ନୂଆଦିଲ୍ଲୀ,୦୮/୦୯: ଅଗଷ୍ଟ ମାସରେ ଭାରତୀୟ ଷ୍ଟକ୍ ମାର୍କେଟ୍ ମନ୍ଥର ଥିଲା କିନ୍ତୁ ମିଡ୍ କ୍ୟାପ୍ ଏବଂ ଛୋଟ ଷ୍ଟକଗୁଡିକର ସୂଚକାଙ୍କ ସର୍ବକାଳୀନ ରେକର୍ଡସ୍ଥରରେ ପହଞ୍ଚିଛି। ଏପରିସ୍ଥଳେ ଭାରତୀୟ ବଜାରର ଅଭିବୃଦ୍ଧିରେ ପୁଞ୍ଜି ବିନିଯୋଗ କରିବାରେ ନିବେଶକମାନେ ବଜାରରେ ନିବେଶ କରିବାକୁ ପ୍ରସ୍ତୁତ ହୋଇଛନ୍ତି। ଫଳାଫଳ ସ୍ବରୁପ ଅଗଷ୍ଟ ୨୦୨୩ ରେ, ଗତ ୧୯ ମାସ ମଧ୍ୟରେ ସର୍ବାଧିକ ସଂଖ୍ୟକ ଡିମାଟ୍ ଆକାଉଣ୍ଟ ଖୋଲାଯାଇଥିଲା। ଦେଶରେ ମୋଟ ଡିମାଟ ଆକାଉଣ୍ଟ ସଂଖ୍ୟା ବର୍ତ୍ତମାନ ୧୨.୬୬ କୋଟି ଅତିକ୍ରମ କରିଛି। ସିଏସଡିଏଲ୍ ଏବଂ ଏନଏସଡିଏଲ୍ର ତଥ୍ୟ ଅନୁଯାୟୀ, ଅଗଷ୍ଟ ୨୦୨୩ ରେ ସମୁଦାୟ ୩୧ ଲକ୍ଷ ନୂତନ ଡିମାଟ୍ ଆକାଉଣ୍ଟ ଖୋଲାଯାଇଛି, ଯାହା ଜାନୁଆରୀ ୨୦୨୨ ପରଠାରୁ ସର୍ବାଧିକ ଅଟେ। ଜୁଲାଇ ୨୦୨୨ ରେ ମୋଟ ୨୯.୭ ଲକ୍ଷ ଡିମାଟ ଆକାଉଣ୍ଟ ଖୋଲା ଯାଇଥିଲା ଏବଂ ବର୍ଷେ ତଳେ ଅର୍ଥାତ୍ ଅଗଷ୍ଟ ୨୦୨୨ ରେ ମୋଟ ୨୧ ଲକ୍ଷ ନୂଆ ଡିମାଟ ଆକାଉଣ୍ଟ ଖୋଲାଯାଇଥିଲା।
ଦେଶରେ ଡିମାଟ ଆକାଉଣ୍ଟ ସଂଖ୍ୟା ବର୍ତ୍ତମାନ ୧୨.୬୬ କୋଟିରେ ପହଞ୍ଚିଛି, ଯାହା ଗତ ବର୍ଷ ଅଗଷ୍ଟ ୨୦୨୨ ତୁଳନାରେ ୨୫.୮୩ ପ୍ରତିଶତ ଅଧିକ ଅଟେ। ମାର୍ଚ୍ଚ ୨୦୨୦ ରେ, ଷ୍ଟକ୍ ମାର୍କେଟରେ ମୋଟ ଡିମାଟ୍ ଆକାଉଣ୍ଟ୍ ସଂଖ୍ୟା ୪ କୋଟିରୁ କମ୍ ଥିଲା। କିନ୍ତୁ ଏହା ପରେ, ଭାରତୀୟ ଷ୍ଟକ୍ ମାର୍କେଟରେ ଚମତ୍କାର ବୃଦ୍ଧି ପରେ ଖୁଚୁରା ନିବେଶକଙ୍କ ସଂଖ୍ୟାରେ ଆଶାତିତ ବୃଦ୍ଧି ଘଟିଛି। ଫଳସ୍ୱରୂପ, ୩ ବର୍ଷରେ ଡିମାଟ୍ ଆକାଉଣ୍ଟ ସଂଖ୍ୟା ୩ ଗୁଣ ବୃଦ୍ଧି ପାଇଛି। ସେୟାର ବଜାରରେ ବୃଦ୍ଧି ପରେ ଖୁଚୁରା ନିବେଶକମାନେ ବଜାର ଆଡକୁ ଆକର୍ଷିତ ହେଉଛନ୍ତି। ତେଣୁ ଭାରତୀୟ ବଜାରରେ ବୃଦ୍ଧି ପାଇଁ ଏହାର ଶ୍ରେୟ କେବଳ ବର୍ତ୍ତମାନ ଖୁଚୁରା ନିବେଶକମାନଙ୍କୁ ଦିଆଯାଉଛି।
ମାର୍ଚ୍ଚ ୨୦୨୩ ଠାରୁ ସେୟାର ବଜାରରେ ଏକପାଖିଆ ବୃଦ୍ଧି ଜାରି ରହିଛି। ସେନ୍ସେକ୍ସ ୮୫୦୦ ପଏଣ୍ଟ ଏବଂ ନିଫ୍ଟି ୨୮୦୦ ପଏଣ୍ଟକୁ ଲମ୍ଫ ମାରିଛି। ତା’ପରେ ବିଏସଇରେ ତାଲିକାଭୁକ୍ତ କମ୍ପାନୀଗୁଡିକର ବଜାର କ୍ୟାପ୍ ୨୫୫ ଲକ୍ଷ କୋଟି ଥିଲା, ଯାହା ବର୍ତ୍ତମାନ ୩୨୧ ଲକ୍ଷ କୋଟିରେ ପରିଣତ ହୋଇଛି। ଅର୍ଥାତ୍ ୫ ମାସ ମଧ୍ୟରେ ନିବେଶକଙ୍କ ସମ୍ପତ୍ତି ୬୫ ଲକ୍ଷ କୋଟି ଟଙ୍କା ବୃଦ୍ଧି ପାଇଛି। ଡିମାଟ ଆକାଉଣ୍ଟ ସଂଖ୍ୟା ବଢ଼ୁଥିବାବେଳେ ନିବେଶକମାନେ ନିୟମିତ ବିନିଯୋଗ ଯୋଜନା ମାଧ୍ୟମରେ ମ୍ୟୁଚୁଆଲ ଫଣ୍ଡ ଯୋଜନାରେ ପ୍ରତି ମାସରେ ୧୫,୦୦୦ କୋଟିରୁ ଅଧିକ ଟଙ୍କା ନିବେଶ କରୁଛନ୍ତି।
You can also read:
