ନୂଆଦିଳ୍ଳୀ, ୩୧।୧: ଲଗାତାର ତୃତୀୟ ଥର ଜୟ ଶାହ ଏସିଆନ୍ କ୍ରିକେଟ କାଉନସିଲର ଅର୍ଥାତ ଏସିସିର ଚେୟାରମ୍ୟାନ୍ ନିଯୁକ୍ତ ହୋଇଛନ୍ତି । ଏବେ ସେ ଭାରତୀୟ କ୍ରିକେଟ କନଟ୍ରୋଲ ବୋର୍ଡ (ବିସିସିଆଇ)ର ସଚିବ ମଧ୍ୟ ଅଛନ୍ତି। ଜୟ ଶାହ ଦୁଇ ବର୍ଷ ଲେଖାଏଁ ଦୁଇଟି କାର୍ଯ୍ୟକାଳ ଶେଷ କରିସାରିଛନ୍ତି ଓ ଏହା ତାଙ୍କର ତୃତୀୟ କାର୍ଯ୍ୟକାଳ ହେବ। ଏନେଇ ଔପଚାରିକ ଭାବରେ ଘୋଷଣା କରାଯାଇଛି। ଏସିଆ କପ୍ ୨୦୨୫ କୁ ନେଇ ଇଣ୍ଡୋନେସିଆର ବାଲିରେ ବୈଠକ ଜାରି ରହିଛି। ଏସିଆନ୍ କ୍ରିକେଟ କାଉନସିଲର ଏଜିଏମ୍ ଥିଲେ, ଯେଉଁଥିରେ ସଦସ୍ୟ ବୋର୍ଡ ଭାଗ ନେଇଥିଲେ।
ନ୍ୟୁଜ ଏଜେନ୍ସି ପିଟିଆଇ ପକ୍ଷରୁ ଏନେଇ ସୂଚନା ଦିଆଯାଇଛି। ଏସିସିର ଏଜିଏମ୍ ଚେୟାରମ୍ୟାନସିପ୍ ବ୍ୟତୀତ ବଡ ପ୍ରସଙ୍ଗ ଏସିସିର ମିଡିଆ ରାଇଟସ୍କୁ ନେଇ ମଧ୍ୟ ଥିଲା, ଯାହାର ନିଷ୍ପତ୍ତି ଶୀଘ୍ର ନିଆଯିବ। ଏସିଆ କପ୍ ଏକ ପ୍ରମୁଖ ଟୁର୍ଣ୍ଣାମେଣ୍ଟ, ଯାହାର ମିଡିଆ ରାଇଟସ୍ରୁ ମୋଟା ଅଙ୍କର ଆୟ ଏହି ସଂସ୍ଥାନକୁ ହେବ, ଯାହାର ରେଭିନ୍ୟୁ ଏସିଆର କ୍ରିକେଟକୁ ଆଗକୁ ବଢାଇବା ପାଇଁ ବ୍ୟବହାର ହୋଇଥାଏ। ଏସିଆ କପ୍ର ଆଗାମୀ ସିଜିନ୍ ଏବେ ୨୦୨୫ ରେ ଆୟୋଜିତ ହେବ। ଟି-୨୦ ଫର୍ମାଟରେ ଟୁର୍ଣ୍ଣାମେଣ୍ଟ ଖେଳାଯିବ। ଗତ ଟୁର୍ଣ୍ଣାମେଣ୍ଟ ଦିନିକିଆ ଫର୍ମାଟରେ ଖେଳା ଯାଇଥିଲା।
ଉଲ୍ଳେଖନୀୟ ଯେ, ଏବେ ଜୟ ଶାହଙ୍କ ଦ୍ବିତୀୟ କାର୍ଯ୍ୟକାଳ ଶେଷ ହୋଇନି ଓ ସେ ତୃତୀୟ କାର୍ଯ୍ୟକାଳ ପାଇଁ ମଧ୍ୟ ଅଧ୍ୟକ୍ଷ ଭାବରେ ଚୟନ ହୋଇଛନ୍ତି। ଆଗକୁ ନଭେମ୍ବର ଆଇସିସିର ନିର୍ବାଚନ ହେବାକୁ ଯାଉଛି, ଯେଉଁଥିରେ ଜୟ ଶାହ ଭାଗ ନେଇ ପାରନ୍ତି। ଜୟ ଶାହ ବର୍ତ୍ତମାନ ବିସିସିଆଇର ସଚିବ ଅଛନ୍ତି, ଯାହାକି ଏକ ଶକ୍ତିଶାଳୀ ପଦ। ଯଦି ସେ ଆଇସିସିର ଚେୟାରମ୍ୟାନ୍ ହୁଅନ୍ତି ତେବେ ଭାରତ ପାଇଁ ବଡ ବିଜୟ ହେବ।