ନୂଆଦିଲ୍ଲୀ,୨୬/୦୫: କୋରିଆରେ ଚାଲିଥିବା ତୀରନ୍ଦାଜୀ ବିଶ୍ୱକପ୍ ଷ୍ଟେଜ୍-୨ରେ ଭାରତୀୟ ମହିଳା କମ୍ପାଉଣ୍ଡ୍ ଦଳ ଅପରାଜେୟ ସାବ୍ୟସ୍ତ ହୋଇଛନ୍ତି । ଜ୍ୟୋତି ସୁରେଖା ଭେନାମ, ପରନୀତ କୌର ଓ ଅଦିତି ଗୋପିଚାନ୍ଦ ସ୍ୱାମୀଙ୍କୁ ନେଇ ଗଠିତ ଦଳ ସ୍ୱର୍ଣ୍ଣ ପଦକ ଜିତିଛନ୍ତି । ଏଥିସହ ମହିଳା ଦଳ ବିଶ୍ୱକପ୍ରେ କ୍ରମାନ୍ୱୟରେ ତୃତୀୟ ଥର ଟାଇଟଲ୍ ବଜାୟ ରଖି ଐତିହାସିକ ଉପଲବ୍ଧ ହାସଲ କରିଛନ୍ତି । ଅନ୍ୟ ପଟରେ କମ୍ପାଉଣ୍ଡ୍ ମିକ୍ସଡ୍ ଟିମ୍ ଇଭେଣ୍ଟରେ ଜ୍ୟୋତି ଓ ପ୍ରିୟାଂଶ ଯୋଡ଼ି ଫାଇନାଲ୍ରେ ପରାଜିତ ହୋଇ ରୌପ୍ୟ ପଦକରେ ସନ୍ତୁଷ୍ଟ ହୋଇଛନ୍ତି ।
ମହିଳା କମ୍ପାଉଣ୍ଡ୍ ଟିମ୍ ଇଭେଣ୍ଟ ଫାଇନାଲ୍ରେ ଭାରତ ୨୩୨-୨୨୬ ପଏଣ୍ଟରେ ତୁର୍କୀ ଦଳକୁ ପରାସ୍ତ କରିଥିଲା । ମହିଳା ଦଳ ପୂର୍ଣ୍ଣ ଆଧିପତ୍ୟ ବଜାୟ ରଖିବା ସହ ସ୍ୱର୍ଣ୍ଣ ପଦକ ଭେଟି ଦେଇଥିଲେ । ଗତ ବିଶ୍ୱକପ୍ ଷ୍ଟେଜ୍-୧ (ସାଙ୍ଘାଇ) ଏବଂ ୨୦୨୩ ବିଶ୍ୱକପ୍ ଷ୍ଟେଜ୍-୪ (ପ୍ୟାରିସ୍)ରେ ମଧ୍ୟ ମହିଳା ଦଳ ଅପ୍ରତିଦ୍ୱନ୍ଦ୍ୱୀ ସାବ୍ୟସ୍ତ ହୋଇଥିଲେ । ଅନ୍ତର୍ଜାତୀୟ ଟୁର୍ଣ୍ଣାମେଣ୍ଟରେ ଭାରତୀୟ ମହିଳା ଦଳ କ୍ରମାନ୍ୱୟରେ ୬ଟି ସ୍ୱର୍ଣ୍ଣ ପଦକ ଜିତିବାରେ ସଫଳ ହୋଇଛନ୍ତି । ବିଶ୍ୱ ମାନ୍ୟତା ତାଲିକାରେ ଦଳ ଏକ ନମ୍ବର ସ୍ଥାନରେ ରହିଛି । ଭାରତର ସବୁଠୁ ସଫଳ ତୀରନ୍ଦାଜ ଭାବେ ପ୍ରମାଣିତ କରିଥିବା ଜ୍ୟୋତିଙ୍କର ଏହା ଅଷ୍ଟମ ବିଶ୍ୱକପ୍ ସ୍ୱର୍ଣ୍ଣ ପଦକ ରହିଥିଲା ।
ଗତ ୩ବର୍ଷ ମଧ୍ୟରେ ସେ ସମସ୍ତ ପଦକ ଜିତିଛନ୍ତି । ବିଶ୍ୱକପ୍ରେ ଜ୍ୟୋତି ଇତିମଧ୍ୟରେ ୧୯ଟି ପଦକ ଜିତି ସାରିଲେଣି । କମ୍ପାଉଣ୍ଡ୍ ମିକ୍ସଡ୍ ଟିମ୍ ଫାଇନାଲ୍ରେ ଜ୍ୟୋତି ଅଳ୍ପକେ ସ୍ୱର୍ଣ୍ଣ ପଦକରୁ ବଞ୍ଚିତ ହୋଇଥିଲେ । ପ୍ରିୟାଂଶଙ୍କୁ ସାଥୀ କରି ଖେଳିଥିବା ଜ୍ୟୋତି ଫାଇନାଲ୍ରେ ୧୫୩-୧୫୫ରେ ଆମେରିକୀୟ ଯୋଡ଼ିଙ୍କ ନିକଟରୁ ହାରି ରୌପ୍ୟରେ ସନ୍ତୁଷ୍ଟ ହୋଇଥିଲେ । ଗତ ବିଶ୍ୱକପ୍ ଷ୍ଟେଜ୍୧ (ସାଙ୍ଘାଇ)ରେ ସେ ଅଭିଷେକ ବର୍ମାଙ୍କୁ ସାଥୀ କରି ସ୍ୱର୍ଣ୍ଣ ପଦକ ହାସଲ କରିଥିଲେ।
