ନୂଆଦିଲ୍ଲୀ: ଦଶନ୍ଧୀର ସବୁଠୁ ବଡ଼ ବାତ୍ୟା ‘ୟାଗି’ । ପ୍ରଥମେ ଫିଲିପାଇନ୍ସ, ପରେ ଚୀନରେ ବିପର୍ଯ୍ୟୟ ଘଟାଇବା ପରେ ଏବେ ଭିଏତନାମକୁ ଦୁଃଖରେ ବୁଡ଼ାଇ ଦେଇଛି ୟାଗି । ବାତ୍ୟା ପ୍ରଭାବରେ ଭିଏତନାମରେ ପ୍ରବଳ ବର୍ଷା ଓ ପବନ ଯୋଗୁଁ ବ୍ୟାପକ କ୍ଷୟକ୍ଷତି ଘଟିଛି । ବିଭିନ୍ନ ସ୍ଥାନରେ ଭୂସ୍ଖଳନ ଘଟିଥିବା ବେଳେ ସାଧାରଣ ଜୀବନ ଯାତ୍ରା ପ୍ରଭାବିତ ହୋଇଛି । ବନ୍ୟା ଏବଂ ଭୂସ୍ଖଳନ ଯୋଗୁଁ ଏବେ ସୁଦ୍ଧା ୫୯ ଜଣଙ୍କ ମୃତ୍ୟୁ ହୋଇଥିବା ବେଳେ ଅନେକ ନିଖୋଜ ଅଛନ୍ତି ।
ବାତ୍ୟା ୟାଗି ଗତ ଶନିବାର ଭିଏତନାମର ଉତ୍ତରପୂର୍ବ ଉପକୂଳରେ ଲ୍ୟାଣ୍ଡଫଲ୍ କରିଥିଲା । ଏହାର ପ୍ରଭାବରେ ପ୍ରବଳ ବେଗରେ ପବନ ବହିବା ସହ ପ୍ରବଳ ବର୍ଷା ହୋଇଥିଲା । ଭିଏତନାମର ହୋଆଙ୍ଗ ପ୍ରଦେଶରେ ଭୂସ୍ଖଳନ ଘଟି ଜଣେ ନବଜାତକ ଏବଂ ଏକ ବର୍ଷ ବାଳକର ମୃତ୍ୟୁ ହୋଇଛି । ସେହିଭଳି ହୋଆବିନରେ ଏକ ଘର ଉପରେ ପାହାଡ଼ ଧସିପଡ଼ିବାରୁ ଗୋଟିଏ ପରିବାରର ୪ ଜଣଙ୍କ ମୃତ୍ୟୁ ଘଟିଛି ।
ସୋମାବର କାଓବ୍ୟାଙ୍ଗରେ ୨୦ ଯାତ୍ରୀଙ୍କୁ ନେଇ ଯାଉଥିବା ବସ୍ ଜଳ ସ୍ରୋତରେ ଭାସିଯାଇଥିବା ଜଣାପଡ଼ିଛି । ଫୁଥୋ ପ୍ରଦେଶରେ ଏକ ବ୍ରିଜ୍ ଭୁଶୁଡ଼ି ପଡ଼ିବାରୁ ପ୍ରାୟ ୧୦ଟି କାର, ଟ୍ରକ୍ ଏବଂ ଦୁଇଟି ମୋଟର ସାଇକେଲ ନଦୀକୁ ଖସିପଡ଼ିଛି । ନଦୀରୁ ୩ ଜଣଙ୍କୁ ଉଦ୍ଧାର କରାଯାଇଥିବା ବେଳେ ୧୩ ଜଣ ନିଖୋଜ ଅଛନ୍ତି ।
ସେପଟେ ଭିଏତନାମ ସରକାରଙ୍କ ଅନୁସାରେ, ଦେଶର ବିଭିନ୍ନ ଅଞ୍ଚଳରେ ବିଜୁଳୀ ସଂଯୋଗ ବ୍ୟାହାତ ହୋଇଥିବା ବେଳେ ଟେଲିକମ୍ ସେବା ଠପ୍ ହୋଇଛି । ଏହାରି ମଧ୍ୟରେ, ଆଗକୁ ବନ୍ୟା ସ୍ଥିତି ଆହୁରି ଉତ୍କଟ ହେବାକୁ ଥିବା ବେଳେ ଅଧିକ ଭୂସ୍ଖଳନ ହୋଇପାରେ ବୋଲି ପାଣିପାଗ ବିଭାଗ ଚେତାବନୀ ଦେଇଛି । ଦଶନ୍ଧୀର ଭୟଙ୍କର ଟାଇଫୁନ୍ ‘ୟାଗି’ ପ୍ରଭାବରେ ଉତ୍ତର ଭିଏତନାମରେ ୩,୩୦୦ ଘର ଧ୍ବସ୍ତ ହୋଇଥିବା ବେଳେ ୧୨୦,୦୦୦ ହେକ୍ଟର ଚାଷଜମି କ୍ଷତିଗ୍ରସ୍ତ ହୋଇଛି ।
