ମୁମ୍ବାଇ: ମହାରାଷ୍ଟ୍ରର ଶିବସେନା (ଉଦ୍ଧବ ଗୋଷ୍ଠୀ) ନେତା ସଞ୍ଜୟ ରାଉତ ପୁଣି ଥରେ ବିବାଦୀୟ ମନ୍ତବ୍ୟ ପାଇଁ ଚର୍ଚ୍ଚାକୁ ଆସିଛନ୍ତି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଉପରେ ବିବାଦୀୟ ଟିପ୍ପଣୀ ଦେଇଛନ୍ତି ସଞ୍ଜୟ ରାଉତ । ବୁଲଦାନାରେ ଏକ ସଭାକୁ ସମ୍ବୋଧନ ଅବସରରେ ସଞ୍ଜୟ ରାଉତ କହିଛନ୍ତି ଯେ, ମହାରାଷ୍ଟ୍ରରେ ଶିବାଜୀ ମହାରାଜ ଜନ୍ମ ନେଇଥିଲେ ଏବଂ ଔରଙ୍ଗଜେବଙ୍କ ଜନ୍ମ ଗୁଜରାଟରେ ହୋଇଥିଲା ।
କେବଳ ଏତିକିରେ ଅଟକି ନାହାନ୍ତି ସଞ୍ଜୟ ରାଉତ । ସେ ଆହୁରି କହିଛନ୍ତି, ଗୁଜରାଟର ଯେଉଁଠି ମୋଦି ଜନ୍ମଗ୍ରହଣ କରିଥିଲେ ତାର ପଡ଼ୋଶୀ ଗାଁରେ ଔରଙ୍ଗଜେବ ଜନ୍ମ ହୋଇଥିଲେ । ସେଥିପାଇଁ ଔରଙ୍ଗେଜବଙ୍କ ଚିନ୍ତାଧାରା ଗୁଜରାଟ ଏବଂ ଦିଲ୍ଲୀରୁ ମହାରାଷ୍ଟ୍ରରେ ବୃଦ୍ଧି ପାଇବାରେ ଲାଗିଛି । ମହାରାଷ୍ଟ୍ରରେ ଶିବସେନାର ବରିଷ୍ଠ ନେତା ସଞ୍ଜୟ ରାଉତ ସବୁବେଳେ ବିବାଦୀୟ ମନ୍ତବ୍ୟ ପାଇଁ ଚର୍ଚ୍ଚାକୁ ଆସିଥାନ୍ତି । ପୂର୍ବରୁ ସେ ଲଗାତାର ଏଭଳି ବିବାଦୀୟ ମନ୍ତବ୍ୟ ଦେଇଛନ୍ତି ।
ଏହା ପୂର୍ବରୁ ରାମ ମନ୍ଦିର ପ୍ରାଣ ପ୍ରତିଷ୍ଠା ସମାରୋହକୁ ପ୍ରଧାନମନ୍ତ୍ରୀ ମୋଦିଙ୍କ କାର୍ଯ୍ୟକ୍ରମ ବୋଲି ସେ କହିଥିଲେ । ଏହା ବ୍ୟତୀତ ନୂଆ ସଂସଦ ଭବନକୁ ଏକ ଜେଲ୍ ବୋଲି କହିଥିଲେ ସଞ୍ଜୟ ରାଉତ । ଏପରିକି ତାଙ୍କ ସରକାର ଆସିଲେ ପୁରୁଣା ସଂସଦ ଭବନରେ ଅଧିବେଶନ କରାଇବେ ବୋଲି ସେ ଦାବି କରିଥିଲେ । ବୁଲଦାନାରେ ଆୟୋଜିତ ଜନସଭାରେ କେନ୍ଦ୍ର ସରକାରଙ୍କୁ ଟାର୍ଗେଟ କରିବାକୁ ଯାଇ ଔରଙ୍ଗଜେବ ପର୍ଯ୍ୟନ୍ତ ପହଞ୍ଚିଥିଲେ ସଞ୍ଜୟ ରାଉତ ।