ନୂଆଦିଲ୍ଲୀ,୨୨/୦୯: ଗାଜା  ଦକ୍ଷିଣ ପ୍ରାନ୍ତରେ ପରେ ଇସ୍ରାଏଲର ଆକ୍ରମଣ। ସେଠାରେ ବିସ୍ଥାପିତଙ୍କୁ ଆଶ୍ରୟ ଦେଇଥିବା ଏକ ସ୍କୁଲରେ ମିଶାଇଲ ମାଡ ହେବା ଫଳରେ ୨୨ ଜଣଙ୍କର ମୃତ୍ୟୁ ହୋଇଛି। ତେବେ ମୃତକଙ୍କ ମଧ୍ୟରେ ଅଧିକାଂଶ ଛୋଟ ପିଲା ଓ ମହିଳା ରହିଥିବା ଗାଜାର ସ୍ୱାସ୍ଥ୍ୟ ମନ୍ତ୍ରଣାଳୟ ସୂଚନା ଦେଇଛି।

ତେବେ ଗାଜାକୁ ପରିଚାଳନା କରୁଥିବା ବିଦ୍ରୋହୀ ସଂଗଠନ ହମାସର ଗୋଟିଏ ମିଡିଆ ଅଫିସ ପକ୍ଷରୁ କୁହାଯାଇଛି ଯେ ଇସ୍ରାଏଲର ମିଶାଇଲ ମାଡ଼ରେ ୧୩ ଜଣ ଛୋଟ ପିଲା ଓ ୬ ଜଣ ମହିଳାଙ୍କ ସମେତ ୨୨ ଜଣଙ୍କ ମୃତ୍ୟୁ ଘଟିଛି। ସାମ୍ନାକୁ ଆସିଥିବା ଦୃଶ୍ୟରେ ଦେଖିବାକୁ ମିଳିଛି ଯେ ଗୋଟିଏ ବିରାଟ କାୟ ରୁମର କାନ୍ଥ ଭୁଶୁଡ଼ି ପଡ଼ିଛି। ଏହା ଭଗ୍ନସ୍ତୁପରେ ପରିଣତ ହୋଇଥିବା ବେଳେ ଫର୍ଣ୍ଣିଚର ଗୁଡ଼ିକ ଜଳି ଯାଇଛି। ଛାତରେ ବିରାଟକାୟ ଗାତ ସବୁ ହୋଇଛି। ଏହି ଧ୍ୱଂସାବଶେଷ ତଳେ ରହିଥିବା ନିଜ ଜିନିଷକୁ ମଧ୍ୟ କିଛି ଲୋକ ଖୋଜୁଛନ୍ତି। 

ସେପଟେ ଘଟଣା ବେଳେ ଉପସ୍ଥିତ ଥିବା ସୟଦ ଅଲ ମାଲାହି କହିଛନ୍ତି, “ମହିଳାମାନେ ଓ ସେମାନଙ୍କ ପିଲାମାନେ ସ୍କୁଲର ପଡ଼ିଆରେ ବସିଥିଲେ। କିଛି ପିଲା ମଧ୍ୟ ଖେଳୁଥିଲେ। ଏହି ସମୟରେ ୨ଟି ରକେଟ ସେଠାରେ ମାଡ଼ ହୋଇଥିଲା। କିଛି ମୃତଦେହକୁ ଗଧ ଗାଡ଼ିରେ କମଳ ଘୋଡ଼ାଇ ଘଟଣାସ୍ଥଳରୁ ନିଆଯାଇଛି। କାରଣ ମୃତାହତଙ୍କୁ ନେବାକୁ ଆସିଥିବା ଆମ୍ବୁଲାନ୍ସରେ ଜାଗା ନଥିବାରୁ ଏପରି ପଦକ୍ଷେପ ଗ୍ରହଣ କରାଯାଇଛି।” ଆକ୍ରମଣରେ ଛିନଛତ୍ର ହୋଇଥିବା ବିଲଡିଂଟି ହମାସ ଓ ଇସ୍ରାଏଲ ଯୁଦ୍ଧ ପୂର୍ବରୁ ସ୍କୁଲ ଭାବେ ବ୍ୟବହାର କରାଯାଉଥିଲା। କିନ୍ତୁ ଯୁଦ୍ଧ ପର ଠାରୁ ଏଠାରେ ପାଠପଢ଼ା ବନ୍ଦ ହୋଇଯାଇଥିଲା। ଏହି ରୁମରେ ଯୁଦ୍ଧକ୍ଷତିଗ୍ରସ୍ତମାନେ ଆଶ୍ରୟ ନେଉଥିଲେ। ଅନ୍ୟପକ୍ଷରେ ସ୍କୁଲରେ ଆକ୍ରମଣ ଘଟଣାକୁ ଇସ୍ରାଏଲ ଖଣ୍ଡନ କରିଛି।