ନୂଆଦିଲ୍ଲୀ, ୨୪/୦୩: ମଦ ନୀତି ଦୁର୍ନୀତି ମାମଲାରେ ଇଡି ଦ୍ୱାରା ଗିରଫ ହୋଇ ରିମାଣ୍ଡରେ ଥିବା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ୍ ସେଇଠୁ ସରକାର ଚଳାଇଛନ୍ତି । ଇଡି ହେପାଜତରେ ଥିବା ଅରବିନ୍ଦ କେଜ୍ରିୱାଲ୍ ପ୍ରଥମ ଆଦେଶ ଜାରି କରିଛନ୍ତି । ଏକ ନୋଟରେ ଜଳ ବିଭାଗ ଲାଗି ନିଷ୍ପତ୍ତି ନେଇଛନ୍ତି କେଜ୍ରିୱାଲ୍ ।
ଆମ୍ ଆଦମୀ ପାର୍ଟିର ସୂତ୍ର ଅନୁସାରେ, ଦିଲ୍ଲୀ ସରକାରଙ୍କ ମନ୍ତ୍ରୀ ଆତିଶୀ ମାର୍ଚ୍ଚ ୨୩ ରବିବାର ଏକ ସାମ୍ବାଦିକ ସମ୍ମିଳନୀ କରି ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ୍ ନେଇଥିବା ନିଷ୍ପତ୍ତି ବାବଦରେ ସମସ୍ତ ସୂଚନା ଦେବେ । ତେବେ ଗିରଫଦାରୀର ୩ ଦିନ ପରେ କେଜ୍ରିୱାଲ୍ ପ୍ରଥମ ଆଦେଶ ଦେଇଛନ୍ତି ।
ଅନ୍ୟପଟେ ଦିଲ୍ଲୀ ମୁଖ୍ୟମନ୍ତ୍ରୀ କେଜ୍ରିୱାଲଙ୍କ ଗିରଫଦାରୀକୁ ବିରୋଧ କରି ଆପ୍ ନେତା ଓ କର୍ମୀ ଦିଲ୍ଲୀ ସହ ଦେଶର ବିଭିନ୍ନ ସ୍ଥାନରେ ପ୍ରତିବାଦ ଜାରି ରଖିଛନ୍ତି । ଶନିବାର ଦିଲ୍ଲୀ ହାଇକୋର୍ଟ କେଜ୍ରିୱାଲଙ୍କ ଆବେଦନର ତତ୍କାଳ ଶୁଣାଣି ପାଇଁ ମନା କରିଥିଲେ । ମାର୍ଚ୍ଚ ୨୭ରେ କେଜ୍ରିୱାଲଙ୍କ ଆବେଦନର ଶୁଣାଣି ପାଇଁ କୋର୍ଟ ଦିନ ଧାର୍ଯ୍ୟ କରିଛନ୍ତି । ଆବେଦନର ଗିରଫଦାରୀ ସହ ଟ୍ରାଏଲ କୋର୍ଟଙ୍କ ନିର୍ଦ୍ଦେଶନାମାକୁ ଭୁଲ୍ ଦର୍ଶାଇଛନ୍ତି କେଜ୍ରିୱାଲ୍ । ଏଥିସହ ସେ ଜାମିନ୍ ପାଇଁ ହକଦାର୍ ବୋଲି କୋର୍ଟଙ୍କୁ ଜଣାଇଛନ୍ତି ।
ମାର୍ଚ୍ଚ ୨୧ରେ ଦିଲ୍ଲୀ ମଦ ନୀତି ଦୁର୍ନୀତି ମାମଲାରେ ଅରବିନ୍ଦ କେଜ୍ରିୱାଲଙ୍କୁ ଗିରଫ କରିଥିଲା ପ୍ରବର୍ତ୍ତନ ନିର୍ଦ୍ଦେଶାଳୟ । ଗିରଫର ପର ଦିନ କେଜ୍ରିୱାଲଙ୍କୁ ରାଉଜ ଆଭେନ୍ୟୁ କୋର୍ଟରେ ହାଜର କରିଥିଲେ । କୋର୍ଟ କେଜ୍ରିୱାଲଙ୍କୁ ମାର୍ଚ୍ଚ ୨୮ ପର୍ଯ୍ୟନ୍ତ ଇଡି ହେପାଜତରେ ପଠାଇଛନ୍ତି । ଗିରଫକୁ ନେଇ ଆପ୍ ଓ କେଜ୍ରିୱାଲଙ୍କ ସମର୍ଥକ ପ୍ରତିବାଦ କରୁଥିବା ବେଳେ ଜେଲରୁ କେଜ୍ରିୱାଲ୍ ସରକାର ଚଳାଇବେ ବୋଲି ଦଳର ନେତା କହିଛନ୍ତି ।