ଭୁବନେଶ୍ୱର,୦୭/୦୯: ଅଧିକ ମୋବାଇଲ ଫୋନ ବ୍ୟବହାର କରୁଥିଲେ ହୃଦରୋଗରେ ଆକ୍ରାନ୍ତ ହେବାର ଆଶଙ୍କା ରହିଛି । ଏକ ନୂଆ ଅଧ୍ୟୟନରୁ ଏହା ସାମ୍ନାକୁ ଆସିଛି । ତେବେ ସମସ୍ତଙ୍କ କ୍ଷେତ୍ରରେ ଏହା ସମାନ ନୁହେଁ । ଯେଉଁମାନେ ମଧୁମେହରେ ଆକ୍ରାନ୍ତ କିମ୍ବା ଧୂମପାନ କରିବାର ଅଭ୍ୟାସ ରହିଥାଏ, ସେମାନଙ୍କ ପାଇଁ ଅଧିକ ମୋବାଇଲ ଫୋନ ବ୍ୟବହାର ହୃଦରୋଗର ଆଶଙ୍କା ବଢ଼ାଇଥାଏ ବୋଲି ବିଶେଷଜ୍ଞମାନେ କହିଛନ୍ତି ।
ବିଶେଷଜ୍ଞଙ୍କ ମତାମତ-
କାନାଡ଼ାର ହୃଦରୋଗ ସମ୍ବନ୍ଧୀୟ ଜର୍ନାଲରେ ଏକ ରିପୋର୍ଟ ପ୍ରକାଶ ପାଇଛି । ସ୍ୱାସ୍ଥ୍ୟ ବିଶେଷଜ୍ଞମାନେ ଏହି ଅଧ୍ୟୟନ ପାଇଁ ବ୍ରିଟେନର ବାୟୋବ୍ୟାଙ୍କରୁ ୪ ଲକ୍ଷ ୪୪ ହଜାର ୨୭ ଜଣ ଲୋକଙ୍କ ତଥ୍ୟ ସଂଗ୍ରହ କରି ଅଧ୍ୟୟନ କରିଥିଲେ । ଏମାନଙ୍କଠାରେ ପୂର୍ବରୁ ହୃଦରୋଗର କୌଣସି ଲକ୍ଷଣ ନଥିଲା । ଏପରିକି ଏମାନଙ୍କ ପୂର୍ବ ଜେନେରେସନରେ ମଧ୍ୟ କେହି ହୃଦ୍ରୋଗର ଶିକାର ହୋଇ ନଥିଲେ । କିନ୍ତୁ ୨୦୦୬ ରୁ ୨୦୧୦ ମଧ୍ୟରେ ଏହି ଲୋକମାନେ ମାତ୍ରାଧିକ ମୋବାଇଲ ଫୋନ ବ୍ୟବହାର କରିଥିଲେ । ଏମାନଙ୍କ ମଧ୍ୟରୁ ଯେଉଁମାନଙ୍କର ମଧୁମେହ ଏବଂ ଧୂମପାନ ଅଭ୍ୟାସ ଥିଲା ସେମାନଙ୍କଠାରେ ପରବର୍ତ୍ତୀ ସମୟରେ ହୃଦରୋଗ ଦେଖାଦେଇଥିଲା।
ଚୀନର ସ୍ଵାସ୍ଥ୍ୟ ବିଶେଷଜ୍ଞ ୟାନଜୁନ ଝାଙ୍ଗ କହିଛନ୍ତି, ବର୍ତ୍ତମାନ ଆଧୁନିକ ସମାଜରେ ସବୁଆଡ଼େ ମୋବାଇଲ ଫୋନର ବହୁଳ ବ୍ୟବହାର ହେଉଛି । କିନ୍ତୁ ସ୍ଵାସ୍ଥ୍ୟ ଉପରେ ଏହାର କେତେ କୁପ୍ରଭାବ ରହିଛି ତାହା ମଧ୍ୟ ଜାଣିବା ଉଚିତ । ମୋବାଇଲ ଫୋନରୁ ନିର୍ଗତ ହେଉଥିବା ରେଡିଓ-ଫ୍ରିକ୍ୱେନ୍ସି ଇଲେକ୍ଟ୍ରୋମ୍ୟାଗନେଟିକ୍ ଫିଲ୍ଡସ ଶରୀରରେ ହାଇପୋଥାଲାମିକ୍-ପିଟ୍ୟୁଟାରୀ-ଅଡ୍ରେନାଲ ଆକ୍ସିସ, ଇନଫ୍ଲାମେଟୋରୀ ରେସପନ୍ସ ଏବଂ ଷ୍ଟ୍ରେସକୁ ଅନିୟନ୍ତ୍ରିତ କରିଥାଏ । ଯାହାଦ୍ଵାରା ହୃତପିଣ୍ଡ ଏବଂ ଧମନୀରେ ରକ୍ତ ସଞ୍ଚାଳନ ବହୁ ମାତ୍ରାରେ ପ୍ରଭାବିତ ହୋଇଥାଏ ।
ଅନ୍ୟ ଜଣେ ବିଶେଷଜ୍ଞ ଜିଆନହୁଇ କିନ୍ କହିଛନ୍ତି, ମୋବାଇଲ ଫୋନ ବ୍ୟବହାର ଏବଂ ହୃଦରୋଗ ମଧ୍ୟରେ ସମ୍ପର୍କ ଜାଣିବା ପାଇଁ ଲୋକଙ୍କ ଶୋଇବା ଅଭ୍ୟାସ, ମାନସିକ ବିସାଦ ଆଦି ଉପରେ ନଜର ରଖାଯାଇଥିଲା । ସ୍ଵଳ୍ପ ନିଦ୍ରା ଏବଂ ଖରାପ ମାନସିକ ସ୍ଵାସ୍ଥ୍ୟ ହୃଦରୋଗର କାରଣ ସାଜିପାରେ । ଏଥି ସହିତ ଯେଉଁମାନଙ୍କର ମଧୁମେହ ଏବଂ ଧୂମପାନ ଅଭ୍ୟାସ ରହିଥାଏ, ସେମାନଙ୍କଠାରେ ହୃଦରୋଗ ଆଶଙ୍କା ଅଧିକ ରହିଥାଏ । ଗବେଷକମାନେ ସପ୍ତାହରେ ଗୋଟିଏ ଫୋନ୍ କଲ୍ କରିବାକୁ ମୋବାଇଲ ଫୋନର ସାଧାରଣ ବ୍ୟବହାର ବୋଲି ଦର୍ଶାଇଛନ୍ତି । ଏହାଠାରୁ ଅଧିକ ବ୍ୟବହାର କଲେ ତାହା ଶରୀର ଉପରେ ନକରାତ୍ମକ ପ୍ରଭାବ ପକାଇଥାଏ ବୋଲି କହିଛନ୍ତି ।
