଙ୍କୁ ଟିକଟ ଦେଇନଥିଲେ ବି ଥଇଥାନ ପାଇଁ କାଜୁ ଉନ୍ନୟନ ନିଗମ ଅଧ୍ୟକ୍ଷ ଚୌକିରେ ବସାଇଥିଲା । ଏହା ସହ ଜିଲ୍ଲା ବିଜେଡି ସଭାପତି ଭଳି ଗୁରୁଦାୟିତ୍ୱ ମଧ୍ୟ ଦେଇଥିଲା । ପରେ ସଭାପତି ପଦରୁ ତାଙ୍କୁ ଅନ୍ତର କରାଯାଇ ପ୍ରଶାନ୍ତଙ୍କ କାନ୍ଧରେ ଏହି ଦାୟିତ୍ୱ ନ୍ୟସ୍ତ କରିଥିଲା ଦଳ । ଏବେ ଏହି ଦାୟିତ୍ୱ ରବି ନାରାୟଣ ଜେନାଙ୍କ ଉପରେ ନ୍ୟସ୍ତ କରାଯାଇଛି । ଏପଟେ ନିଗମ ଅଧ୍ୟକ୍ଷ ପଦରୁ ଦାୟିତ୍ୱମୁକ୍ତ ହେବା ପରେ ବି ଅମରେନ୍ଦ୍ର ଦଳୀୟ ସଂଗଠନକୁ ସୁଦୃଢ଼ କରିବା ଦିଗରେ କାର୍ଯ୍ୟ କରିଥିଲେ । କିଛି ଦିନ ତଳେ ସହରରେ ଏକ ବିଶାଳ ପଦଯାତ୍ରା ପରି ନିଜ ପତିଆରା ଦେଖାଇଥିଲେ । ତଥାପି ଦଳ ଏଥର ବି ତାଙ୍କୁ ଟିକଟରୁ ବଞ୍ଚିତ କରିବାରୁ ସେ ଇସ୍ତଫା ଦେଇଛନ୍ତି ।
