ନୂଆଦିଲ୍ଲୀ ୦୯/୦୮: ୧୯୪୨ ମସିହା, ଅଗଷ୍ଟ ୯ ତାରିଖରେ ଆରମ୍ଭ ହୋଇଥିଲା ଅଗଷ୍ଟ କ୍ରାନ୍ତି ଆନ୍ଦୋଳନ । ସେଥିପାଇଁ ଭାରତୀୟ ଇତିହାସରେ ଏହି ଦିନକୁ ଅଗଷ୍ଟ କ୍ରାନ୍ତି ଦିବସ ରୂପେ ପାଳନ କରାଯାଏ । ମୁମ୍ବାଇର ଯେଉଁ ପାର୍କରେ ଏହା ଆରମ୍ଭ ହେଲା, ତା’ର ନାଁ ରଖାଗଲା ଅଗଷ୍ଟ କ୍ରାନ୍ତି ପଡ଼ିଆ । 

ଇଂରେଜଙ୍କୁ ଦେଶରୁ ତଡ଼ିବା ପାଇଁ ୧୯୪୨ ଜୁଲାଇ ୪ରେ ଭାରତୀୟ ଜାତୀୟ କଂଗ୍ରେସ ତରଫରୁ ଏକ ପ୍ରସ୍ତାବ ପାରିତ କରାଗଲା, ଯେଉଁଥିରେ କୁହାଗଲା ଯେ ଯଦି ଇଂରେଜମାନେ ଭାରତ ଛାଡ଼ିବେ ନାହିଁ ତେବେ ସେମାନଙ୍କ ବିରୁଦ୍ଧରେ ବ୍ୟାପକ ସ୍ତରରେ ନାଗରିକ ଅବଜ୍ଞା ଆନ୍ଦୋଳନ ହେବ । ୧୯୪୨, ଅଗଷ୍ଟ ୮ ତାରିଖରେ ଅଖିଳ ଭାରତୀୟ କଂଗ୍ରେସ ସମିତିର ବମ୍ବେ ଅଧିବେଶନରେ ଭାରତ ଛାଡ଼ ଆନ୍ଦୋଳନ ପ୍ରସ୍ତାବ ପାରିତ ହେଲା । ପର ଦିନ ଅର୍ଥାତ ଅଗଷ୍ଟ ୯ ତାରିଖରେ ଭାରତ କର ବା ମର ସ୍ଥିତିକୁ ଓହ୍ଲାଇଲା । ଆନ୍ଦୋଳନ କ୍ରାନ୍ତିର ରୂପ ନେଲା ।