ନୂଆଦିଲ୍ଲୀ, ୧୧/୦୯ : ଚୀନର ହୁଲନବୁଇର ଠାରେ ଚାଲିଥିବା ପୁରୁଷ ହକି ଏସିଆନ୍ ଚାମ୍ପିଅନ୍ସ ଟ୍ରଫିରେ ଆଜି ଡିଫେଣ୍ଡିଂ ଚାମ୍ପିଅନ୍ ଭାରତ ଓ ମାଲେସିଆ ସାମ୍ନାସାମ୍ନି ହେବେ । କ୍ରମାନ୍ୱୟରେ ୨ଟି ମ୍ୟାଚ୍ ଜିତି ପଏଣ୍ଟ ତାଲିକାରେ ଶୀର୍ଷ ସ୍ଥାନରେ ଥିବା ଭାରତ ଆଧିପତ୍ୟ ବଜାୟ ରଖିବା ଲକ୍ଷ୍ୟରେ ରହିଛି । ଅନ୍ୟପଟରେ ମାଲେସିଆ ପ୍ରଥମ ବିଜୟ ପାଇଁ ବ୍ୟାକୁଳ ରହିଛି । ଫଳରେ ଆଜି ଏକ ସଂଘର୍ଷପୂର୍ଣ୍ଣ ମ୍ୟାଚ୍ ହେବା ଆଶା କରାଯାଉଛି । ଭାରତ ପ୍ରଥମ ମ୍ୟାଚ୍ରେ ଚୀନକୁ ୩-୦ରେ ଏବଂ ଦ୍ୱିତୀୟ ମ୍ୟାଚ୍ରେ ଜାପାନକୁ ୫-୧ରେ ହରାଇଥିଲା । ଆଜି ମାଲେସିଆକୁ ହରାଇ ଦଳ ସେମି ଫାଇନାଲ୍ ସ୍ଥାନ ଦୃଢ଼ କରିବାକୁ ପ୍ରୟାସ କରିବ । ମାଲେସିଆ ପ୍ରଥମ ମ୍ୟାଚ୍ରେ ପାକିସ୍ତାନ ବିପକ୍ଷରେ ୨-୨ରେ ଡ୍ର’ ରଖିଥିଲା ।
ଗତ ସୋମବାର ଦଳ ଚୀନଠୁ ୪-୨ ଗୋଲ୍ରେ ପରାଜିତ ହୋଇଥିଲା । ମାଲେସିଆ ବିପକ୍ଷରେ ଭାରତର ପଲା ଭାରି ରହିବା ସ୍ୱାଭାବିକ । ଏଫ୍ଆଇଏଚ୍ ମାନ୍ୟତା ତାଲିକାରେ ଭାରତ ପଞ୍ଚମ ସ୍ଥାନରେ ଥିବାବେଳେ ମାଲେସିଆ ୧୩ତମ ସ୍ଥାନରେ ରହିଛି । ଗତ ପ୍ୟାରିସ୍ ଅଲିମ୍ପିକ୍ସରେ ଭାରତ ବ୍ରୋଞ୍ଜ ପଦକ ହାସଲ କରିଥିଲା । ଦଳର ଏହି ସଫଳତାରେ ଅଧିନାୟକ ହର୍ମନପ୍ରୀତ ସିଂହଙ୍କ ଭୂମିକା ଗୁରୁତ୍ୱପୂର୍ଣ୍ଣ ରହିଥିଲା । ଚଳିତ ଟୁର୍ଣ୍ଣାମେଣ୍ଟରେ ସେ ୨ଟି ମ୍ୟାଚ୍ ଖେଳିଥିଲେ ମଧ୍ୟ ଗୋଲ୍ କରିବାରେ ବିଫଳ ହୋଇଛନ୍ତି । ମାତ୍ର ସୁଖଜିତ୍ ୩ଟି, ଅଭିଷେକ ଓ ଉତ୍ତମ ସିଂହ ୨ଟି ଲେଖାଏଁ ଗୋଲ୍ କରି ଫର୍ମରେ ଥିବା ପ୍ରମାଣିତ କରିଛନ୍ତି ।
ଭାରତୀୟ ଦଳ: ଗୋଲକିପରକ୍ରିଷନ ବାହାଦୂର ପାଠକ, ସୂରଜ କରକେରା³ ଡିଫେଣ୍ଡର- ଜର୍ମନପ୍ରୀତ ସିଂହ, ଅମିତ ରୋହିଦାସ, ହର୍ମନପ୍ରୀତ ସିଂହ, ଯୁଗରାଜ ସିଂହ, ସଞ୍ଜୟ, ସୁମିତ³ ମିଡ୍ଫିଲ୍ଡର- ରାଜ କୁମାର ପାଲ, ନୀଳକାନ୍ତ ଶର୍ମା, ବିବେକ ସାଗର ପ୍ରସାଦ, ମନପ୍ରୀତ ସିଂହ, ମହମ୍ମଦ ରାହିଲ ମୌସିନ³ ଫରୱାର୍ଡ- ଅଭିଷେକ, ସୁଖଜୀତ ସିଂହ, ଅରଇଜିତ ସିଂହ ହୁଣ୍ଡାଲ, ଉତ୍ତମ ସିଂହ, ଗୁରଜୋତ ସିଂହ ।
