ବାରଙ୍ଗ,୦୯/୦୮: ରକ୍ତ ସମ୍ପର୍କ ପରିବର୍ତ୍ତନ ଓ ବଂଶ ବୃଦ୍ଧି ପାଇଁ  ନନ୍ଦନକାନନ ପ୍ରାଣୀ ଉଦ୍ୟାନକୁ କଲିକତା ଆଲିପୁର ଚିଡିଆଖାନା ଓ ହାଇଦ୍ରାବାଦର ନେହୁର ପ୍ରାଣୀଉଦ୍ୟାନରୁ ଅଦଳ ବଦଳ ପ୍ରକ୍ରିୟାରେ ଜନ୍ତୁ ଆସିବେ । କେଉଁ ଜନ୍ତୁ ଅଦଳ ବଦଳ କରାଯିବ ସେଥିପାଇଁ ଉଭୟ ଚିଡ଼ିଆଖାନା ସହିତ ନନ୍ଦନକାନନ କର୍ତ୍ତୃପକ୍ଷଙ୍କ କଥାବାର୍ତ୍ତା ସରିଛି । ତେବେ କେବଳ କେନ୍ଦ୍ରୀୟ ଚିଡିଆଖାନା କର୍ତ୍ତୃପକ୍ଷଙ୍କ ଅନୁମତିକୁ  ଅପେକ୍ଷା। ଏହି ଅଦଳବଦଳ ପ୍ରକ୍ରିୟାରେ ନନ୍ଦନକାନନ ପ୍ରାଣୀ ଉଦ୍ୟାନ  ୨୦ଟି ଜୀବଜନ୍ତୁ ଦେବ । ସେମାନଙ୍କ ମଧ୍ୟରେ ୨ ସିଂହ (ଅଣ୍ଡିରା ମାଈ),  ଗୋଟିଏ ମାଈ ସାଧାରଣ ବାଘ, ଦୁଇଟି ଜଳହସ୍ତୀ (ଅଣ୍ଡିରା ମାଈ),  ୨ଟି ମାଈ ହିମାଳୟ କଳାଭାଲୁ, ଦୁଇଟି ବାରଶିଙ୍ଗା, ୪ ଗୁରାଣ୍ଡି , ୨ଟି  ଚଉଶିଙ୍ଗା,୫ଟି କୁଜି ହରିଣ ଅଛନ୍ତି । ଏହା ବଦଳରେ କଲିକତା ଆଲିପୁର ଚିଡିଆଖାନାରୁ ହଳେ ଜିରାଫ୍‌, ୨ ମାଛରଙ୍କା ବିରାଡି,୬ପାଣି  ଗୋଧି, ୮ଟି ଗ୍ରୀନ ଏଣ୍ଡୁଅ, ୨ଟି ଚାମୁଚ ଥଣ୍ଟିଆଆସିବେ ।   

ନନ୍ଦନକାନନରୁ ହାଇଦ୍ରାବାଦ ଚିଡ଼ିଆଖାନାକୁ ୨୩ ଜୀବଜନ୍ତୁ ଯିବେ ।  ସେଥିମଧ୍ୟରେ ରହିଛି ୩ ସିଆମିଜ କୁମ୍ଭୀର, ୪ ଗେଣ୍ଢାଳିଆ,  ୪ ସୁନେଲି କୁକୁଟ, ୨ ଲେଡି ଆମହର୍ଷ୍ଟ ଫିଜାଣ୍ଟ, ୪ ଆସାମ  ମାଙ୍କଡ, ୪ ଗୁରାଣ୍ଡି, ୨ କୁଜି ହରିଣ  । ଏହା ପ୍ରତିବଦଳରେ  ହାଇଦ୍ରାବାଦ ଚିଡ଼ିଆଖାନାରୁ ୨ ସାରସ ପକ୍ଷୀ, ୨ ଚାମୁଚ ଥଣ୍ଟିଆ,୨  ଧୂସର ଜଙ୍ଗଲୀ କୁକୁଡା, ୨ ମାଈ ଆମେରିକାନ ଏଣ୍ଡୁଅ,୪  ଧଳା କପତ,୨ ଗୁରାଣ୍ଡି, ୨ କୁଜି ହରିଣ, ୪ ନାଲି ବୋଡ଼ା, ୨  ବାଲି ବୋଡ଼ା, ୨ ଚନ୍ଦନ ବୋଡ଼ା, ୪ ବନେଟ ମାଙ୍କଡ଼ ଆସିବ ।  

ସୂଚନା ଯୋଗ୍ୟ, ନନ୍ଦନକାନନ ପ୍ରାଣୀ ଉଦ୍ୟାନରେ  ଜିରାଫ ଖୁସି ଏକାକୀ ରହୁଥିବା ବେଳେ ଏବେ ହଳେ  ଜିରାଫ ଅଣାଯାଉଛି । ଫଳରେ ପ୍ରାଣୀ ଉଦ୍ୟାନରେ ଜିରାଫ  ବଂଶ ବୃଦ୍ଧି ହେବା ସହିତ ପର୍ଯ୍ୟଟକ ଗୋଟିଏ ଖୁଆଡ଼ରେ  ତିନୋଟି ଜିରାଫ ଦେଖି ଭରପୂର ମନୋରଞ୍ଜନ କରିପାରିବେ ।