ମାଲକାନଗିରି,୨୭/୯: ସାଧାରଣତଃ ପୁଲିସ ଓ ସୂଚନାଦାତାଙ୍କୁ ଧମକ ଦେଇ ତାଙ୍କ ବିରୋଧରେ ବିଭିନ୍ନ ସ୍ଥାନରେ ପୂର୍ବରୁ ମାଓବାଦୀମାନେ ପୋଷ୍ଟର ଓ ବ୍ୟାନର ଲଗାଉଥିଲେ । ଏବେ ଗତ ଦୁଇଦିନ ଧରି ମାଲକାନଗିରି ଜିଲ୍ଲା ମାଓପ୍ରବଣ ଇଲାକାଗୁଡ଼ିକରେ ମାଓବାଦୀଙ୍କୁ ଧମକ ଦିଆଯାଇ ମାଓବାଦୀ ବିରୋଧୀ ପୋଷ୍ଟର ଲାଗିଛି । ମାଲକାନଗିରି ଜିଲ୍ଲାର ମାଥିଲି, କାଲିମେଳା ଓ ଚିତ୍ରକୋଣ୍ଡା ବ୍ଲକ ସ୍ୱାଭିମାନ ଅଞ୍ଚଳରେ ଓଡ଼ିଶା ରାଜ୍ୟ ସରକାରଙ୍କ ଆତ୍ମ ସମର୍ପଣ ଓ ପୁନଃ ଥଇଥାନ ନୀତିର ଲାଭ ଉଠାନ୍ତୁ ଏବଂ ସମାଜର ମୁଖ୍ୟ ସ୍ରୋତରେ ନିଜକୁ ସାମିଲ କରନ୍ତୁ ନେଇ ଅବିଭକ୍ତ କୋରାପୁଟ ଜିଲ୍ଲା ଆଦିବାସୀ ସୁରକ୍ଷା ମଞ୍ଚ ତରଫରୁ ବିଭିନ୍ନ ସ୍ଥାନରେ ପୋଷ୍ଟର ମରାଯାଇଥିବା ଦେଖିବାକୁ ମିଳିଛି । 

ଏହି ପୋଷ୍ଟରରେ ଦୀର୍ଘ ବର୍ଷ ଧରି ବିଭିନ୍ନ ଅଞ୍ଚଳର ଆଦିବାସୀ ଭାଇ ଓ ଭଉଣୀମାନେ ନକ୍ସଲ ସଂଗଠନ ସହିତ ସାମିଲ ହୋଇ ନିଜ ବାପା ମାଆ ଘରଦ୍ୱାର ଛାଡ଼ି ବହୁ କଷ୍ଟ ସହି, ଅଣ ଆଦିବାସୀ ଓ ଅଣଓଡ଼ିଆ ନକ୍ସଲ ନେତାଙ୍କ ଦ୍ଵାରା ନିର୍ଯ୍ୟାତିତ ହୋଇ ବର୍ତ୍ତମାନ ବାହାର ରାଜ୍ୟର ଜଙ୍ଗଲ ପାହାଡ଼ରେ ଲୁଚି ଛପି ରହିବାକୁ ବାଧ୍ୟ ହେଉଛନ୍ତି । ବର୍ତ୍ତମାନ ପରିସ୍ଥିତିରେ ଛତିଶଗଡ଼, ତେଲେଙ୍ଗାନା ଓ ମହାରାଷ୍ଟ୍ର ଭଳି ରାଜ୍ୟମାନଙ୍କରେ ସୁରକ୍ଷା କର୍ମୀମାନଙ୍କ ସହିତ ମାଓ ସଂଗଠନର ମୁକାବିଲାରେ ବହୁ ସଂଖ୍ୟାରେ ମାଓବାଦୀ ସଂଗଠନରେ ଥିବା ଆଦିବାସୀମାନେ ନିଜ ଜୀବନ ହରାଇଛନ୍ତି । 

ତେଣୁ ଆମ ଅଞ୍ଚଳର ଆଦିବାସୀ ଭାଇ ଓ ଭଉଣୀ ମାନଙ୍କୁ ଅବିଭକ୍ତ କୋରାପୁଟ ଜିଲ୍ଲା ଆଦିବାସୀ ସୁରକ୍ଷା ମଞ୍ଚ ତରଫରୁ ବିନୀତ ଅନୁରୋଧ କରଛୁ ବୋଲି ସେମାନେ ଓଡ଼ିଶା ରାଜ୍ୟ ସରକାରଙ୍କ ଆତ୍ମସମର୍ପଣ ଓ ପୁନଃ ଥଇଥାନ ନୀତିର ଲାଭ ଉଠାନ୍ତୁ ଏବଂ ସମାଜର ମୁଖ୍ୟ ସ୍ରୋତରେ ନିଜକୁ ସାମିଲ କରି ନିଜ ଜନ୍ମ ମାଟିକୁ ଫେରି ଏକ ସୁସ୍ଥ ଓ ସୁରକ୍ଷିତ ଜୀବନ ଆପଣେଇ ନିଅନ୍ତୁ ବୋଲି ପୋଷ୍ଟରରେ ଲେଖିଛନ୍ତି । ନିରୀହ ଆଦିବାସୀଙ୍କୁ ବଡ଼ ବଡ଼ କ୍ୟାର୍ଡର ମାଓନେତାମାନେ ଅସ୍ତ୍ର କରି ଫାଇଦା ଉଠାଉଥିବା ଓ ମହିଳା ମାଓବାଦୀଙ୍କୁ ନିର୍ଜାତନା ଦେବା ଘଟଣାକୁ ବରଦାସ୍ତ କରାଯିବ ନାହିଁ । ଦରକାର ପଡ଼ିଲେ ସେମାନଙ୍କ ସହ ମୁକାବିଲା କରିବାକୁ ଆମେ ପ୍ରସ୍ତୁତ ଅଛୁ ବୋଲି ପୋଷ୍ଟରରେ ଲେଖା ରହିଛି ।